Jeremaia 37 - Vakavakadewa Vou kei na iVola tale eso

Kerekere i Setekaia

¹ A lesi Setekaia na luve i Josaia o Nepukanesa na tui Papiloni me tui e Juta me i sosomi kei Jo-akini na luve i Jo-akimi.

² Ia o Setekaia vata kei ira na nona vakailesilesi kei ira na tamata era sega ni muria na vosa ni Turaga o Jiova a tukuna o Jeremaia na parofita.

³ Ia a mani talai rau o Jiukali na luve i Selemaia, kei Sefanaia na luve i Maseia na bete o Setekaia me rau lako vei Jeremaia na parofita ka kaya vua, “Ni yalo vinaka mo ni masulaki keimami vei Jiova na Kalou.”

⁴ E a veilakoyaki voli ga o Jeremaia vei ira na tamata ka sega ni biu ki na vale ni veivesu.

⁵ Ena gauna vata o ya, a ra sa biuti Ijipita mai na mataivalu nei tui Ijipita, ia ni ra sa rogoca oqo na kai Papiloni ka ra kabai Jerusalemi tiko, era sa mani vakasuka tani mai kea.

⁶ A sa qai kaya vei Jeremaia na parofita o Jiova, na nodra Kalou na Isireli,

⁷ Tukuna vua na tui Juta, o koya e talai kemudou mai mo dou mai tarogi au, ‘Na mataivalu i tui Ijipita sa lako tiko mai me vukei iko ena lesu tale ki Ijipita.

⁸ Ia era na qai lesu tale mai na kai Papiloni. Era na mai valuta na koro; era na taura vakaukauwa ka vakama.”

⁹ A sa kaya o Jiova, “Mo ni kakua ni vakacalai kemuni ena nomuni sa nanuma ni ra na sega ni lesu tale mai na kai Papiloni, era na lesu dina ga mai.

¹⁰ Kevaka sara mada ga o ni vakadruka na mataivalu kece ni Papiloni e samuti kemuni ka ra qai vo ga e vica na tamata era a davo vuetaki kece tu ena nodra valelaca, e ratou na tucake tale na tamata oqori ka vakama na koro oqo.”

¹¹ Era a vakasuka na mataivalu ni Papiloni mai Jerusalemi baleta ni ra sa voleka mai na mataivalu i tui Ijipita.

¹² A cavutu o Jeremaia me biuti Jerusalemi me lako ki na vanua i Penijamini me la'ki taukena na nona i votavota ni vanua vei ira na kai nona.

¹³ Ia ni yaco yani ki na matamata i Penijamini, e a yadra tiko e kea o Irijia na nodra i liuliu na yadra, a tarovi Jeremaia ka kaya vua, “O sa tovata li kei ira na kai Papiloni?”

¹⁴ A qai kaya o Jeremaia, “A sega ni ka dina oqori, au sa sega ni vuki vei ira na kai Papiloni.” A sega ni via rogoci koya o Irijia. A vesuki Jeremaia ka kauti koya vei ira na vakailesilesi.

¹⁵ A kanakuita ka mai sogo tu yani ena vale i Jonacani na vunivola. E a caka na nona vale me vale ni veivesu.

¹⁶ A biu o Jeremaia ena dua na vale ni veivesu ena loma ni qele, ka maroroi tiko e kea me dua na gauna balavu.

¹⁷ A lewa o Setekaia na tui me kau mai vua o Jeremaia, ka mai vakatarogi koya vuni ena valenitui, “E bau dua li na i tukutuku mai vei Jiova?” A qai kaya o Jeremaia, “Sa tiko oqo,” a vakuria tale, “O na soli yani ki na ligana na tui Papiloni.”

¹⁸ Ia a qai taroga o Jeremaia, “Na cala cava au sa cakava vei kemuni, se vei ira na nomuni vakailesilesi, se vei ira na tamata oqo ka vakavuna na nomuni biuti au ki na vale ni veivesu?

¹⁹ Sa e vei na nomuni parofita era a tukuna vei kemuni ni ra na sega ni samuti kemuni o tui Papiloni kei na vanua oqo?

²⁰ Ia oqo kemuni na turaga na tui, au kerea mo ni rogoca na noqu kerekere malumalumu. Ni yalo vinaka ni kakua ni vakatalai au lesu tale ki na vale i Jonacani na vunivola, de'u na qai la'ki mate e kea.”

²¹ A qai vakarota o Setekaia me biu o Jeremaia ena lomanibai ni vale ni veivesu, ka dau soli tiko vua e dua na i buli madrai ena dua na siga mai vei ira na daubuli madrai me yacova ni oti kece sara na madrai ena koro. A biu tikoga o Jeremaia ena lomanibai ni vale ni veivesu.