Jeremaia 18 - Vakavakadewa Vou kei na iVola tale eso

O Jeremaia ena Vale i Dautuli Kuro

¹ A sa kaya vei au na Turaga o Jiova,

² Lako sobu mada ki na nona vale na dautuli kuro, au na qai vosa vei iko mai kea.”

³ Au mani lako kina, ka raica na dautuli kuro ni cakacaka tiko ena nona vanua ni tuli kuro.

⁴ Ena veigauna e ca kina e dua na tiki ni kuro e tulia tiko, ena taura sara na tiki ni qele o ya ka tuliva kina e dua tani tale na ka e vinaka vua me cakava.

⁵ A qai kaya vei au o Jiova,

⁶ E sega li ni rawa vei au me'u cakava vei kemuni na Isireli na ka e cakava na dautuli kuro ena nona qele? Kemuni na Isireli o ni sa tiko ga ena ligaqu me vaka na qele ena ligana na dautuli kuro.

⁷ Kevaka au kaya ena dua na gauna ni'u na cavuraka cake ka basuraka sobu, se vakarusa e dua na vanua se dua na matanitu,

⁸ Ia e qai biuta na matanitu o ya na nona i tovo ca, au sa na veisautaka na lomaqu me baleta na ka au a tukuna me'u na cakava.

⁹ Ia kevaka au kaya ni'u na tea se tara e dua na vanua se dua na matanitu,

¹⁰ Ka qai vakayacora na veika ca na matanitu o ya, ia au na qai veisautaka na lomaqu me baleta na ka au a tukuna me'u na cakava.

¹¹ Ia oqo mo tukuna vei ira na Juta kei ira mai Jerusalemi ni'u sa nakita me'u cakava na veika me vorati ira ka vakarau me'u vakaitotogitaki ira. Tukuna vei ira me ra muduka na nodra i tovo ca, me ra veisautaka na nodra i tovo kei na nodra i valavala.

¹² Era na qai kaya, “Sega, sa sega na betena! Keimami na cakava ga na veika keimami via cakava.”

¹³ O koya oqo a kaya kina o Jiova. “Taroga mada na veimatanitu. Sa bau yaco li E dua na ka vakaoqo e liu? Era sa cakava na Isireli E dua na ka vakarerevaki!

¹⁴ Sa bau mudu li Na lutu ni wai cevata Ena veidelana veivatu mai Lepanoni? Sa bau maca li Na kena veiuciwai batabata ni ulunivanua?

¹⁵ Ia o ira na noqu tamata Era sa guilecavi au; Era sa vakama na ka boi vinaka Ki na veimatakau. Era sa tarabe ena sala e dodonu Me ra lako kina, Era sa sega tale ni qai muri Ena veisala makawa, Era sa lako Ena veigaunisala a sega ni bau lakovi.

¹⁶ Era sa cakava na vanua oqo Me vanua lala, Me beci ka tawa mudu. O ira kece era lako kina Era na kidacala Ena ka era raica Era sa kurea na uludra Ena nodra kurabui.

¹⁷ Au na cakava Me ra veiseyaki na noqu tamata E matadra na kedra meca, Me vaka na kuvu ni qele sa cagina Ena cagi tokalau. Au na qai vakanadakui ira; Ka'u na sega sara ni vukei ira Ni sa yaco na leqa.”

¹⁸ Ia era a qai kaya na tamata, “Me da sa bosea mada na ka me da cakava vei Jeremaia. Era sa tu na bete me ra na tuberi keda, era na tu na tamata vuku me ra vakasalataki keda ka ra tu na parofita me ra vunautaka na vosa ni Kalou. Me da vosa vakacacataki koya ka kakua ni vakarorogo ki na veika e tukuna.”

¹⁹ A qai masu o Jeremaia, “Kemuni na Turaga, ni rogoca na veika ka'u sa kaya kei na veika era sa kaya na kequ meca me baleti au.

²⁰ Me i sau li ni ka vinaka na ka ca? Era sa kelia e dua na qara me'u sikalutu kina. Ni nanuma na noqu a lako mai vei kemuni ena vukudra, mo ni kakua ni vakatauca vei ira na nomuni cudru.

²¹ Ia oqo, kemuni na Turaga, ni laivi ira me ra mate ena i valu. Laivi ira na yalewa vakawati me ra yava ka sega ni vakawati, laivi ira na tagane me ra mate ena veimate ca, kei ira na nodra cauravou me ra mate ena i valu.

²² Talai ira lo eso me ra butako ena nodra veivale, ni cakava me ra tagi mai ena rere. Era sa kelia e dua na qara me'u sikalutu kina ka birika e dua na dai me'u coko kina.

²³ Ia, Turaga, o ni sa kila na vere ca kece era nakita me ra vakamatei au kina. Ni kakua ni vosota na nodra ca; ni kakua ni bokoca na nodra i valavala ca. Ni vakadrukai ira; ni vakayacora ena gauna ni nomuni cudru.