Jeremaia 30 - Vakavakadewa Vou kei na iVola tale eso

Yalayala i Jiova ki na Kawa i Jekope

¹ A sa kaya vei Jeremaia, na Turaga o Jiova, na nodra Kalou na Isireli,

² “Mo vola ena dua na i vola na veika kece sara au a tukuna vei iko,

³ baleta ni na yaco mai na gauna au na kauti ira lesu tale kina na noqu tamata, na Isireli kei Juta. Au na kauti ira lesu tale mai ki na vanua au a solia vei ira na nodra qase me ra taukena tale.”

⁴ A sa kaya o Jiova me baleti Isireli kei Juta:

⁵ “Au sa rogoca e dua na tagi ni domobula, E dua na tagi ni rere ka sega ni tagi ni sautu.

⁶ Tu mada vakadua ka vakasamataka! E rawa li me vakasucuma na tagane E dua na gone? A cava au raica kina Ni ra dui biuta tu na tagane yadua Na ligadra e ketedra? Me vaka e dua na yalewa sa taratara? A cava sa vulaci kecega kina na matadra?

⁷ E dua na siga rerevaki ena yaco mai; Ena sega tale ni dua na siga Me na vakatauvatani kaya. Ena dua na gauna ni rarawa Vei ira na kawa i Jekope; Ia era na bula tikoga.”

⁸ A sa kaya na Turaga o Jiova ni lewevuqa, “Ni sa na yaco mai na siga o ya, au na qai musuka na i vua mai na domodra ka biuta laivi na sinucodo ka ra sa na sega tale ni bobula vei ira na kai tani.

⁹ Ia era sa na qarava ga na Turaga na nodra Kalou kei Tevita na nodra tui o koya au na solia vei ira.

¹⁰ Kemuni na kawa i Jekope na noqu dauveiqaravi, Ni kakua ni rere, kemuni na Isireli, Ni kakua ni yalo lailai. Au na sereki kemuni mai na vanua yawa o ya, Mai na vanua o ni a vakabobulataki kina. Era na lesu tale mai na kawa i Jekope Ka mai tiko sautu; Era na galala Ka sega ni dua me vakarerei ira.”

¹¹ Au na tiko kei kemuni Me'u vakabulai kemuni. Au na vakarusai ira Na veimatanitu kecega Ka'u a vakasavi kemuni kina; Ia au na sega ni vakarusai kemuni. Au na sega ni laivi kemuni Mo ni kakua ni totogi; Ia ni'u na totogitaki kemuni Ena vakarauta ga. Ni sai Jiova ga sa kaya oqo.”

¹² A sa kaya o Jiova vei ira na nona tamata, “Sa sega ni vakaoti rawa na nomuni mosi, Ka sa sega ni mavo rawa na nomuni mavoa.

¹³ Sa sega ni dua me qaravi kemuni rawa vakavinaka, Ka sa sega na i sui ni mavoa me yaga, Sa sega talega ni rawa ni o ni bula.

¹⁴ O ira kece era domoni kemuni Era sa guilecavi kemuni, Era sa sega tale ni kauwaitaki kemuni. Au ravuti kemuni me vaka na meca Ka sa bibi sara na kemuni totogi, Baleta ni sa rui levu na nomuni i valavala ca, A ka vakaitamera na nomuni dukadukali.

¹⁵ Ni kakua tale ni vosa kudrukudru Me baleta na nomuni vakararawataki; Sa sega ni malumu rawa Na nomuni vutu. Au na totogitaki kemuni vakaoqo Baleta ni sa rui levu na nomuni i valavala ca Ka vakaitamera na nomuni dukadukali.

¹⁶ O ira kece era tilomi kemuni Era na tilomi, Ka kau tani kece vakabobula na kemuni meca. O ira kece era vakacacani kemuni Era na vakacacani, O ira kece era tokitaki kemuni era na tokitaki.

¹⁷ Au na vakabulai kemuni tale, Au na vakaotia na nomuni vakararawataki, E dina era na kaya na kemuni meca, ‘Sa biu laivi tu o Saioni, Sa sega e dua me kauwaitaka.’

¹⁸ A sa kaya tale o Jiova: “Au na vakasukai ira lesu tale Na kawa i Jekope Ki na nodra vanua, Ka na sobuta na noqu loloma na veivuvale yadua. Ena tawa tale na veikoro kece, Ka vakavoui tale na veivale kecega.

¹⁹ Era na sere ena vakavinavinaka na tiko kina; Ka ra na kaila ena marau. Au na vakalevutaka na kedra i wiliwili, Ka vakavuna me ra dokai.

²⁰ O ira na luvedra Era na vakataki ira tale e liu, Ka ra na vakataudeitaki tale Na nodra i soqosoqo e mataqu; Au na totogitaki ira kece era vakacacani ira.

²¹ Ena nodra tui E dua ga vei ira mai na nodra matanitu, Ka nodra turaga me kovana i liuliu E dua ga vei ira. Ni'u na sureti ka vakauqeti koya Ena toro voleka mai; Ka na sega ena via lako mai Ni sega ni sureti se vakauqeti.

²² Era na qai noqu tamata Ka'u na nodra Kalou. Sa i au ga o Jiova sa kaya vakaoqo.”

²³ Raica sa liwa mai na cava ni Turaga, sa lako mai na cudru, e dua na cagilaba kaukauwa, ka na tabaka na uluna na tamata ca.

²⁴ Ena sega ni suka wale na cudru waqawaqa ni Turaga. Me yacova ni sa vakayacora ka vakaotia sara na ka e talai kina, era na qai kila vinaka na tamata na veika oqo e muri,” sa kaya o Jiova.