Jeremaia 26 - Vakavakadewa Vou kei na iVola tale eso

Lewai o Jeremaia

¹ Ena gauna a qai tekivu kina na veiliutaki i Jo-akimi na luve i Josaia e Juta,

² A tukuna na Turaga o Jiova vei Jeremaia, “Mo la'ki tu ena rara ni vale tabu ka tukuna na veika kece sara au vakaroti iko kina vei ira na tamata kece era lako mai ena veikoro e Juta me ra qarava na Kalou e kea. Kakua sara ni vunia e dua na ka.

³ De mani yaco me ra muria na tamata, ka biuta tani na nodra i tovo ca; kevaka ena vakakina, au sa na veisautaka na lomaqu ena vuku ni veivakarusai au sa nakita me'u vakayacora vei ira me baleta na nodra i tovo ca.”

⁴ A sa kaya o Jiova vei Jeremaia, “Tukuna vei ira ni a tukuna o Jiova kevaka o ni na sega ni talairawarawa vei au ena nomuni muria na veivakavuvuli au a solia vei kemuni,

⁵ ka rogoca na nodra vosa na noqu dauveiqaravi na parofita au sa talai ira tiko yani vei kemuni, ia o ni sa sega ni rogoci ira.

⁶ Au na cakava na vale oqo me vakataki Sailo, ka ra na vakayagataka na veimatanitu kecega e vuravura na yaca ni koro oqo me vaka e ka beci ka veivakamaduataki.

⁷ Era a rogoca na bete, na parofita, kei ira kece na tamata ni tukuna na veika oqo o Jeremaia ena Valenisoro.

⁸ Ni tukuna oti ga o Jeremaia na veika a vakarota vua o Jiova me tukuna, era a vesuki koya na bete, na parofita, kei ira kece na tamata ka kailavaka, “Sa dodonu me vakamatei ena ka oqo!

⁹ A cava na ka sa kaya kina ena yaca ni Turaga ni na vakataki Sailoa na Valenisoro oqo, ka na vakarusai na koro oqo, ka na sega ni dua me na tiko kina?” Era a osodrigi na tamata era wavoliti Jeremaia ena Valenisoro.

¹⁰ Ia ni ra sa rogoca na nodra i liuliu e Juta na ka sa yaco era a biuta na nodra i tikotiko vakaturaga ka la'ki tiko ena nodra i dabedabe mai na katuba ni Matamata Vou ni Valenisoro.

¹¹ Era a qai kaya na bete kei na parofita vei ira na i liuliu kei ira na tamata. “Sa dodonu me tau vua na tamata oqo na i totogi mate, baleta ni sa parofisaitaka na ka ca me yaco ki na noda koro. O ni sa rogoci koya sara ga e daligamuni.”

¹² A sa kaya o Jeremaia vei ira na i liuliu kei ira kece na tamata, “Sa talai au mai o Jiova me'u tukuna na veika kece o ni sa rogoca au sa tukuna me baleta na Valenisoro oqo kei na koro oqo.

¹³ O koya oqo mo ni na veisautaka na nomuni vakarau kei na nomuni tovo ka muria na nona vosa na Turaga na nomuni Kalou. Ena qai veisautaka na lomana o Jiova ka na sega ni vakayacora na veivakarusai sa tukuna me yaco vei kemuni.

¹⁴ Ia oi au, au sa tu e ligamuni. Ni vakayacora vei au na veika o ni nanuma ni dodonu ka vinaka.

¹⁵ Ia mo ni kila tiko kevaka o ni vakamatei au, o ni sa cala ka vakakina o ira na lewe ni koro oqo ni o ni vakamatea e dua na tamata yalo dodonu, baleta ni a talai au mai na Turaga me'u tukuna na ka kece oqo vei kemuni.

¹⁶ Era a qai kaya na nodra i liuliu kei ira kece na tamata vei ira na bete kei na parofita, “Sa sega ni dodonu me tau vua na tamata oqo na i totogi mate, baleta ni sa vosa vei keda ena yaca ni Turaga na noda Kalou.”

¹⁷ Ni oti o ya, era a qai tucake eso na qase ka ra kaya vei ira era a soqoni vata e kea,

¹⁸ Ena gauna a tui Juta kina o Esekaia, e a tukuna kina na parofita o Maika na kai Moreseci vei ira kece na tamata ni a kaya na Kalou Kaukauwa, ‘Ena siviyarataki o Saioni me vaka e dua na buca; Ka na vaka e dua na i binibini vatu e Jerusalemi; Na ulunivanua ni Valenisoro me dua na veikau.’

¹⁹ Era a sega ni vakamatei Maika o tui Esekaia kei ira na nona tamata. Ia sa rerevaka na Turaga o Esekaia ka saga me vakayalovinakataki koya. A mani veisautaka na lomana o Jiova me baleta na veivakarusai sa tukuna me na vakayacora vei ira. “Ia oqo, e da sa vakarau kauta ga mai vaka i keda vei keda e dua na veivakarusai vakadomobula.”

²⁰ E dua tale na tamata e a parofisai ena yaca ni Turaga, o Uraia na luve i Semaia mai na koro o Jarimi. E a tukuna na veika ca ena yaco ena koro oqo kei na matanitu oqo me vakataki Jeremaia.

²¹ Ia ni a rogoca o Jo-akimi na tui kei ira na nona sotia kei ira na turaga na ka e a kaya o Uraia, a saga na tui me vakamatei koya. Ia ni rogoca o Uraia a dro ena domobula, ka dro sara ki Ijipita.

²² A qai talai Elinecani na luve i Akapa kei na so tale na tamata ki Ijipita o Jo-akimi na tui me ratou la'ki kauti Uraia mai.

²³ E ratou a kauti Uraia lesu mai vei Jo-akimi na tui ka vakamatei koya, ena i seleiwau ka viritaka na yagona ena kedra i bulubulu na tamata wale.

²⁴ Ia a totaki Jeremaia o Eaikami na luve i Safani ka mani sega ni soli yani kina vei ira na tamata me vakamatei.