Jeremaia 34 - Vakavakadewa Vou kei na iVola tale eso

Tukutuku vei Setekaia

¹ A sa vosa vei Jeremaia na Turaga o Jiova ena gauna e a samuti Jerusalemi tiko kina kei na kena veikoro voleka o Nepukanesa na tui Papiloni, na veimataivalu kece ni veivanua kei na veimatanitu era qali tu vua.

² A sa kaya o Jiova na nodra Kalou na Isireli vei Jeremaia me lako ka tukuna vei Setekaia na tui Juta. “Raica au na solia na koro vua na tui Papiloni ka na vakama ena bukawaqa.

³ O na sega ni dro tani rawa mai vua. O na vesu ka soli ki na ligana. O na raica sara na matana o na veivosaki kaya; ia o na qai kau ki Papiloni.

⁴ Mo rogoca mada na ka sa kaya o Jiova me baleti iko Setekaia na Tui Juta. O na sega ni mate ena i valu.

⁵ O na mate ena galala; me vaka na kena vakamai na ka boi vinaka ena nodra buluti ira na nomu qase era a tui e liu vei iko, era na vakama vakakina na ka boi vinaka vei iko. Era na tagicaki iko ka kaya, ‘Sa bale na neimami tui.”

⁶ Ia a la'ki tukuna o Jeremaia na veika kece oqo vei Setekaia na tui mai Jerusalemi,

⁷ ena gauna era samuta tiko kina na koro o Jerusalemi na mataivalu nei tui Papiloni. Era sa kabai Lakisi kei Aseka tale tikoga na mataivalu ka sai rau ga na koro vakabai sa vo e Juta.

⁸ Ni oti ga na nona vakayacora e dua na veiyalayalati na tui o Setekaia vata kei ira na lewe i Jerusalemi me na sereki ira na nodra dui bobula,

⁹ era sa vakadonuya me ra dui sereka na tamata yadua na dui kai Iperiu e nodra bobula, na tagane kei na yalewa.

¹⁰ Era sa vakayacora na tamata kece kei ira na nodra turaga na veiyalayalati ka ra sereki ira na nodra bobula ka kakua ni vakabobulataki ira tale,

¹¹ ia e muri era veisautaka tale na lomadra ka ra tauri ira lesu ka vakabobulataki ira tale.”

¹² A qai vosa tale vei Jeremaia o Jiova,

¹³ Au a cakava e dua na veiyalayalati ena gauna au a kauti ira tani mai kina mai Ijipita ka sereki ira mai na nodra vakabobulataki. Au a tukuna vei ira,

¹⁴ Ni oti e yavitu na yabaki me ra qai sereki ira na Iperiu yadua e a volitaki vei ira ka qaravi ira ena ono na yabaki. Ia era a sega ni vakarorogo vei au na nomuni qase se muria na noqu vosa.

¹⁵ O ni a qai veisautaka wale ga oqo na lomamuni ka cakava na ka e vinaka vei au. O ni a vakadonuya kece mo ni sereki ira na nomuni tokani Iperiu, ka cakava e dua na veiyalayalati e mataqu ena Valenisoro a tara ena yacaqu.

¹⁶ Ia o ni a veisautaka tale na lomamuni ka vakaboicataka na yacaqu. O ni a kauta lesu kece tale na dui nomuni bobula o ni a sereki ira me vaka era a vinakata, ia o ni a vakabobulataki ira tale.”

¹⁷ O koya oqo a kaya tale kina o Jiova, “O ni sa sega ni solia vei ira na nomuni tokani Iperiu me ra galala. Sa vinaka, au sa na solia vei kemuni na galala; na galala mo ni mate ena i valu, mate ca kei na viakana. Au na cakava me ra rere na veimatanitu kecega e vuravura ena ka kecega au na cakava vei kemuni.

¹⁸ O ni sa sega ni kauwaitaka na noqu veiyalayalati ka sega ni vakayacora na kena i vakarau o ni sa vakadonuya. Au na cakava mo ni vaka na luve ni bulumakau e vakayagataki me ka ni veiyalayalati; era na musu rua me vaka na kena musuki rua na luve ni manumanu ni sa lakovi na kena veimama ni sa vakayacori na veiyalayalati.

¹⁹ Io, au na seleti ira rua vata kei ira na vakailesilesi ena valenitui, ira na bete kei ira kece na lewe ni vanua.

²⁰ Au na soli ira ki na ligadra na kedra meca kei ira era via vakamatei ira ka ra na kania na yagodra na manumanu vuka kei na manumanu kila.

²¹ Au na soli Setekaia na tui Juta kei ira na nona vakailesilesi vei ira na kedra meca, ka era via vakamatei. Au na soli ira ki na mataivalu i tui Papiloni ka ra sa vakasuka mai vei kemuni.

²² Au na vakarota ka ra na lesi mai ki na koro oqo. Era na samuta ka vakadruka, ka ra na vakama. Au na cakava na veikoro e Juta me vaka na vanua lala e sega ni dua e bula kina.”