Jeremaia 21 - Vakavakadewa Vou kei na iVola tale eso

Yalataki na Druka I Jerusalemi

¹ A talai Pasari na luve i Malikaia kei Sefanaia na bete ka luve i Maseia, o Setekaia na tui me rau lako vei Jeremaia ka cakava na kerekere oqo:

² “Mo yalo vinaka, mo vosa mada vei Jiova me baleti keda, baleta ni ra sa tuva i valu wavolita tu na koro na mataivalu nei Nepukanesa na tui Papiloni. De na rairai na vakayacora o Jiova e dua na nona cakacaka mana me baleti keda ka me vakasaurarataki Nepukanesa me vakasuka.”

³ A qai vosa vei au na Kalou, ka'u qai tukuna vei rau ni a talai mai vei au,

⁴ me tukuna vei Setekaia, ni Turaga na Kalou ni Isireli, a kaya, “Au na ravuta na nomu mataivalu ka na vala tiko kei na mataivalu nei tui Papiloni. Au na binia na nodra i yaragi kece ni vala na nomu mataivalu ena lomadonu ni koro.

⁵ Au na valuti kemuni ena noqu kaukauwa, kei na cudru, kei na veivakarusai, kei na noqu yalo ca levu.

⁶ Au na vakamatei ira kece sara era tiko ena koro oqo; ena tautauvata ga ki na tamata kei na manumanu kecega era na mate ena dua na mate ca levu sara.

⁷ A sa kaya o Jiova, “Ni oti o ya, au na soli Setekaia na tui Juta, kei ira na nona vakailesilesi kei na tamata kece ena koro oqo era bula mai na i valu, kei na mate ca, kei na dausiga ki na liga i Nepukanesa na tui Papiloni kei na ligadra na kedra meca kei ira era via vakamatei ira. Ena vakamatei ira o Nepukanesa. Ena sega ni vakabula e dua vei ira, ena sega ni yalo vinaka se yalo loloma vei ira.”

⁸ Ia a qai kaya o Jiova vei Jeremaia me tukuna vei ira na tamata, “Raica au sa biuta e matamuni na sala ni bula kei na sala ni mate.

⁹ O ira era na tiko ena loma ni koro era na mate ena i valu, se ena viakana se ena mate ca. Ia o koya ena curu yani ki tuba ka soro vei ira na kai Papiloni era sa samuta tiko oqo na nodra koro era na sega ni vakamatei ka ra na vakabulai me i toki ni valu.

¹⁰ Au sa nakita e lomaqu me'u kakua tale ni vakabula na koro oqo, ia me'u vakarusa sara ga. Ena soli ki na ligana na tui Papiloni ka me na vakama yavu.

Lewa Tau ena Vuvale i Tui Juta

¹¹ Jeremaia, tukuna ki na vuvale vakatui e Juta, vei ira na kawa i Tevita me ra rogoca na ka sa tukuna na Turaga o Jiova

¹² Raica me caka na lewa dodonu ena veisiga. Taqomaka na tamata sa vakaisini mai vei koya sa veivakaisini, kevaka o na cakava, na noqu cudru ena waqa me vaka na buka ena sega ni boko rawa.

¹³ Jerusalemi o sa toka e cake ena dela ni veitokaitua me vaka na vatu cere ena loma ni buca. Ia ena vala kei iko o Jiova. Baleta ni o sa kaya ni sega ni rawa ni dua me ravuti iko se basuka rawa na kemu bai.”

¹⁴ Ena vakaitotogitaki iko o Jiova me baleta na veika o vakayacora. Au na vakama na nomu vale vakaturaga ka na kama yavu na veika kece sara e tu wavokita.”