Jeremaia 23 - Vakavakadewa Vou kei na iVola tale eso

Vakanuinui ki na Veigauna Mai Muri

¹ A sa kaya o Jiova o Jiova, Ena yaco na leqa vei ira na i liuliu era sa laivi ira na nodra tamata me ra vakamatei ka veiseyaki.”

² Oqo na ka a kaya o Jiova na nodra Kalou na Isireli me baleti ira na i liuliu ka nanumi me ra qarauni ira na nodra tamata. “O ni sa vuna na nodra veiseyaki na noqu tamata ka vakasavi ira tani; o ni sa sega ni qarauni ira. Ia oqo au sa na vakaitotogitaki kemuni ena vuku ni ka ca o ni cakava.

³ Au na qai vakasoqoni ira vata na vo-ni-bula ni noqu tamata mai na veimatanitu au a vakasavi ira kina, ka kauti ira lesu tale mai ki na nodra vanua dina. Era na vakaluveni vakalevu ka na tubu sara vakalevu na kedra i wiliwili.

⁴ Au na qai solia vei ira na i liuliu era na kauwaitaki ira. Era na sega tale ni rere se vakarerei, ka na sega sara ni yali e dua vei ira.” Sa kaya o Jiova.

⁵ A sa kaya o Jiova, “Ena yaco dina mai na gauna, Au na qai digitaka kina e dua na kawa dina i Tevita me tui. Ena daumaka na nona veiliutaki ka na vinaka ka dodonu ena vanua taucoko.

⁶ Ena qai galala o Juta ena nona gauna ni veiliutaki ka ra na qai tiko sautu na lewe i Isireli. Era na vakatoka na tui o ya me yacana, ‘O Jiova na noda yalododonu.’

⁷ A sa kaya o Jiova, “Ena yaco na gauna era sa na sega ni bubului kina vei au na tamata ni sai au na Kalou bula, o koya ka a kauti ira tani mai na Isireli mai Ijipita.

⁸ Ia, era na bubului vei au ni sai au na Kalou bula, ka kauti ira tani mai na Isireli mai na matanitu mai cake, vaka ki na vualiku, kei na veimatanitu tale eso au a vakasavi ira kina. Ia era sa na qai mai tiko tale ena nodra vanua dina.”

Ira na Parofita

⁹ A sa kaya o Jeremaia me baleti ira na parofita, “Sa kavoro na utoqu e lomaqu, Ka sa yavavala kece na suiqu Baleta na Turaga, Ena vuku ni nona veivosa savasava, Au sa vaka e dua na tamata sa mateni, E dua na tamata sa sivia vua na waini.

¹⁰ Sa sinai na vanua Vei ira na tamata sega ni yalodina vei Jiova; Era sa vakayacora na veika ca, Ka vakayagataka cala na nodra kaukauwa. Sa tagi na vanua baleta na cudru ni Turaga Ka sa malai sara mai na veico.

¹¹ Sa kaya ga vakaoqo o Jiova, “O ira na parofita kei na bete Era sa sega ni kila na Kalou; Au sa toboka na nodra i tovo ca Era sa dau kitaka ena Valenisoro.

¹² Na sala era muria Sa titidara ga ka butobuto; Ka'u na vakavuna me ra tarabe ka bale. Au na kauta mai vei ira na veika ca; Ka sa lako tiko mai na gauna ni nodra lewai.”

¹³ Au a raica na nodra ca na parofita ni Samaria, Era sa vosa ena yaca i Peali.

¹⁴ Ia ka'u sa kunea Ni sa vakasisila ka ca vakalevu cake Na ka era sa cakava na parofita ni Jerusalemi: Era sa veibutakoci ka tukuna na veika lasu; Ka ra sa vukei ira na tamata me ra cakava na ka ca Sa sega kina e dua me tarova Na nona cakava na ka ca. Vei au, era sa vakataki Sotoma kece sara, Ka ra sai tovo ca sara me vakataki Komora.

¹⁵ O koya oqo Sa kaya kina o Jiova ni lewevuqa Me baleti ira na parofita ni Jerusalemi: Au na solia vei ira na co gaga me ra kania Kei na wai gaga me ra gunuva, Baleta ni ra sa vakateteya na veitovo ca Ki na loma ni vanua taucoko.”

¹⁶ Sa kaya o Jiova vei ira na lewe i Jerusalemi, “Ni kakua ni rogoca na veika era kaya na parofita ni ra sa vakasinaiti kemuni ena vakanuinui mate wale. Era sa tukuna vei kemuni na veika ga era nanuma ka sega ni veika au tukuna.

¹⁷ Era tukuna tikoga vei ira na tamata era sega ni via rogoca na noqu vosa, ni na vinaka na veika kece ena yacovi ira, ka ra tukuna vei ira kece era dui muria ga na loma kaukauwa ni na sega na ka ca ena yacovi ira.

¹⁸ A sa kaya o Jeremaia, “E sega ni bau dua vei ira na parofita oqori e kila na vakasama vuni ni Turaga. E sega ni dua vei ira a sa bau rogoca se kila na nona vosa se kauwaitaka se via rogoca na ka e kaya o Jiova.

¹⁹ Ni sa vaka e dua na cagilaba na cudru ni Turaga, e dua na cagi kaukauwa ka na liwava na uludra na tamata ca.

²⁰ Ena sega ni mudu me yacova ni sa cakava oti na ka e via vakayacora. Ia e muri era na qai kila na nona tamata na ka oqo.

²¹ A sa kaya o Jiova, “Au a sega ni talai ira na parofita oqori, ia era sa lako ga yani. Au a sega ni solia vei ira e dua na i tukutuku, ia era sa la'ki vosa ga ena yacaqu.

²² Ia kevaka era kila na noqu veivakasama vuni, sa na rawa me ra vunautaka na noqu vosa vei ira na noqu tamata, ka vakalesui ira mai na nodra veigaunisala ca kei na veika ca era dau vakayacora.

²³ Sa i au ga na Kalou sa tiko ena veiyasana kecega, ka'u sega ni tiko ena dua wale ga na vanua.

²⁴ Ena sega ni dro rawa na tamata me na vunitaki koya ena dua na vanua me'u na sega ni kunei koya kina. O ni sega beka li ni kila ni'u sa tiko oi au ena veiyasana kecega mai lomalagi kei vuravura?

²⁵ Au sa kila na veika era sa tukuna na parofita oqori era sa dau vosa lasu ena yacaqu, ka ra kaya ni'u sa vosa vei ira ena raivotu.

²⁶ Ena vakacava so na kena dede na nodra vakacalai ira tiko na noqu tamata ena veika lasu era sa cakava ga?

²⁷ Era sa nanuma ni ra na vakavuna me ra na guilecavi au na noqu tamata ena tadra eso era sa tukuna, ka me vaka ga na nodra guilecavi au o ira na nodra qase ka golevi Peali.

²⁸ Na parofita sa tadra e dua na tadra, ia me tukuna ga ni tadra wale ga; ia na parofita e rogoca na noqu vosa me vunautaka ga na noqu vosa ena yalodina. E yaga vakaevei na qa ni witi ni vakatauvatani kei na witi?

²⁹ Na noqu vosa sa vaka na bukawaqa kei na i tuki sa vorolaka vakamatailalai na vatu.

³⁰ Au sa saqati ira na parofita era sa dau vakayagataka na nodra vosa eso tale vei ira, ka qai la'ki vunautaka voli me vaka ni ra sa noqu vosa ga.

³¹ Au sa saqati ira talega na parofita era vosataka ga na nodra vosa, ka qai tukuna ni noqu vosa.

³² Ni rogoca na veika au sa kaya vakaoqo! Au sa saqati ira na parofita era sa tukuna na nodra tadra ka sa sinai ena lasu. Era sa saqati ira na parofita era sa tukuna na nodra tadra ka vagolei ira tani na noqu tamata ena nodra lasu kei na nodra dokadoka. Au a sega ni talai ira se vakaroti ira me ra lako, ka sa sega sara na kedra yaga vei ira na tamata. Sa i au ga, o Jiova, sa tukuna na veika oqo.

Na i Colacola i Jiova

³³ A sa kaya vei au o Jiova, “I Jeremaia, kevaka sa tarogi iko vakaoqo e dua vei ira na noqu tamata, se parofita, se bete, ‘A cava na nona i colacola i Jiova?’ Mo qai tukuna ga vua vakaoqo: ‘Sa i iko ga na i colacola i Jiova, ena biuti iko tani o koya.’

³⁴ Ni kevaka sa vakayagataka na vosa oqo, ‘na i colacola i Jiova’ e dua vei ira na noqu tamata se parofita, au na totogitaki ira kei na nodra dui vuvale.

³⁵ Ia, e dodonu ga me ra dui taroga vakaoqo vei ira na nodra i tokani kei na wekadra, ‘Na cava e sa sauma lesu mai o Jiova? Na cava e sa tukuna oti o Jiova?’

³⁶ Ia me ra kakua tale vakadua ni vakayagataka na vosa oqo, ‘na i colacola i Jiova,’ baleta ni kevaka era na kaya tale, au na vakayacora na noqu vosa me dua na i colacola dina vei ira. Era sa vakatanitaka na tamata na vosa ni nodra Kalou, na Kalou bula, o Jiova ni lewevuqa.

³⁷ Jeremaia, tarogi ira na parofita, ‘A cava sa tukuna na Turaga?’

³⁸ Ia kevaka era sa talaidredre ki na noqu i vakaro, ka vakayagataka na vosa ‘na i colacola i Jiova,’ mo qai tukuna vei ira

³⁹ Ni'u na tauri ira cake ka kolotaki ira vakayawa sara mai vei au; oqori e wili kina o ira vata kei na koro ka'u a solia vei ira, vata kei ira na nodra qase.

⁴⁰ Au na qai kauta mai vei ira na bula vakaloloma kei na madua levu sa guiguilecavi dredre.”