Jeremaia 27 - Vakavakadewa Vou kei na iVola tale eso

Daramaka o Jeremaia na i Vua

¹ Ena gauna a qai tekivu kina na veiliutaki i Setekaia na luve i Josaia na tui Juta a kaya o Jiova o Jiova vei Jeremaia.

² Mo cakava e dua na nomu i vua ena leca kei na kau me vakababa ka biuta ki domomu.”

³ A qai tukuna vua o Jiova me vakauta e dua na i tukutuku vei ira na tui Itomi, Moapi, Amoni, Taia kei Saitoni, me ra na kauta na nodra dui mata era lako mai ki Jerusalemi me ra raica na tui o Setekaia.

⁴ A sa kaya o Jiova Kaukauwa na nodra Kalou na Isireli me vakaroti ira me ra dui la'ki tukuna vei ira na dui nodra tui ni a kaya o Jiova,

⁵ Oi au, ka'u a bulia na vuravura, na tamata, na manumanu kece era tu ena dela i vuravura ena noqu kaukauwa levu kei na ligaqu sa dodo tu; ka'u na rawa ni solia vei koya ga au sa digitaka.

⁶ Oi au ga au a soli ira na veimatanitu kece oqo ki na liga ni noqu dauveiqaravi o Nepukanesa na tui Papiloni; ka'u bau soli ira talega na manumanu kila me ra qaravi koya.

⁷ Era na qaravi koya na veimatanitu kece sara, ka ra na qarava na luvena kei na makubuna me yacova na gauna sa na qai vakadrukai kina na nona vanua. A qai yaco na nona vanua me qaravi ira na veimatanitu qaqa kei na tui lelevu eso.

⁸ Ia kevaka e dua na vanua se matanitu ena sega ni via vakarorogo ki na nona lewa, au na totogitaka na vanua o ya ena i valu, viakana kei na mate ca me yacova ni'u sa solia vei Nepukanesa me lewa taucoko sara.” Sa i Jiova ga sa kaya oqo.

⁹ Ni kakua ni vakarorogo vei ira na nomuni parofita se vua e dua a kaya ni rawa ni parofisaitaka na veika mai muri ena raivotu se ena nodra kaciva na yalodra na mate, se ena nodra caka mana. Era tukuna kecega mo ni kakua ni qarava na tui Papiloni.

¹⁰ Era a lasutaki kemuni ka vakavuna mo ni kau tani vakayawa mai na nomuni vanua. Au na vakasavi kemuni tani, mo ni na rusa.

¹¹ Ia kevaka e dua na matanitu ena vakarorogo ki na lewa ni tui Papiloni ka qaravi koya, au na laiva me na tiko ga ena nona vanua me teivaka, ka tiko ga kina,” a kaya o Jiova.

¹² A tukuna talega na ka o ya o Jeremaia vei Setekaia na tui Juta, “Soli iko mo vakarorogo vua na tui Papiloni. Mo qaravi koya kei ira na nona tamata, o na qai bula kina.

¹³ A cava na ka mo mate kina kei ira na nomu tamata ena i valu, na viakana kei na mate ca? Oqo na ka sa kaya o Jiova ni na yaco ki na dua ga na matanitu e sega ni qarava na tui Papiloni.

¹⁴ Ni kakua ni vakarorogo vei ira na parofita era kaya mo ni kakua ni qarava na tui Papiloni. Era a lasutaki kemuni.

¹⁵ A sa kaya o Jiova ni sega ni talai ira ka ra sa lasutaka na yacana vei kemuni. Ena ka oqo ena vakasavi kemuni tani kina, ia o ni na rusa vata kei ira na parofita era lasutaki kemuni.”

¹⁶ Ia a qai kaya o Jeremaia vei ira na bete kei ira na tamata ni a kaya na Turaga, “Ni kakua ni vakarorogo vei ira na parofita era kaya ni sega ni dede sa na vakasukai tale mai na veiyaya talei ni Valenisoro mai Papiloni. Era a lasutaki kemuni.

¹⁷ Ni kakua ni vakarorogo vei ira! Ni qarava na tui Papiloni mo ni bula. A cava me rusa kina na koro oqo?

¹⁸ Kevaka era sa noqu parofita dina, kevaka talega e tu vei ira na noqu vosa, laiva me kau tani ki Papiloni na vo ni veiyaya vakatui mai Jerusalemi.

¹⁹ Ena gauna e a kauti Jekoni kina na luve i Jo-akimi na tui Juta ki Papiloni kei ira na tamata turaga e Juta kei Jerusalemi;

²⁰ E a biuta tu na veiduru, na beseni ni wai, na veitutu parasa kei na so tale na i yaya talei ni Valenisoro.

²¹ Ni rogoca na ka sa tukuna o Jiova ni lewevuqa na nodra Kalou na Isireli me baleta na veiyaya talei e sa vo tu ena Valenisoro kei na vale vakatui mai Jerusalemi.

²² Era na kau ki Papiloni ka na tu mai kea me yacova ni'u sa talevi ira tale. Au na qai kauti ira lesu tale mai ka mai biuti ira ena vanua oqo.” Ni sai Jiova ga sa kaya oqo.