Jeremaia 31 - Vakavakadewa Vou kei na iVola tale eso

Lesu Tale na Isireli

¹ A sa kaya na Turaga o Jiova, “Ena yaco na gauna au na yaco kina me'u nodra Kalou na veimataqali kecega e Isireli.

² Au a vakaraitaka na loloma ena vanua dravuisiga vei ira na tamata era a drotaka mai na mate. Ena gauna era sa gadreva vakalevu kina na Isireli na vakacegu,

³ au a qai rairai vakayawa sara tu mai vei ira. Kemuni na Isireli, au a dau lomani kemuni, ia au a vakaraitaka tikoga vei kemuni na noqu loloma tawa yalani.

⁴ Ia oqo au na tarai kemuni cake tale vakadua. O ni na taura cake tale na nomuni vakatagi ka meke ena marau.

⁵ O ni na teivaka tale na nomuni veiwere ni vaini ena veidelana mai Samaria ka ra na kania na vuana o ira era tea.

⁶ Ia ena yaco mai na gauna era na kacivaka mai kina na yadra ena veidelana mai Ifereimi, ‘Me da cavutu ka lako cake ki Saioni, vei Jiova na noda Kalou.’ ”

⁷ A sa kaya o Jiova, “Ni sere ena marau ena vuku i Isireli, Ka vakatudomo vei ira na tui ni veimatanitu. Ni laveti koya, ka vunau, ka tukuna, “I Jiova, ni vakabulai ira na nomuni tamata, Na vo-ni-bula ni Isireli.”

⁸ Au na kauti ira mai cake, Vaka ki na vualiku Ka soqoni ira vata Mai na i yalayala kei vuravura Era sa lako vata mai Kei ira na lokiloki, Na mataboko, na yalewa bukete Kei ira na sa voleka ni vakasucu; Era sa lesu tale mai Me dua na matanitu levu.

⁹ Era na tagi lesu mai Na noqu tamata, Ka masu ni'u sa liutaki ira mai. Au na tuberi ira ki na veiuciwai sa drodro malua, Ena dua na sala vinaka Me ra kakua ni tarabe kina. Au sa vaka e dua na tama vei Isireli; Ka sa luvequ qase duadua o Ifereimi.”

¹⁰ Ni rogoca na vosa ni Turaga na veimatanitu Ka la'ki tukuna na noqu vosa Ki na veivanua yawa. Oi au, ka'u a vakasavi ira na Isireli, Au na soqoni ira vata tale Ka taqomaki ira Me vaka e dua na i vakatawanisipi sa taqomaka na qele ni nona sipi.

¹¹ Au na sereki ira na Isireli me ra galala, Ka vakabulai ira mai na dua na matanitu qaqa.

¹² Era na lako mai ka sere ena marau Ena Ulunivanua o Saioni, Ka ra na marautaka na veisolisoli ni Turaga Na vua ni sila, na waini, na waiwai, Na sipi kei na bulumakau. Era sa vaka e dua na i teitei sa vakasuasuataki vakavinaka, Ka ra sega tale ni kila na rarawa.

¹³ Era na qai meke na gone yalewa ena marau, Ka ra reki na tagane, Na qase kei ira na cauravou. Au na vakacegui ira Ka vukica na nodra tagi me marau, Kei na nodra rarawa me reki.

¹⁴ Au na vakamamautaki ira na bete Ena veikakana vinaka, Ka vakayacora Na veika kecega era vinakata na noqu tamata.”

Loloma i Jiova vei Isireli

¹⁵ A sa kaya tale na Turaga o Jiova, “E dua na domo sa rogo mai Rama, Na domo ni tagi yaso kei na qolou. Sa tagicaki ira na luvena o Raijieli, Ka bese ni vakacegui baleta ni ra sa yali.

¹⁶ Kakua ni tagi, Qusia tani na wai ni matamu. Na ka kece o cakava vei ira na luvemu, Ena sega ni rawa me na sega ni saumi; Ka ra na suka tani mai na nodra vanua na meca.

¹⁷ Sa tu na ka mo vakanuinui kina Ena nomu veigauna e muri. Era na lesu tale mai na luvemu Ki na nomu vanua.”

¹⁸ Au sa rogoca Ni ra kaya na Isireli ena nodra rarawa, ‘Kemuni na Turaga, Keimami sa vaka na bulumakau kila ka yalo kaukauwa, Ia o ni sa vakavulici keimami Me keimami talairawarawa. Kauti keimami lesu mai, Keimami na qai lesu mai; Ni sai kemuni na Turaga na neimami Kalou.

¹⁹ Keimami a gole tani mai vei kemuni, Ia e sega ni dede keimami sa via lesu tale yani. Ni oti na nomuni totogitaki keimami, Keimami a vakacuva na ulu i keimami ena rarawa. Keimami sa madua, Ka vakamaduataki Baleta ni keimami sai valavala ca vei kemuni.’

²⁰ I Isireli, Sa i iko na noqu gone ni toko, Na gone au lomana duadua vakalevu. Ena gauna kece sara au cavuta kina na yacamu, Au na dau nanumi iko ena loloma. Sa guti iko na lomaqu; Au na yalo loloma dina vei iko.

²¹ Vakaduria na veivakatakilakila Ka vakatakilakilataka na gaunisala, Vakasamataka vinaka na gaunisala o a lako kina. Kemuni na Isireli, ni lesu mai, Ni lesu mai ki na nomuni veikoro.

²² A cava so na kena dede Na nomuni lomaloma rua Na goneyalewa tawa vakabauta? Ni bulia tale na Turaga E dua na ka vou e vuravura; Sa yaco me kaukauwa e dua na yalewa malumalumu Me vaka e dua na tagane.”

Toro Cake na Tamata ni Kalou

²³ A sa kaya na Turaga o Jiova ni lewevuqa, na nodra Kalou na Isireli, “Ena gauna au sa na vakalesui ira tale kina na tamata ki na nodra vanua, era na kaya tale ena vanua o Juta kei na kena veikoro. ‘Me vakalougatataka o Jiova Na ulunivanua tabu mai Jerusalemi, Na tikina tabu sa tiko kina.’

²⁴ Era na tawani Juta na tamata kei na kena veikoro o ira na dauteitei kei ira na i vakatawanisipi kei na nodra qele ni sipi.

²⁵ Au na vakaukauwataki ira era sa malumalumu ka vakamamautaki ira era viakana.”

²⁶ A qai yadra o Jeremaia ka kaya, “Au a moce, ia au sa yadra mai ena kaukauwa vou.”

²⁷ A sa kaya o Jiova, “Ena yaco mai na gauna au na vakatawana tale kina na vanua o Isireli kei Juta ena tamata kei na manumanu.

²⁸ Ia me vaka ga na noqu qarauna me'u cavuta laivi, basuka sobu, talaraka, ka yanaraka, au na qarauna talega me'u na tea, ka tarai ira cake.”

²⁹ Ni sa na yaco mai na gauna o ya, era sa na sega tale ni kaya na tamata, ‘Era sa kania na vaini wiwi na qase, Ka sa wiwi se rara kina na batidra na luvedra.’

³⁰ Ia, me na yaco ga kina na tamata yadua sa kania na qerepi wiwi, sa na wiwi ga kina na batina vaka i koya; ka sa na mate na tamata yadua ena vuku sara ga ni nona i valavala ca.”

³¹ A qai kaya tale o Jiova, “Ena yaco mai na gauna au na cakava kina e dua na veiyalayalati vou kei ira na noqu tamata na Isireli vata kei ira na Juta.

³² Ena sega ni vakakina na veiyalayalati au a cakava kei ira na nodra qase ena gauna au a kauti ira tani kina mai Ijipita, e dua na veiyalayalati era a voroka, ka dina ga ni'u a watidra tagane.

³³ Na veiyalayalati vou au cakava vata kei ira na Isireli. Au na tugana na noqu i vunau ena nodra vakasama ka vola sara e yalodra. Au na yaco me nodra Kalou, ka ra na yaco me ra noqu tamata. Sa kaya o Jiova.

³⁴ Ena sega ni dua me na vakavulica na wekana ka na sega ni dua ena tukuna vua na kai nona, ‘Mo kila na Turaga.’ Era na kilai au kece sara, me tekivu mai vei ira na cecere sara ka yaco vei ira na lalai sara. Au na vosota na nodra ca ka sega tale ni nanuma tiko na nodra i valavala ca.’

³⁵ O cei sa solia na matanisiga Me vakararamataka na siga, Kei na vula kei na kalokalo Me cila ena bogi; Sa vakamaravutaka na wasawasa Ni sa vadugu na kena biau; Sa i Jiova ni lewevuqa ga na yacana.

³⁶ Sa yalataka ni kevaka ena tudei tikoga na veika e dau yaco, Ena yaco me matanitu tikoga o Isireli.

³⁷ Kevaka e rawa ni vakarautaki na lomalagi Ka dikevi rawa na veiyavu Ena boto ni vuravura, Sa na qai rawa me'u biuti ira na Isireli, Baleta na veika kece sara era cakava.

³⁸ Ena yaco mai na gauna, me na tara tale kina na koro levu taucoko oqo, me tekivu mai na vale cecere i Ananeli ena yasana vaka ki na ra, me na yaco ki na Matamata ki Tutuna.

³⁹ Ia na wa ni yalayala ena gole sara yani ki na delana mai Karepi ka wavokiti Koa.

⁴⁰ Ia na buca kece sara ni yago ni mate, na dravusa kei na vanua taucoko ena dela ni uciwai na Kitironi me yaco sara ki na Matamata ni Ose vaka ki na tokalau ena vakatabui me nona na Turaga. Ena sega tale ni basuraki na koro oqo se vakarusai ena dua na gauna.”