Jeremaia 33 - Vakavakadewa Vou kei na iVola tale eso

Yalayala ni Vakanuinui

¹ A sa yaco tale mai vei Jeremaia na vosa i Jiova ena i karua ni gauna, ni a sogo tiko ena valeniveivesu.

² A sa kaya o Jiova, o koya ka bulia na vuravura ka sa vakataudeitaka; o Jiova na yacana.

³ Mo kaci mai vei au, ka'u na rogo yani vei iko, ka'u na tukuna vei iko na veika talei ka veivakurabuitaki o se sega ni bau kila.

⁴ Oi au, o Jiova, na nodra Kalou na Isireli, sa kaya vakaoqo ni na talaraki sobu na i tikotiko e Isireli kei na i tikotiko vakatui e Juta ena vuku ni buku druadrua kei na kaba vakaivalu.

⁵ Eso era na valuti ira na kai Papiloni, ka ra na vakasinaita na koro ena yago ni mate ni tamata ka'u na mokuta mate ena noqu cudru kei na rarawa. Au sa vakanadakuya na koro oqo baleta na veika ca era sa vakayacora na lewena.

⁶ Ia au na vakabula tale ka vakavinakataka na koro oqo. Au na vakabulai ira na kena i taukei ka vakaraitaka vei ira na marau ni sautu kei na tiko galala.

⁷ Au na vakasuka tale mai na nodra tiko vinaka, kalougata, ka tiko marau na lewe i Juta kei ira na Isireli, ka'u na tarai ira cake tale me vaka e liu.

⁸ Au sa vakasavasavataki ira mai na nodra i valavala ca era a cakava vei au; ka'u na vosota na nodra i valavala ca kei na nodra talaidredre.

⁹ O Jerusalemi ena vu ni noqu matanitu kecega e vuravura ni ra na rogoca na veika vinaka au na vakayacora vei ira na lewe i Jerusalemi, na toro cake kei na tiko sautu au a cakava ena koro.

¹⁰ A sa kaya o Jiova, “Era sa kaya na tamata ni sa vaka na vanua lala na vanua oqo; sa sega ni dua na tamata se manumanu me bula kina. Ia era sa dina na veikoro vaka-Juta kei na veisala ni koro o Jerusalemi sa lala tu ga ka sega na tamata se manumanu e bula kina.

¹¹ Ena rogo tale ena veivanua oqo na domo ni reki kei na marau, na domo ni yalewa kei na tagane sa qai vakawati. Ena rogo talega na domodra na tamata era laga sere ni ra kauta mai na nodra i soro ni vakavinavinaka ki na noqu Valenisoro, ka ra na kaya, ‘Me vakavinavinakataki na Turaga Kaukauwa, Baleta ni sa rui vinaka, Ka sa tawa mudu na nona loloma.’ Au na cakava tale me sautu ka toro cake na vanua oqo me vaka e liu.”

¹² A sa kaya tale o Jiova ni lewevuqa, “Ena vanua sa lala tu oqo ka sa sega ni bula kina e dua na manumanu kei na kena veikoro kece sara, ena kune kina na veico me ra vakania tale na nodra sipi na i vakatawanisipi.

¹³ Era na wilika tale na nodra sipi na i vakatawa ena veikoro ena veidelana, ena buca, ena veikoro vaka ki na ceva, ena vanua i Penijamini, ena veivanua wavokiti Jerusalemi kei na veikoro e Juta.

¹⁴ Ena yaco mai na gauna au na vakayacora kina na ka au a yalataka vei ira na Isireli kei ira na kai Juta.

¹⁵ Ena veisiga kei na gauna o ya au na vakatubura tale kina e dua na kawa i Tevita, ena vakayacora na ka dina kei na ka dodonu ena loma ni vanua taucoko.

¹⁶ Ni sa na yaco mai na gauna o ya, era na vakabulai na lewe i Jerusalemi. Ena vakatokai na nodra vanua kei na nodra koro me yacana ‘Sa vakabulai keda o Jiova.’

¹⁷ Ena sega sara ni mudu e dua na kawa i Tevita me tui e Isireli,

¹⁸ ka ra na bete tikoga na kawa i Livai me ra vakacabora na veisoro kama, na veisoro laukana, kei na veisoro tale eso.”

¹⁹ A sa kaya tale vei Jeremaia o Jiova.

²⁰ Ena sega ni voroki rawa na noqu veiyalayalati me baleta na kena yaco na siga kei na bogi ka me na sega kina ni yaco na siga kei na bogi ena kena gauna dodonu.

²¹ Ena vakakina na kena sega ni voroki rawa na noqu veiyalayalati vata kei Tevita, me kakua kina ni tui e dua na nona kawa, kei na noqu veiyalayalati vata kei ira na bete mai na mataqali i Livai o ira era qaravi au.

²² Au na vakalewevuqataka na kawa i Tevita na noqu dauveiqaravi, kei na kedra i wiliwili na bete mai na mataqali i Livai era qaravi au ka sega ni rawa ni da wiliki ira me vaka na kena sega ni wiliki rawa na kalokalo ni lomalagi se na mata ni nuku ni matasawa.”

²³ A sa kaya tale vei Jeremaia o Jiova,

²⁴ O sa bau kila li na ka era kaya na tamata baleta ni'u sa biuti Isireli kei Juta na vuvale e rua au a digitaka? Era sa beci ira kina na noqu tamata ka sega ni okati ira tale me dua na matanitu.

²⁵ Ia kevaka au a sega ni bulia na veiyalayalati me baleta na kena yaco mai na siga kei na bogi ka sega ni vakadeitaki e dua na i vakarau tudei me baleta na vuravura kei na lomalagi,

²⁶ au sa na qai biuti ira na kawa i Tevita na noqu dauveiqaravi, ka'u na sega ni digitaka e dua na kawa i Tevita me liutaki ira na kawa i Epara-ama, Aisake kei Jekope. Au na vakalesuya tale mai na nodra kalougata na noqu tamata, ka lomani ira ena yalo loloma.”