Jeremaia 39 - Vakavakadewa Vou kei na iVola tale eso

Vakadrukai o Jerusalemi

¹ Ena i katini ni vula ni i kaciwa ni yabaki a tui kina o Setekaia e Juta a lako mai o Nepukanesa na tui Papiloni ka ravuti Jerusalemi.

² Ena i kaciwa ni siga ni ka va ni vula, ena i katini kadua ni yabaki a tui kina o Setekaia a kabasu kina na bai ni koro.

³ Ena gauna a vakadrukai kina o Jerusalemi era a qai lako na nona vakailesilesi cecere kecega na tui Papiloni ka la'ki tiko ena matamata ni koro e loma: o Nekali Sarisa, Samaka Nipa, Sasikimi kei na dua tani tale na Nekali Sarisa.

⁴ Ni a raica na tui o Setekaia kei ira kece na nona sotia na ka a yaco era a tovolea me ra dro mai na koro ena bogi. Era a muri ena matamata ena tadrua ni bai ka dro yani vaka ki na buca ni Joritani.

⁵ Era a qai vakasavi ira na mataivalu ni Papiloni ka la'ki vesuki Setekaia ena buca mai Jeriko. Era a vesuki koya ka kauti koya vei Nepukanesa na tui Papiloni ka tiko mai Ripila ena vanua o Amaci, ka mai veilewaitaki koya e kea.

⁶ A vakamatei iratou na luve i Setekaia na tui Papiloni ni rai tu o koya. A vakamatei ira kece talega na turaga e Juta.

⁷ Ia a qai leuta na yaloka ni mata i Setekaia, ka qai vesu ena sinucodo me kau ki Papiloni.

⁸ Era a qai vakama na kai Papiloni na valenitui, na nodra veivale na tamata ka ra basuraka sobu na bai ni koro kei Jerusalemi.

⁹ A qai kauti ira yani vakabobula ki Papiloni na tamata era a vo tu ena koro, kei ira era a vuki me to vua, o Nepusaratani na turaganivalu liu.

¹⁰ A biuti ira tu ga mai eso na tamata dravudravua sara ena vanua o Juta kei ira e sega na ka era taukena, ka solia vei ira eso na vanua kei na veiwere ni vaini.

Sereki o Jeremaia

¹¹ Sa qai tukuna o Nepukanesa na tui Papiloni vei Nepusaratani na turaganivalu liu na veivakaro me baleti Jeremaia.

¹² La'ki kauti Jeremaia ka qaravi koya vinaka. Kakua ni cakava vua e dua na ka, ia mo vakayacora na veika kece sara e vinakata.”

¹³ A qai talatala o Nepusaratani kei Nepusasipani e dua na vakailesilesi cecere kei ira kece na vakailesilesi i tui Papiloni,

¹⁴ me la'ki kau mai o Jeremaia mai na lomanibai ni vale ni veivesu. Era a soli koya me vakatawai koya o Kitalaia na luve i Eikani na makubui Sefana, me raica me yaco bula ki na nona i tikotiko. A tiko mai kea o Jeremaia kei ira na tamata.”

Vakanuinui i Epetimeleki

¹⁵ A sa vosa vei Jeremaia na Turaga o Jiova ni a rogo tikoga e lomanibai ni vale ni veivesu. A sa kaya vei Jeremaia,

¹⁶ me tukuna vei Epetimeleki na kai Eciopea ni a kaya na Turaga Qaqa na nodra Kalou ni Isireli, “Au na kauta mai na veivakarusai ki na koro oqo, ka sa sega na sautu. Me vaka au a kaya ni'u na cakava. Ia ni na yaco mai na ka oqo, o na tu voli e kea mo raica.

¹⁷ Ia oi au, au na taqomaki iko, ka na sega ni rawa mo ni soli yani vei ira na tamata o rerevaki ira.

¹⁸ Au na taqomaki iko mo bula ka o na sega ni vakamatei. O na drotaka rawa na nomu bula baleta ni o sa vakadinati au. Sa i Jiova ga sa kaya vakaoqo.