Jeremaia 17 - Vakavakadewa Vou kei na iVola tale eso

Nodra Cala kei na Totogi na Juta

¹ A sa kaya o Jiova, “Kemuni na lewe i Juta, sa volai na nomuni i valavala ca ena peni kaukamea; sa ceuti ena lomamuni ka vakatutuna ena daimani, ka ceuti talega ena veitutu ni nomuni cabocabonisoro.

² Era sa nanuma tiko na luvemuni na veicabocabonisoro kei na veiduru tabu era a vakaduri cake vua na kalou yalewa o Asera ena veivunikau drokadroka, ena veidelana,

³ Kei na dela ni veiulunivanua, ena loma ni vanua. Au na solia vei ira na nomuni meca me ra tokitaka na nomuni yau kei na nomuni veika talei me baleta na veivalavala ca o ni sa vakayacora ena nomuni vanua.

⁴ O ni na biuta tu mai na nomuni vanua au a solia vei kemuni. Au na cakava mo ni qaravi ira na kemuni meca ena dua na vanua o ni sega ni kila, baleta ni sa vaka na buka na noqu cudru, ena kama tiko ka tawa mudu.

Na Veivosa Eso

⁵ A sa kaya o Jiova, Au na vakarusa na tamata Sa gole tani mai vei au, Ka sa vakararavi vei ira na tamata Ki na nodra kaukauwa na tamata vakayago.

⁶ Era na vaka e dua na kau Ena vanua dravuisiga, E bula toka Ena dua na vanua qele mamaca sara, Ena qele tuituina Ka sega ni bula tale kina E dua na ka; A sa sega ni bau kunea kina E dua na ka vinaka.

⁷ Ia, au na vakalougatataka Na tamata e vakararavi vei au, O koya sa vakabauti au.

⁸ Sa vaka e dua na kau sa tei volekata na wai; Ka sa tete yani na wakana ki na uciwai. Sa sega ni rere ni sa yaco mai na draki katakata, Baleta ni sa drokadroka tu ga na drauna; Ni sega na uca sa sega ni taqaya Ka sa sega ni mudu na kena vua.

⁹ O cei e kila rawa na yalo ni tamata? Sa ka e dau veivakaisini duadua Mai na veika kecega; Sa tauvi mate vakaca sara.

¹⁰ Oi au o Jiova, Au sa kila na vakasama, Ka vakatovolea na yalodra na tamata. Au sa sauma na tamata yadua Me vaka na nona i valavala Na ka e veirauti Kei na nona i vakarau.

¹¹ Na tamata e rawata na i lavo ena sala ca E vaka na manumanu vuka e saulaka na yaloka ni manumanu tani; Ni bera ni veimama na nona bula, Sa na vakayalia na nona i yau Ia na kena i otioti, Ena kune ga ni lialia.

¹² Na nodra vale tabu Sa vaka e dua na i dabedabe lagilagi vakatui Sa toka ena dua na ulunivanua cecere Mai na i vakatekivu.

¹³ O Jiova na i nuinui i Isireli; O ira kece era biuti koya Era na vakamaduataki. Era na yali Me vaka na yaca era volai Ena dela ni qele Baleta ni ra sa vakanadakuya na Turaga Na i vurevure ni wai ni bula.

Kerea o Jeremaia na Veivuke i Jiova

¹⁴ Ni vakabulai au Jiova, au na qai bula vinaka; ni sereki au ka'u na qai taqomaki vinaka sara. Sa i kemuni ga au sa vakacaucautaka.

¹⁵ Era sa kaya vei au na tamata, “Sa e vei na veika e a tukuna o Jiova me yacovi keda? Me vakayacora sara mada!

¹⁶ Ia, au sega mada ni bau vakauqeti kemuni na Turaga mo ni kauta mai na ka oqo vei ira; au sega ni bau gadreva e dua na gauna ni leqa vei ira. Kemuni na Turaga, o ni sa kila na ka oqo, o ni sa kila na veika au tukuna.

¹⁷ Ni kakua ni vu ni rere vei au, sai kemuni na vanua au taqomaki kina ena gauna ni leqa,

¹⁸ Ni vakamaduataki ira era vakararawataki au, ia ni kakua ni vakayacora vei au. Ni vakasinaiti ira ena rere, ia ni kakua ni vakarerei au. Ni kauta mai na ka ca vei ira, ka vakarusai ira, ni vakarusai ira sara vakadua.

Na Vakarokorokotaki ni Siga ni Vakacecegu

¹⁹ A qai kaya vei au na Turaga o Jiova, “Jeremaia, lako ka la'ki tu ena matamata mai Jerusalemi, mo la'ki tu mada e liu ki na vanua era dau curu yani ka lesu mai kina na tui Juta, ni oti o ya mo qai la'ki tu talega ena matamata tale eso.

²⁰ Tukuna vei ira na tui kei ira kece na lewe i Juta ka vakakina vei ira kece sara era tiko e Jerusalemi ka dau curu ena veimatamata oqori me ra rogoca na noqu vosa.

²¹ Tukuna vei ira kevaka era lomana na nodra bula, me ra kakua ni colata e dua na ka ena Siga ni Vakacecegu;

²² Me ra kakua ni kauta mai e dua na ka ena veivale ena Siga ni Vakacecegu. Me ra kakua ni cakacaka ena Siga Vakacecegu; me ra maroroya na siga ni vakacecegu me vaka au sa vakarota vei ira na nodra qase.

²³ Era a sega ni vakarorogo, se talairawarawa vei au na nodra qase. Ia era a yalo kaukauwa; era sega ni via talairawarawa vei au se vuli mai vei au.

²⁴ Ia kevaka o ni vakarorogo vei au, ni kakua ni kauta mai e dua na ka ena veimatamata kei Jerusalemi ena Siga ni Vakacecegu, ni maroroya na siga oqo ka kakua ni cakava kina e dua na cakacaka.

²⁵ Era na qai curu mai ena veimatamata kei Jerusalemi na tui kei na luvenitui, era na dabe ena i dabedabe vakatui nei Tevita. Era na lako vata mai kei ira na lewe i Juta kei Jerusalemi, ka ra na vodo mai ena kareti kei na ose ka na dau tawa tu ga na koro o Jerusalemi ena tamata.

²⁶ Era na lako na tamata mai na yasayasa vaka-Penijamini, mai na veidelana, mai na veiulunivanua, ka vakakina mai na yasana vaka ki na ceva. Era na kauta mai na veisoro kama, na i soro, na i madrali laukana, na ka boi vinaka na ferekiniseni, kei na i soro ni vakavinavinaka ki na vale tabu.

²⁷ Ia kevaka o ni sega ni talairawarawa vei au, mo ni maroroya na Siga ni Vakacecegu, ka sega ni colata e dua na ka ena veimatamata kei Jerusalemi ena siga o ya; au na vakama na veimatamata ni koro kei Jerusalemi. Ena kama na veitikotiko vakaturaga mai Jerusalemi ka na sega ni dua me na bokoca rawa.”