Jeremaia 36 - Vakavakadewa Vou kei na iVola tale eso

Wiliki na i Vola Vivigi

¹ Ena i ka va ni yabaki e a tui kina o Jo-akimi na luve i Josaia e Juta, a tukuna kina vei Jeremaia, na Turaga o Jiova,

² Taura mai e dua na i vola vivigi ka vola kina na veika kece sara au tukuna me baleti Isireli kei Juta ka vakakina na veimatanitu kecega. Vola na veika kece sara au a tukuna vei iko me tekivu mai na i matai ni gauna au a vosa kina vei iko ena gauna a tui tiko kina o Josaia me yacova mai na gauna oqo.

³ De ra na rogoca na lewe i Juta na veivakarusai kece au nakita me'u vakayacora vei ira era na qai gole tani kece mai na nodra i tovo ca. Ia au na qai vosoti ira mai na nodra caka cala kei na nodra i valavala ca.”

⁴ A mani kacivi Baruki yani na luve i Neria o Jeremaia, ka tukuna vua me vola ena i vola vivigi ni a cavuqaqataka tiko na vosa kece sara a tukuna vua o Jiova.

⁵ Ia a mai tukuna yani vei Baruki o Jeremaia na veivakaro oqo, “Au na sega ni vakatarai me'u lako ki na Valenisoro.

⁶ Ia au vinakata mo lako ki kea ena gauna era na lolo tale kina na tamata ka wilika sara e cake na i vola vivigi me ra na rogoca kina na veika kece a tukuna vei au o Jiova ka'u a cavuqaqataka vei iko mo vola. Mo la'ki cakava na ka oqo ena vanua e rawa me ra rogoci iko kece kina, ka vakakina o ira na lewe i Juta era lako mai ena nodra dui veikoro.

⁷ De ra sa na qai masu vei Jiova ka gole tani mai na nodra i tovo ca, ni sa vunauci ira na tamata oqo o Jiova ena nona cudru rerevaki kei na rarawa.”

⁸ A mani wilika yani na vosa ni Turaga o Baruki ena Valenisoro me vaka na ka a tukuna vua o Jeremaia.

⁹ Ena i kaciwa ni vula ni kalima ni yabaki a tui kina e Juta o Jo-akimi na luve i Josaia, era sa vakayacora tale na tamata e Jerusalemi kei ira era lako mai na veikoro e Juta e dua na lolo me yalo vinaka kina o Jiova,

¹⁰ Ia ni ra a vakarorogo kece sara tu ga na tamata, a sa qai wilika mai na i vola vivigi o Baruki na veika kece sara a tukuna o Jeremaia. A cakava na ka oqo ena Valenisoro ena rumu i Kemaria na luve i Sefana na vunivola. E tiko na nona rumu ena i tabavale e cake ena matamata vou ni valenisoro.

Vola Vivigi vei ira na Vakailesilesi

¹¹ A rogoca o Mikaia na luve i Kemaria ka makubui Sefana ni sa wilika o Baruki mai na i voli vivigi na ka a tukuna o Jiova.

¹² A mai lako yani ki na valenitui, ena nona rumu na vunivola; era soqo kece tiko e kea na vakalesilesi. O Elisema na vunivola, o Telaia na luve i Semaia, o Elinacani na luve i Akape, o Kemaria na luve i Sefana, o Setekaia na luve i Anania kei ira na vo ni vakailesilesi.

¹³ A tukuna vei ira o Mikaia na ka kece a rogoca ni wilika o Baruki vei ira na tamata.

¹⁴ Ia era a qai talai Jeuti na vakailesilesi, o Jeuti na luve i Necanaia, na makubui Selemaia, na makubui Kusi vakarua me la'ki tukuna vei Baruki me kauta mai na i vola vivigi e a wilika vei ira na tamata. A mai kauta yani o Baruki na i vola vivigi ka lako vei ira.

¹⁵ Era a qai kaya vua, “Mo tiko sobu ka wilika na i vola vivigi vei keimami.” A sa wilika o Baruki na i vola vivigi vei ira.

¹⁶ Ia ni a wiliki oti, era a veiraiyaki ena rere ka kaya vei Baruki, “Tukuna na ka oqo vua na tui.”

¹⁷ Era a qai tarogi koya, “Sa dodonu, tukuna mada vei keimami se o vola vakacava na veika kece oqo? A cavuqaqataka tiko o Jeremaia o a qai vola?

¹⁸ A qai kaya o Baruki, “Sa cavuqaqataka toka mai o Jeremaia na veika kece sara, au a qai vola ki na i vola vivigi ena wai ni volavola.

¹⁹ Era a qai kaya vua. Sa dodonu mo drau lako kei Jeremaia ka vunitaki kemudrau. Drau kakua sara ni tukuna vua e dua, na vanua o drau tiko kina.

Vakamai na i Vola Vivigi

²⁰ Era a biuta tu na i vola vivigi ena rumu i Elisama na vunivola ka lako ki na nona lomanibai na tui ka tukuna vua na tui na ka kecega.

²¹ E a qai talai Jeuti na tui ka la'ki kauta mai na i vola vivigi. A la'ki kauta mai o koya ena rumu i Elisama ka mai wiliki vua na tui ka ra tu wavokiti koya kece tu na vakailesilesi.

²² Oqo a donuya tiko na gauna ni batabata, ka dabe tiko na tui ena nona i tikotiko ena vula i batabata, o ya na i kaciwa ni vula; ka tu e matana e dua na miqa ka waqa tu kina na buka.

²³ Ni wilika oti ga e tolu se va na kena i wasewase o Jeuti, a musuka tani na tui ena dua na i sele lailai ka kolotaka sara ki na buka. A cakava tiko na ka oqo me yacova ni a kama taucoko sara na i vola vivigi.

²⁴ Ia a sega ni bau rere se vakaraitaka e dua na i vakatakilakila ni veivutuni na tui kei ira kece na nona vakailesilesi era sa rogoca na veivosa kece sara oqo.

²⁵ E dina ga e ratou a vakamasuta na tui o Elinacani, Delai vata kei Kemaria me kakua ni vakama na i vola vivigi, a sega sara ni via rogoci iratou.

²⁶ A qai vakaroti Jiramieli na luvenitui, kei Seraia na luve i Asirieli vata kei Sememia na luve i Apitieli me ratou vesuki Jeremaia na parofita kei Baruki na nona vunivola. Ia a vunitaki rau o Jiova.

Dua Tale na i Vola Vivigi

²⁷ Ni a vakama oti na tui na i vola vivigi a vola o Baruki ni a cavuqaqataka vua na kena vosa o Jeremaia, a tukuna na Turaga o Jiova vei Jeremaia,

²⁸ me taura e dua tale na i vola vivigi ka vola kina na veika kece sara e a volai tu ena i vola vivigi a vakama oti na tui.

²⁹ A tukuna vua o Jiova me tukuna vei Jo-akimi na tui, “O sa vakama na i vola vivigi, baleta ni sa volai kina ni na lako mai na tui Papiloni ka vakarusa na vanua oqo, ka vakamatei ira na kena i taukei kei na kena manumanu.

³⁰ Ia, oqo a kaya o Jiova me baleti Jo-akimi. A sega tale ni dua na nona kawa me na tiko ena i tikotiko vakatui i Tevita. Na yagona ena kolotaki tu me cilava na matanisiga ena siga ka na lutuma na tegu cevata ena bogi.

³¹ Au a totogitaki koya vata kei ira na nona kawa ena vuku ni nodra i valavala ca. Au na kauta mai vei ira, kei ira na lewe i Juta na veika ca kece au sa tukuna vei ira, ia era a sega ni via rogoca.

³² Ia a qai taura o Jeremaia e dua tale na i vola vivigi ka solia vei Baruki na nona vunivola, a vola o koya na veika kece sara a kacivaka tiko vua o Jeremaia. A vola kina o koya na veika taucoko sara e a volai tu ena i vola vivigi a vakama na tui o Jo-akimi ena buka. A vakuria talega o Jeremaia e vuqa sara na ka era via tautauvata.