Jeremaia 29 - Vakavakadewa Vou kei na iVola tale eso

Vola i Jeremaia vei Ira na Jiu

¹ A sa vola o Jeremaia e dua na i vola vei ira na vo ni liuliu era tiko maliwai ira na bobula, ka vakakina vei ira na bete, na parofita kei ira kece sara na tamata e a kauti ira vakabobula o Nepukanesa mai Jerusalemi ki Papiloni.

² E a vola ni a biuti Jerusalemi o Jo-akini na tui kei na tinana na tui, kei ira na vakailesilesi ena valenitui, o ira na turaga e Juta kei Jerusalemi, vata kei ira na dautuki kaukamea.

³ A talai rau o Elasa na luve i Safano kei Kemaria na luve i Ilikaia o Setekaia na tui Juta me rau lako vua na tui Papiloni o Nepukanesa ka kauta na i vola. Sa vakaoqo:

⁴ Sa kaya vakaoqo o Jiova na Qaqa, na nodra Kalou na Isireli vei ira kece na tamata e a lewa me kauti ira vakabobula o Nepukanesa mai Jerusalemi ki Papiloni.

⁵ Ni tara na nomuni veivale ka tiko kina. Ni tea na nomuni teitei ka kania na veika o ni tea kina.

⁶ Ni vakawati ka vakaluveni, me ra veimusumusuki ka vakawati na luvemuni ka me ra vakaluveni talega. Mo ni tubu mo ni lewe vuqa ka kakua ni lailai sobu.

⁷ Ni cakacaka me baleta na toro cake ni vanua au sa lewa mo ni lako kina vakabobula. Ni masu vei Jiova ena vukuna, baleta na kena toro cake, ka ni o ni na toro cake talega kina.

⁸ A sa kaya na Turaga Qaqa na nodra Kalou na Isireli, ni qarauna mo ni kakua ni vakacalai mai vei ira na parofita era tiko kei kemuni se mai vei ira tale eso na daurairai era kaya ni rawa ni ra parofisaitaka na veika ena yaco mai muri. Ni kakua sara ni kauwaitaka na nodra tadra.

⁹ Era sa tukuna vei kemuni na veika lasu ena yacaqu. Au a sega ni talai ira yani. Sa i au ga o Jiova sa tukuna oqo.”

¹⁰ A sa kaya o Jiova, “Ni sa oti na vitusagavulu na yabaki mai Papiloni, au na qai sikovi kemuni ka vakayacora na ka au a yalataka, o ya, me'u kauti kemuni lesu tale ki na nomuni vanua.

¹¹ Sa i au taudua ga au sa kila na noqu i naki ena vukumuni, na noqu i naki mo ni tiko vinaka me vaka o ni sa nuitaka me na yaco mai muri.

¹² Ia ni o ni kacivi au o ni na lako mai ka masu vei au, au na rogoci kemuni.

¹³ O ni na vakasaqarai au, ia o ni na kunei au kevaka o ni vakasaqarai au ena yalomuni taucoko,

¹⁴ Au na laivi kemuni mo ni kunei au, sa kaya o Jiova, ka'u na qai vakalesuya vei kemuni na nomuni kalougata ka kumuni kemuni vata mai na veivanua ka'u a vakasavi kemuni kina. Ka'u na kauti kemuni lesu ki na veivanua au a kauti kemuni vakavesu mai kina.”

¹⁵ O ni a kaya, sa solia vei kemuni o Jiova eso na parofita mai Papiloni.

¹⁶ Sa i koya oqo na ka a kaya o Jiova me baleta na tui sa tiko ena i dabedabe vakatui nei Tevita kei ira na tamata ena koro oqo, sai ira na wekamuni era sega ni kau vakabobula ki Papiloni vata kei kemuni.

¹⁷ A sa kaya na Turaga Qaqa, ‘Au na kauta mai vei ira na i valu, na viakana kei na mate ca. Au na cakava me ra vaka na lolo sa luca ka sa sega ni rawa ni laukana.

¹⁸ Au na vakasavi ira ena i valu, na viakana kei na mate ca ka ra na rere na veimatanitu kecega e vuravura ena ka era raica. Era na kidroa ka rere na tamata ena ka e yaco vei ira ena veivanua kece au sa veibiuyaki ira kina. Era na vakalialiai ira ka vakayagataka na yacadra me veivakamaduataki.

¹⁹ Oqo na ka ena yaco vei ira, baleta ni ra sega ni muria na noqu vosa au sa talai ira tikoga yani kina na noqu parofita me ra tukuna,’ sa kaya o Jiova.

²⁰ Vei kemuni kece na tamata au a soli kemuni me kauti kemuni tani vakabobula na tui Papiloni mai Jerusalemi, ni rogoca mada na ka a kaya o Jiova.’

²¹ Sa tukuna na Turaga Qaqa me baleti rau o Eapi na luve i Kolaia kei Setekaia na luve i Mesia, oi rau a tukuna na veika lasu vei kemuni ena yacaqu. Sa tukuna ni sa soli rau vei Nepukanesa na tui Papiloni o koya ena vakamatei rau ena matamuni.

²² Ena gauna era dau vinakata kina na tamata era a kau vakabobula mai Jerusalemi ki Papiloni me yaco e dua na ka ca vua e dua na tamata, era dau kaya, ‘Me vakayacora mada ga vei iko o Jiova me vakataki rau o Setekaia kei Eapi oi rau a tavuni rau bulabula na tui Papiloni ena buka!

²³ Ni sa ka ca sara e Isireli na ka e rau cakava. E rau sa ia na veibutakoci kei na watidra na wekadra na wekadrau ka vosataka na veika lasu au sega ni talai rau kina ena yacaqu. Au sa kila; ka'u rawa ni vakadinadina kina,’ sa kaya o Jiova.

Vola i Semaia

²⁴ “Jeremaia, mo tukuna vei Semaia mai Neilami,

²⁵ ‘Sa kaya vakaoqo o Jiova na Qaqa na nodra Kalou na Isireli: O a vola mai eso na i vola ena yacamu ga vei ira kece na tamata e Jerusalemi kei Sefanaia na luve i Mesia na bete kei ira kece na bete. E vakaoqo na veika o a vola mai.

²⁶ Sa lesi iko o Jiova mo bete mo sosomitaki Jioiata, o sa bete i liuliu ena Valenisoro, sa nomu i tavi mo raica na tamata lialia kece era nanuma ni ra parofita me ra vesu ena sinucodo vata kei na dua na i vua kaukamea e domona.

²⁷ A cava o sega ni vunauci Jeremaia kina na kai Ananoci sa parofisai tiko vei ira na tamata?

²⁸ A talatala mai o koya vei keimami ki Papiloni ka kaya, ‘Ena dede na nomuni tiko mai Papiloni: ni tara na nomuni veivale ka tiko kina, ni tea na nomuni teitei ka kania na ka e bula kina.’ ”

²⁹ A sa wilika na i vola o Sefanaia na bete vei Jeremaia.

³⁰ A qai kaya o Jiova vei Jeremaia:

³¹ Mo talatala vei ira kece sara na tiko vakabobula ka tukuna na ka e tukuna o Jiova me baleti Semaia vei kemuni; ia au sa sega ni talai koya yani, ka sa vakavuna mo ni vakadinata na veika lasu.

³² O koya oqo sa kaya kina o Jiova: ‘Au na totogitaki Semaia na kai Neilama kei ira na nona kawa. Sa na sega na nona kawa me na bula kei kemuni ka sa na sega ni bula tiko me na raica na veika vinaka au na vakayacora vei ira na noqu tamata baleta ni sa tukuna vei ira me ra saqati au.’