Jeremaia 38 - Vakavakadewa Vou kei na iVola tale eso

O Jeremaia ena i Keli Maca

¹ E ratou a rogoca o Sefataia na luve i Matani, Ketalaia na luve i Pasuri, na luve i Jukuli na luve i Selamia kei Pasuri na luve i Malikaia na ka a tukuna o Jeremaia vei ira na tamata.

² E a tukuna vei ira ni a kaya na Turaga o Jiova. Na tamata yadua ena tiko ga ena koro oqo ena mate ena i valu, viakana, se ena mate ca. Ia, o koya ena lako yani ka soli koya vei ira na kai Papiloni ena sega ni vakamatei, ena drotaka wale ga na nona bula ka na vakabulai.”

³ E a tukuna talega vei ira o Jeremaia ni a kaya o Jiova, “Au na solia na koro oqo ki na mataivalu i tui Papiloni me na vakadruka.

⁴ Ia era a qai kaya na vakailesilesi vua na tui, “Na tamata oqo sa dodonu me vakamatei. Sa vakarerei ira na sotia ena nona vosa tiko vakaoqo ka vakarerei ira kece talega sa vo tu ena koro oqo. Na tamata oqo sa sega ni via vukei ira na tamata, sa vakacacani ira ga.”

⁵ A qai kaya o Setekaia, “Sa vinaka, ni cakava ga na ka o ni via cakava vua; au sa sega ni rawa ni tarovi kemuni.”

⁶ Era a qai tauri Jeremaia ka biuti koya ena i keliwai i Malakai na luvenitui ka tiko ena lomanibai ni vale ni veivesu. Era a tukuci koya sobu ena dali. A maca tu na i keliwai, e a tu ga kina na qele lolobo, ka tu lobo tu o Jeremaia ena qele lolobo.

⁷ Ia o Epetimeleki na kai Eciopea, e dua na enuki ka cakacaka tiko ena valenitui, a sa rogoca ni ra a biuti Jeremaia ki na i keliwai. Ena gauna o ya, a sa caka veilewai tiko na tui ena Matamata i Penijamini.

⁸ A lako yani o Epetimeleki mai na valenitui ka kaya vua na tui,

⁹ Kemuni saka na turaga na tui, na ka era cakava na tamata oqo e cala. Era sa biuti Jeremaia ki na i keli ka na mate dina kina ena viakana. Sa sega tale na kakana e vo ena koro.”

¹⁰ A qai vakaroti Epetimeleki na tui me kauta e lewe tolu na tamata era tiko e kea me ra la'ki dreti Jeremaia cake mai na i keli ni bera ni mate.

¹¹ A kauti ira yani na tamata o Epetimeleki ki na sitoa, ena valenitui ka kauta mai kina eso na i sulu makawa ka biuta sobu vei Jeremaia ena dali ki na i keli.

¹² A qai kaya o Epetimeleki vei Jeremaia, “Biuta na i sulu ena kirikiriwamu me i vakadakoba ni dali.” A sa vakayacora vakakina o Jeremaia,

¹³ era sa qai dreti koya cake mai na i keli. Ni oti oqo, a mai biu tiko o Jeremaia ena lomanibai ni vale ni veivesu.”

Kere i Vakasala o Setekaia

¹⁴ A talatala o Setekaia me kau mai vua o Jeremaia ena i katolu ni katuba ena Valenisoro. A sa kaya na tui vei Jeremaia, “Au na taroga e dua na taro vei iko, ka'u sega ni vinakata mo vunitaka e dua na ka vei au.”

¹⁵ A sa kaya o Jeremaia vei Setekaia, “Kevaka au tukuna vei iko o na vakamatei au, se sega? Ia kevaka au soli vakasala vei iko, o na sega ni rogoci au.”

¹⁶ A mai bubului vuni yani o Setekaia na tui vei Jeremaia. A sa kaya, “Me vaka sa bula na Turaga o Jiova o koya a solia vei keda na bula, au na sega ni vakamatei iko, ka'u na sega talega ni soli iko vei ira na tamata era via vakamatei iko.”

¹⁷ A qai tukuna o Jeremaia vei Setekaia ni a kaya o Jiova ni lewevuqa, na nodra Kalou na Isireli, “Kevaka o ni na soro vei ira na vakailesilesi i tui Papiloni, ena maroroi na nomuni bula, ka na sega ni vakamai na koro oqo. Oi kemuni kei na nomuni vuvale o ni na vakabulai.

¹⁸ Ia kevaka o ni na sega ni soro, sa na soli na koro oqo ki na ligadra na kai Papiloni, ka ra na vakama; ia o ni na sega ni dro bula rawa mai vei ira.”

¹⁹ A qai kaya o Setekaia, “Au sa rerevaki ira na Jiu era sa vuki vei ira na kai Papiloni. De'u na vagolei vei ira, era na qai vakararawataki au.”

²⁰ A qai kaya o Jeremaia, “O ni na sega ni soli vei ira. Au vakamasuti kemuni mo ni muria na vosa i Jiova me vaka au a tukuna oti vei kemuni; ena qai lako vakavinaka na veika kece vei kemuni ka na maroroi na nomuni bula.

²¹ A sa vakaraitaka vei au o Jiova ena raivotu na ka ena yaco vei kemuni kevaka o ni bese ni soro.

²² Raica! O ira kece sara na yalewa ni Juta era sa vo ena valenitui, era sa kau vei ira na vakailesilesi ni tui Papiloni. Rogoca mada na ka era kaya ni ra a lako. Era a vakacala na tui na nona i tokani vinaka, Ni ra sa vakatulewa vakataki ira ga. Ia oqo sa lobo na yavana ena soso ka ra sa laivi koya na nona i tokani.”

²³ Era na kau na watimuni kece kei ira na luvemuni vei ira na kai Papiloni, oi kemuni talega o ni na sega ni dro bula mai vei ira. Ena kauti kemuni vakavesu o tui Papiloni, ka na vakama yavu sara na koro oqo.”

²⁴ A qai kaya o Setekaia, “Mo kakua sara ni vakatakila vua e dua na tamata na veivosaki oqo, o na qai sega ni vakamatei.

²⁵ Kevaka era kila na vakailesilesi ni'u a vosa vei iko, era na la'ki taroga vei iko na ka e daru a veivosakitaka. Era na yalataka, ni ra na sega ni vakamatei iko kevaka o na tukuna vei ira na veika kece daru a veivosakitaka.

²⁶ Ia mo tukuna vei ira ni o a vakamasuti au me'u kakua ni talai iko lesu tale ki na vale i Jonacani ka la'ki mate kina.”

²⁷ Era a qai lako kece na vakailesilesi vei Jeremaia. Ni ra tarogi koya, e a qai sega tale ni dua na ka era cakava rawa, baleta ni a sega ni dua e rogoca na veivosaki.

²⁸ A biu tikoga o Jeremaia ena lomanibai ni vale ni veivesu me yacova na siga a vakadrukai kina na koro.