Jeremaia 28 - Vakavakadewa Vou kei na iVola tale eso

O Jeremaia kei Enanaia

¹ Ena yabaki vata talega o ya, ena i kalima ni vula ni ka va ni yabaki a veiliutaki kina o Setekaia na tui, e a vosa kina o Enanaia na parofita mai na koro o Kipioni, vei Jeremaia ena Valenisoro. A tukuna vei Jeremaia ni ra rai tu na bete kei ira na tamata na

² Ka sa kaya na Turaga o Jiova ni lewevuqa na nodra Kalou na Isireli, “Au sa musuka na i vua nei tui Papiloni.

³ Au na kauta lesu tale mai ki na vanua oqo na veiyaya talei kece e a kauta o Nepukanesa mai na Valenisoro oqo ki Papiloni ena loma ni rua na yabaki.

⁴ Au na kauti Jo-akini lesu talega mai na luve i Jo-akimi na tui Juta kei ira kece era a kau vakabobula mai Juta ki Papiloni ka ni'u na musuka na i vua nei tui Papiloni.” Ni sai Jiova ga sa kaya oqo.

⁵ Ia a qai vosa o Jeremaia vei Enanaia na parofita ni ra rai tu na bete kei ira na tamata era tu ena Valenisoro,

⁶ ka kaya, “Me cakava dina mada ga o Jiova na ka oqo. Me vakayacora dina mada ga o Jiova na nomu vosa, ka kauta lesu tani mai Papiloni na i yaya talei kece ni Valenisoro kei ira kece na tamata era a kau kina vakabobula.

⁷ Ia mo rogoca mada na ka au tukuna vei iko kei ira na tamata.

⁸ O ira na parofita era a parofisai e liu mai vei iko kei au era yalataka ni na yaco na i valu, na viakana kei na mate ca ki na vuqa na matanitu kei na veivanua qaqa.

⁹ Ia na parofita a parofisaitaka na sautu ena qai okati me parofita a tala dina mai o Jiova ni sa yaco na veika a yalataka.

¹⁰ Ia a qai luvata tani na i vua o Enanaia mai na domo i Jeremaia ka masulaka.

¹¹ A sa kaya o Enanaia ena matadra kecega na tamata, “Ena vakaoqo na nona masulaka o Jiova na i vua a vakacolata o Nepukanesa na tui ena domodra na veimatanitu kecega; ka na cakava na ka oqo ena loma ni rua na yabaki.” A mai lako sara yani o Jeremaia.

¹² Sega so ni dede na nona a musuka o Enanaia na i vua e a cola voli o Jeremaia, a tukuna o Jiova vei Jeremaia,

¹³ Mo lako vei Enanaia, ka tukuna vua, ‘Sa kaya o Jiova ni sa rawa mo musuka na i vua kau, ia sa na vakaisosomitaka ena i vua kaukamea.”’

¹⁴ A tukuna o Jiova ni lewevuqa, na nodra Kalou na Isireli ni na vakacolata na i vua kaukamea ki na veimatanitu kecega oqo ka ra na qaravi Nepukanesa na tui Papiloni. Sa cakava talega na Turaga me qaravi Nepukanesa na manumanu kila.

¹⁵ A qai kaya o Jeremaia na parofita vei Enanaia na parofita, “Mo vakarorogo mada Enanaia, a sega ni talai iko mai o Jiova, ka o sa vakavuna me ra vakabauta na tamata e dua na lasu.”

¹⁶ O koya oqo a kaya kina o Jiova, “Au sa na kauti iko tani mai na dela i vuravura. Ena loma ga ni yabaki oqo o sa na mate kina baleta ni o sa vosa saqata na Turaga.”

¹⁷ A sa mate o Enanaia ena i kavitu ni vula ena yabaki tikoga o ya.