Jeremaia 32 - Vakavakadewa Vou kei na iVola tale eso

Voli Vanua o Jeremaia

¹ A sa vosa vei Jeremaia na Turaga o Jiova ena i katini ni yabaki sa tui kina e Juta o Setekaia, o ya talega na i katini kawalu ni yabaki i Nepukanesa mai Papiloni.

² Ena gauna oqo era a samuti Jerusalemi tiko kina na mataivalu ni tui Papiloni, ka sogo tiko o Jeremaia na parofita ena vale ni veivesu ena valenitui.

³ A sogoti koya e kea o Setekaia na tui ni a beitaki koya ena nona kacivaka ni a kaya o Jiova, “Au na solia na koro oqo vua na tui Papiloni ka sa na taura.

⁴ Ena sega sara ni dro rawa o Setekaia mai na ligadra na kai Papiloni. Ena soli yani o koya vua na tui Papiloni; e rau na veivosaki sara ka raici koya ena matana dina.

⁵ Sa na kau yani o Setekaia ki Papiloni ka na tiko ga mai kea me yacova ni'u sa qai sikovi koya tale. Kevaka ena vala kei ira na kai Papiloni ena sega ni qaqa.”

⁶ A sa kaya o Jeremaia, “Sa kaya vei au na Turaga o Jiova,

⁷ ni lako mai vei au o Anameli, na luve i Salumi na vugoqu ka kerei au me'u volia na nona tiki ni vanua mai Anacoci, baleta ni sai au na wekana voleka, ka tu vei au na kena dodonu vakaveivoli me'u volia.

⁸ A mani yaco na ka a kaya vei au o Jiova, a lako mai na tavalequ o Anameli ki na vale ni veivesu ka mai kaya vei au, ‘Mo volia mada na noqu tiki ni vanua mai Anacoci ka tiko ena vanua i Penijamini. Sa i iko na wekaqu voleka duadua ka tu vei iko na kena dodonu vakaveivoli mo volia ka maroroya. Mo volia me nomu.” Ia au a sa kila ni a sa vakaroti au o Jiova me'u volia.

⁹ Au a mai volia yani na vanua vei Anameli ka vakarautaka vua na i lavo me nona; na kena i sau e tini kavitu na tiki ni siliva.

¹⁰ Au a mai vola yani na kena i vola, tabaka yani na yacaqu ka dregata; au a kaciva eso na tamata me ra vakadinadinataka ka vakarautaka na i lavo ena i vakarau.

¹¹ Au sa mai taura yani na i vola ruarua ni veiyalayalati vakaveivoli, na kena ka dregati me ka ni veiyalayalati kei na kena i vakarau vata kei na kena e sega ni dregati,

¹² ka solia ruarua vei Baruki na luve i Neria na makubui Maseia. Au a solia ruarua vua ena mata i Anameli, ena matadra na i vakadinadina era vola na yacadra ena i vola vakadinadina ni veivoli kei ira kece na Jiu era dabe tiko ena lomanibai ni vale ni veivesu.

¹³ Au a mai kaya yani vei Baruki ena matadra kecega,

¹⁴ Sa vakaroti iko na Turaga Qaqa o Jiova ni Lewe vuqa na nodra Kalou na Isireli mo tauri rau na i vola vakadinadina oqo, na i vola vakadinadina ni veivoli dregati kei na kena ka sega ni dregati ka biuti rau ena loma ni dua na saqa me na maroroi kina ena dua na gauna balavu e muri.

¹⁵ Ni kaya na Turaga Qaqa o Jiova ni lewevuqa na nodra Kalou na Isireli, na vale, na vanua kei na veiwere ni vaini ena vanua oqo ena voli tale.”

Masu i Jeremaia

¹⁶ Ni'u sa solia oti na i vola vakadinadina ni veivoli vei Baruki na luve i Neria, au a mai masu yani.

¹⁷ Kemuni na Turaga na Kalou, sai kemuni o ni a bulia na vuravura kei na lomalagi ena nomuni kaukauwa levu kei na nomuni qaqa; ka a sega ni dua na ka e dredre vei kemuni.

¹⁸ O ni sa vakaraitaka na nomuni loloma tawa yalani vei ira e udolu vakaudolu, ia o ni sa totogitaki ira talega na tamata ena vuku ni nodra i valavala ca na tamadra. Sa i kemuni na Kalou levu qaqa; ka sa yacamuni o Jiova ni lewevuqa.

¹⁹ O ni sa vuku ena lewa ka kaukauwa ena nomuni cakacaka; o ni sa raica na ka kecega era cakava.

²⁰ Ni a vakaraitaka na veivakatakilakila kei na veika veivakurabuitaki ena vanua o Ijipita kei na vanua o Isireli ena gauna oqo vei ira na mata tamata ka o ni a vakarogoya na yacamuni ka yacova mai na siga edaidai.

²¹ O ni a kauti ira mai na Isireli na nomuni tamata mai na vanua o Ijipita ena veivakatakilakila kei na veika veivakurabuitaki ena dua na liga kaukauwa sa dodo tu ka vakarerevaki.

²² O ni sa solia vei ira na vanua bulabula ka vinaka oqo me vaka o ni a yalataka vei ira na nodra qase.

²³ Ia ni ra sa lako mai ki na vanua oqo ka ra mani taukena, era sa sega ni muria na nomuni vakaro se talairawarawa ki na nomuni vakavuvuli; era sa sega ni vakayacora e dua na ka o ni sa vakarota me ra cakava. O koya oqo o ni sa kauta mai kina na veivakarusai kece oqo vei ira.

²⁴ Era sa viria cake na i kabakaba na kai Papiloni ka binia cake na qele wavokita na koro me ra vakamalumalumutaka, ka ra samuta sara tikoga. Na i valu, na viakana kei na mate ca ena vakavuna na kena soli na koro ki ligadra. Kemuni Turaga o ni sa raica ni sa yaco na ka kece sara o ni a tukuna.

²⁵ Ia, kemuni Turaga na Kalou, sai kemuni ga o ni a tukuna vei au me'u volia na vanua ena matadra na i vakadinadina, veitalia ga ni ra sa vakarau vakadruka na koro na kai Papiloni.”

²⁶ Ia a qai kaya o Jiova vei Jeremaia,

²⁷ Raica, oi au o Jiova na nodra Kalou na tamata kecega. E sega sara ni dua na ka e dredre vei au me'u cakava.

²⁸ Ia oqo, au sa na solia na koro oqo vei Nepukanesa na tui Papiloni kei na nona mataivalu, ka sa na samuta.

²⁹ O ira na kai Papiloni era samuta tiko oqo na koro era na lako mai ka vakama ena buka. Era na vakama yavu vata kei na veivale era sa vakacudrui au kina na tamata ena nodra vakama na ka boi vinaka vei Peali ena delavuvu ni nodra vale na i soro liviraki vei ira na veikalou tani.

³⁰ Mai na i vakatekivu ni kedra i tukutuku era cakava wale tikoga na veika au sega ni taleitaka, o ira na Isireli kei ira na Juta. Era a vakacudrui au na Isireli ena veimatakau era a cakava.

³¹ Na koro oqo sa vakavuna na noqu cudru kei na noqu rarawa mai na gauna a sa qai tauyavutaki kina. Au a mani nakita me'u vakarusa vakadua.

³² Baleta na veika ca era cakava na lewe i Isireli kei Juta vata kei ira na nodra tui, nodra turaga, nodra bete, nodra parofita kei ira na kai Juta kei Jerusalemi.

³³ Era na gole tani ka vakanadakui au; e dina au na ia tikoga na vakatavulici ira, era sa sega ni via rogoca se via vakadodonutaki.

³⁴ Era sa bau vakacuruma na veimatakau au cata ena Valenisoro ka a tara ena yacaqu, ka ra sa vakadukadukalitaka.

³⁵ Era sa tara na veicabocabonisoro vei Peali ena Buca o Inomi me ra vakacabora kina na luvedra tagane kei na luvedra yalewa vua na kalou o Moloke. Au a sega ni vakaroti ira me ra cakava na ka oqo, e a sega mada ga ni'u bau vakasamataka ni ra na cakava na ka vakasisila vakaoqo, ka vakavuna na nodra i valavala ca na lewe i Juta.”

Yalayala ni Vakanuinui

³⁶ A sa kaya o Jiova o Jiova na nodra Kalou na Isireli, ‘Jeremaia o a tukuna vei ira na tamata ni na soli na koro oqo ki na ligana na tui Papiloni ena i valu, na viakana kei na mate ca. Ia oqo mo rogoca tale mada na ka au a tukuna.

³⁷ Au na soqoni ira vata na tamata mai na veimatanitu kece sara au a vakasavi ira kina, ena noqu rarawa, na cudru, kei na yalo katakata, ka'u na kauti ira lesu mai ki na vanua oqo ka laiva me ra mai tiko ena galala.

³⁸ Ia era sa na qai noqu tamata ka'u na qai nodra Kalou.

³⁹ Au na solia vei ira na i naki ni bula e duabulu, o ya me ra dokai au ena veigauna kecega, me ra vinaka kina kei ira na nodra kawa.

⁴⁰ Au na qai cakava e dua na veiyalayalati tawa mudu kei ira: ena sega ni mudu na noqu vakayacora vei ira na veika vinaka ka vakavuna me ra gadrevi au ena yalodra ka ra na sega sara ni gole tani kina mai vei au.

⁴¹ Au na marautaka me'u cakava vei ira na ka vinaka ka na vakadeitaki ira ena vanua oqo me tawa mudu ena lomaqu kei na yaloqu taucoko.”

⁴² A sa kaya o Jiova, “Me vaka ga na noqu a kauta mai na veivakarusai vei ira na tamata oqo, au sa na kauta talega mai na veika vinaka au sa yalataka.

⁴³ Ena voli tale na veitiki ni vanua oqo, o ni kaya tiko ni vanua lala, ka na sega kina na tamata kei na manumanu, ka na soli ki na ligadra na kai Papiloni.

⁴⁴ Ena voli tale na veitiki ni vanua ena i lavo, ena tabaki na kena i vola ni veiyalayalati, dregati ka vakadinadinataki. Na ka oqo ena yaco ena vanua i Penijamini ena veikoro wavokiti Jerusalemi, ena veikoro kei Juta, na veikoro ena veiulunivanua, na veibuca kei na veikoro ena ceva. Au na vakalesui ira tale na tamata ki na nodra vanua.”