Jeremaia 19 - Vakavakadewa Vou kei na iVola tale eso

Na Saqa sa Kavoro

¹ A sa kaya vei au na Turaga o Jiova me'u la'ki volia e dua na saqa qele. A tukuna me'u kauta eso na qase mai vei ira na tamata kei na so na parofita qase,

² Ka curu ena matamata ni koro o Poliseti vaka ki na Qakilo kei Inomi. Me'u la'ki vunautaka e kea na vosa ni Turaga, ka a solia vei au.

³ A tukuna vei au o Jiova, “Ni vakarorogo na tui kei Juta kei kemuni na lewe i Jerusalemi ki na ka sa tukuna na Turaga o Jiova ni lewevuqa na nodra Kalou na Isireli. Au sa na kauta mai e dua na veivakarusai ki na vanua oqo, ka na qasikanunu kecega na daligadra era rogoca.

⁴ Au na cakava na ka oqo baleta ni ra sa biuti au na tamata ka ra sa vakadukadukalitaka na vanua oqo ena nodra vakacaboisoro ki na veikalou tani, na veikalou era a sega ni bau kilai, se o ira na nodra qase kei ira na tui Juta e liu. Era sa vakasinaita na vanua oqo ena nodra dra na tamata tawa cala,

⁵ Ka ra tara na veicabocabonisoro vei Peali me ra vakama kina na luvedra ena buka me i soro. E a sega ni bau yaco mai ki na noqu vakasama, au a sega talega ni bau vakaroti ira me ra vakama na luvedra me i soro.

⁶ Ia, oqo sa kaya o Jiova, “Ena yaco mai na gauna, ena sega tale ni vakatokai kina na vanua oqo me yacana o Tofeci se na Qakilo kei Inomi. Ia ena vakatokai me yacana na Qakilo ni Veivakamatei.

⁷ Au na vakarusa ena vanua oqo na veika era nakita na kai Juta kei Jerusalemi. Au na vakavuna me ra qaqa na kedra meca ka vakamatei ira ena i valu. Au na solia na yagodra me kedra kakana na manumanu kila kei na manumanu vuka.

⁸ Au na kauta mai e dua na veivakarusai vakarerevaki ena koro oqo, ka ra na kurabui ka kidacala o ira kecega era curu kina.

⁹ Au na vakavuna me ra kani ira na luvedra na tiko e kea. Era na dui kania na wekadra ena koro ni ra sa viribaita na meca na nodra koro ka ra saga me ra vakamatei ira.”

¹⁰ A qai kaya vei au o Jiova, me'u voroka na saqa e matadra na tamata era lako vata kei au,

¹¹ Ka tukuna vei ira na ka sa tukuna na Turaga o Jiova ni lewevuqa, “Au na vorolaki ira na tamata oqo kei ira na koro oqo me vaka na nomu vorolaka na saqa qele ka sa sega ni rawa ni o na sema vata tale. Era na bau la'ki bulu na tamata ki Tofeci ka ni sa sega na vanua me ra bulu kina.

¹² Sa i koya o ya na ka au na cakava ena koro oqo kei ira na lewena. Au na cakava me vakataki Tofeci.

¹³ Na veivale e Jerusalemi, na nodra veivale na tui Juta kei na veivale kece sa dau vakamai kina na ka boi vinaka ki na veikalokalo ka dau sova kina na i soro liviraki ki na veikalou tani ena dukadukali me vakataki Tofeci.”

¹⁴ Ia, au sa qai biuti Tofeci na vanua e a talai au kina o Jiova me'u la'ki vunautaka kina na nona vosa. Au a qai lako ka la'ki tu ena lomanibai ni Valenisoro ka tukuna vei ira kece na tamata,

¹⁵ Ni sa kaya na Turaga o Jiova ni lewevuqa na nodra Kalou na Isireli. “Au na kauta mai ki na koro levu oqo kei na kena veikoro kece na i totogi au a tukuna ni'u na cakava baleta ni o ni sa rui yalo kaukauwa ka sega ni via rogoca na noqu vosa.”