Jeremaia 22 - Vakavakadewa Vou kei na iVola tale eso

Tukutuku ki na Vuvale Vakatui

¹ A sa kaya vei au na Turaga o Jiova me'u lako sobu ki na nona i tikotiko na tui Juta ka tukuna kina na vosa oqo,

² “Kemuni na tui Juta, o ni sa tiko ena i dabedabe vakatui i Tevita kei ira na vakailesilesi kei kemuni na lewe i Jerusalemi, mo ni rogoca mada na vosa ni Turaga.

³ Sa kaya o Jiova mo ni cakava na ka dodonu kei na ka savasava. Ni taqomaka na tamata sa vakaisini mai vei koya sa veivakaisini, kakua ni cakava e dua na ka ca se vakasosataki ira na vulagi, se vei ira na luveniyali, se na yada; ni kakua ni vakamatei ira na tamata yalododonu ena vanua tabu oqo.

⁴ Kevaka o ni na muria dina na vosa oqo era sa na qai tui tikoga e ke na kawa i Tevita. Era na qai curu vata tikoga kei ira na nodra vakailesilesi kei ira na nodra tamata ena veimatamata ni vale vakatui oqo ena qiqi kei na ose.

⁵ Ia kevaka o ni sega ni muria na veivosa oqo au sa yalataka vakataki au vei kemuni ni na rusa na i tikotiko vakatui oqo. Oi au, o Jiova, sa vosa vakaoqo.

⁶ Vei au, na i tikotiko vakatui e Juta sa tautauvata kei na vanua o Kiliati kei na ulunivanua o Lepanoni ena kena rairai vinaka, ia au na vukica me dua na vanua lala sa sega ni dua e bula kina.

⁷ Au sa talai ira na tamata me ra vakarusa. Era na kauta mai na nodra matau ka taya sobu na kena kau sitari digitaki ka viritaka ki na buka.

⁸ E muri, era na lakova na vanua oqo na tamata mai na veivanua tani, ka ra na qai dui taroga o ira na nodra dui i tokani se na cava sa cakava kina na ka levu oqo o Jiova ki na koro.

⁹ Ia era na qai sauma vakaoqo, “E baleta ga ni ra sa vakanadakuya na nodra veiyalayalati kei na Jiova na nodra Kalou ka qarava na veikalou tani.”

Na i Tukutuku i Jeremaia me Baleti Josaia

¹⁰ Oi kemuni na Juta, Ni kakua ni tagicaki Josaia, Ni kakua ni tagicaka na nona mate; Ia ni tagicaki Joasa ga vakalevu na luvena Ni sa na sega ni lesu tale mai Se raica tale na vanua e a sucu kina.

¹¹ A sa kaya o Jiova na ka me baleti Joasa na luve i Josaia, o koya a sosomitaki tamana me tui Juta, “Sa lako tani mai na vanua oqo ka na sega ni lesu tale mai.

¹² Ena mate ena vanua era sa kauti koya kina ka sega ni raica tale na vanua oqo.”

Tukutuku i Jeremaia Baleti Jo-akini

¹³ Ena rusa na tamata sa tara na nona vale Ena sala e sega ni dodonu, Kei na nona i taba vale e cake ena veivakaisini; O koya sa vakacataki ira na wekana, Ka sega ni solia na kedra i sau.

¹⁴ Sa na rusa na tamata e kaya, “Au na tara e dua na noqu vale Ka na lelevu na kena rumu Ena tabavale e cake.

¹⁵ Sa vakavuna li mo tui sa vinaka cake Na nomu tara e dua na vale sitari Sa vinaka cake mai na nodra na tani? A sega li ni kana ga gunu na tamamu Ka cakava ga na ka dodonu ka vinaka? Sa qai vinaka ga kina vua.

¹⁶ Sa lewa vakadodonu sara Ena vukudra na dravudravua, Ka sa vinaka na ka kecega e vukuna. Oqori ga na ka sa vakatokai ‘Me da kilai Jiova ga.’

¹⁷ Ia o iko O sa raica ga na ka o gadreva vakataki iko; O sa vakamatei ira na tamata yalododonu, Ka tabaki ira sobu vakaukauwa na nona tamata. Sa vosa ga vakaoqo o Jiova.

¹⁸ Ia a kaya o Jiova me baleti Jo-akimi Na luve i Josaia na tui Juta, “Ena sega e dua Me tagicaka na nona mate Se kaya, ‘Sa rui vakarerevaki noqu i tokani, Sa rui vakarerevaki. Ena sega e dua me tagicaki koya sa kaya, ‘Noqu Turaga! Noqu Tui!’

¹⁹ Ena bula me vaka e dua na asa, Ena yarataki tani; Ka viritaki Ena taudaku ni matamata kei Jerusalemi.”

Veika Ca ena Yacovi Jerusalemi

²⁰ Kemuni na lewe i Jerusalemi, Ni lako cake ki Lepanoni Ka kacivaka, Ni lako ki na vanua o Pasani Ka kailavaka; Ni la'ki kailavaka Mai na veiulunivanua mai Moapi, Baleta ni ra sa vakarusai kece O ira era dau lomani iko.

²¹ A sa vosa vei iko o Jiova Ni o a tiko vinaka Ia o a qai bese ni vakarorogo. Oqo na veika o a dau cakava Mai na gauna o a sa gone kina; O a bese ni muria Na nona vosa o Jiova.

²² Era na cagina tani Na nomu i liuliu ena cagi Ka ra na kau vakabobula O ira sa dau lomani iko O na vakamaduataki ka beci Baleta na veika ca kece o a cakava.

²³ O sa vakacegu ka galala ga Ena maliwa ni sitari mai Lepanoni; Ia ena vakacava ni na yacovi iko na mosi, Na mosi e vaka na nona mosi E dua na yalewa sa taratara.”

Lewa ni Kalou vei Jo-akini

²⁴ A sa kaya o Jiova vei Jo-akini na luve i Jo-akimi na tui Juta, “Me vaka au sa bula dina, kevaka sara mada ga o mama ena ligaqu i matau, au na luvati iko tani,

²⁵ Ka soli iko vei ira era via vakamatei iko, o ira o sa rerevaki ira. Au na soli iko vei tui Nepukanesa mai Papiloni kei ira na nona sotia.

²⁶ Au na kolotaki iko tani vata kei tinamu ki na dua tale na matanitu, ka sega ni dua vei kemudrau a sucu kina, o drau na mate ruarua mai kea.

²⁷ O drau na sega ni lesu tale ki na vanua o drau domona mo drau raica.”

²⁸ A sa kaya o Jeremaia, “Sa yaco li o Jo-akini na tui me vaka e dua na saqa kavoro sa viritaki laivi ka sa sega e dua e vinakata? A cava na ka e kau tani kina o koya kei ira na luvena ki na dua na vanua e ratou sa sega ni kila?”

²⁹ Isa na vanua, na vanua, na vanua! Mo rogoca na vosa i Jiova:

³⁰ “Na tamata oqo sa vakarusai Me ra yali vua na luvena, Ka me na sega ni rawata Me vakatoroicaketaki koya. Ena sega na nona kawa Me na vakatulewa tiko e Juta, Me vakataki ira na i sosomi kei Tevita. Sa i au ga, o Jiova, sa kaya vakaoqo.