Jeremaia 16 - Vakavakadewa Vou kei na iVola tale eso

Na Loma i Jiova vei Jeremaia

¹ A sa vosa tale vei au o Jiova ka kaya.

² Mo kakua ni vakawati se vakaluveni ena dua na vanua vakaoqo.

³ Au na tukuna vei iko na ka e baleti ira na gone era sucu e ke kei ira na nodra i tubutubu.

⁴ Era na mate ena veimate vakarerevaki. Ena sega e tagicaki ira ka ra na sega ni bulu. Era na vakamatei ena i valu, se mate ena viakana, ka me kedra kakana na manumanu vuka kei na manumanu kila na yagodra.”

⁵ A sa kaya o Jiova, ‘Mo kakua ni curu ki na dua na vale e caka tiko kina na tagi. Kakua ni tagicaka e dua na tamata, se ia na veivakacegui. Au na sega tale ni vakalougatataki ira ena tiko sautu, se vakaraitaka vei ira na loloma kei na yalo loloma, sa kaya o Jiova.

⁶ Era na mate vata na vutuniyau kei na dravudravua ena vanua oqo, ia ena sega e tagicaki ira se buluti ira. Ena sega e dua me na tavalaka na yagona se toroya na uluna me vakaraitaka na nona rarawa.

⁷ Ena sega e dua me dovia na madrai vua sa rarawa me vakacegui koya kina ena vuku ni wekana sa mate. Sa na sega e dua me solia na bilo ni veivakacegui me vakacegui kina e dua ena vuku i tamana se tinana.

⁸ Kakua ni curu ki na dua na vale e caka tiko kina na kanavata. Kakua ni dabe kei ira, se kana ka gunu vata kei ira.

⁹ Rogoca mada na ka au sa tukuna, oi au o Jiova Kaukauwa na nodra Kalou na Isireli. Au sa na muduka mai na vanua oqo, ena nomuni gauna, e matamuni na domo ni marau, na domo ni reki kei na domo ni tagane kei na yalewa sa qai vakawati.

¹⁰ ‘Ena gauna o sa tukuna kina na veika oqo vei ira, era na qai taroga vei iko se na cava na vuna au sa nakita kina me'u vakaitotogitaki ira ena ka ca rerevaki oqo. Era na taroga se na ka cava era sa cala kina se i valavala ca cava era sa vakayacora e matana o Jiova na nodra Kalou.

¹¹ Ia mo qai kaya vei ira ni, Sa tukuna o Jiova. Era a biuti au na nomuni qase ka ra qara ka sokalou ki na veikalou tani. Era vakanadakui au ka sega ni muria na noqu i vakaro.

¹² Ia sa ca vakalevu cake sara na ka o ni sa kitaka mai vei ira na nomuni qase. Raica, o ni sa dui muria kece na yalomuni kaukauwa, kei na nomuni i tovo ca ka sega ni vakarorogo vei au.

¹³ O koya oqo au sa na biuti kemuni tani kina mai na vanua oqo ki na dua na vanua o ni sa sega ni bau kila vakadua se o ira na nomuni qase. Mai kea o ni na qai la'ki qaravi ira kina na veikalou tani ena siga kei na bogi, ka'u sa na sega ni vakaraitaka vei kemuni e dua na ka vinaka.’ ”

¹⁴ A sa kaya o Jiova, “Raica ena yaco mai na gauna sa na sega kina na bubului vei au na Kalou bula o koya ka a kauti ira tani mai na Isireli mai na vanua o Ijipita.

¹⁵ Ia era na bubului ga vei au na Kalou bula o koya sa kauti ira tani mai na Isireli mai na matanitu mai cake, vaka ki na vualiku, kei na veimatanitu kece sara au a veibiuyaki ira kina. Au na kauti ira lesu tale mai ki na nodra vanua dina, na vanua au a solia vei ira na nodra qase.

¹⁶ Au sa talatala me ra lako mai e vuqa na dauqoli me ra mai qolivi ira na tamata oqo. Ia, au na qai talatala me ra lako mai e vuqa na dauvakasasa ka ra na qai vakasasataki ira sobu mai na veiulunivanua kei na veidelana ka vakakina ena veiqara vatu.” A sa kaya o Jiova.

¹⁷ Au sa raica na veika kecega era cakava. Sa sega ni vunitaki rawa e dua na ka vei au; sa sega talega ni vunitaki vei au na nodra i valavala ca.

¹⁸ Au na cakava me ra sauma vakarua na i sau ni nodra i valavala ca kei na nodra caka cala. Era sa vakadukadukalitaka na noqu vanua ena matakau era sega ni cegu me vaka na yago ni mate; ka ra sa vakasinaita na vanua au solia vei ira ena veikalou lasu.”

Na Masu ni Vakanuinui i Jeremaia vei Jiova

¹⁹ Kemuni Jiova o ni sa taqomaki au ka vakaukauwataki au; o ni sa vukei au ena gauna ni leqa. Era sa lako mai vei kemuni na veimatanitu mai na i yalayala kei vuravura ka kaya, “E sega ni bau dina na ka e tu vei ira na neimami qase, na veikalou lasu ga, e sega ni bau dua na ka, na veimatakau tawa yaga.

²⁰ E rawa li vua e dua na tamata me cakava ga na nona kalou? E sega! Era na sega ni kalou dina.”

²¹ O koya oqo sa kaya kina o Jiova, “Au sa na vakatakila ga vakadua oqo me ra kila na noqu kaukauwa kei na noqu qaqa; era sa qai kila ni sai au o Jiova.”