Jeremaia 11 - Vakavakadewa Vou kei na iVola tale eso

Vorolaka na Veiyalayalati o Isireli kei Juta

¹ Sa tukuna o Jiova vei Jeremaia,

² Rogoca mada na i vakarau ni veiyalayalati oqo.

³ Tukuna vei ira na kai Juta kei ira na lewe i Jerusalemi na ka sa kaya o Jiova na nodra Kalou na Isireli. Sa na cudruvi o koya yadua e sega ni muria na vosa ni veiyalayalati oqo.

⁴ O koya ka'u a vakarota vei ira na nodra qase ena gauna au a kauti ira tani kina mai Ijipita, na vanua sa vaka na lovo kaukamea vei ira. Au a tukuna vei ira me ra muria na noqu vosa ka cakava na ka kecega au a vakarota vei ira me ra cakava. O ni na qai yaco mo ni noqu tamata, ka'u na qai nomuni Kalou.

⁵ Au na qai vakayacora kina na ka au a yalataka vei ira na nodra qase, me'u solia vei ira na vanua vinaka ka bulabula era sa tiko kina oqo.” A sa kaya o Jeremaia, “Io, Turaga.”

⁶ A qai kaya o Jiova vei Jeremaia, “Mo la'ki kacivaka na veivosa kece oqo ena veikoro e Juta kei na veigaunisala mai Jerusalemi. Ni rogoca na veivosa ni veiyalayalati ka muria.

⁷ Ena gauna au a kauti ira tani mai kina na nomuni qase mai Ijipita, au a vakaroti ira matua sara me ra muria na noqu vosa; au sa vunauci ira tikoga na tamata oqo me yacova edaidai me ra talairawarawa ki na noqu vosa.

⁸ Ia era sa sega ni rogoca se muria. Era sa dui muria ga na yalodra kaukauwa. O koya oqo au sa kauta mai kina vei ira na veitotogi kece sara e vakamacalataki kina.”

⁹ A qai kaya o Jiova vei Jeremaia, “Era sa vorati au na kai Juta kei ira na lewe i Jerusalemi.

¹⁰ Era sa vakayacora tale na nodra i valavala ca na nodra qase, o ira era a sega ni via muria na noqu vosa. Era a cuva ki na veikalou tani ka qaravi ira. E rau sa voroka na veiyalayalati o Isireli kei Juta au a cakava kei ira na nodra qase.

¹¹ O koya oqo sa kaya kina o Jiova, “Au sa na kauta mai na veivakarusai era sa sega ni rawa ni drotaka. Kevaka era na tagi mai vei au, au na sega ni rogoci ira.

¹² Era na qai lako na kai Juta kei ira na lewe i Jerusalemi ka tagica na nodra veivuke na kalou era dau vakacaboisoro kina. Ia era na sega ni vakabulai ira rawa na veikalou oqo.

¹³ Ni sa tautauvata na levu ni wiliwili ni nodra kalou na kai Juta kei na levu ni wiliwili ni nodra veikoro ka ra sa tara na lewe i Jerusalemi e vuqa na i cabocabonisoro ni i madrali vakasisila vei Peali, me vaka na i wiliwili ni gaunisala ena nodra koro.

¹⁴ Mo kakua sara ni masu mai vei au, se kerekere mai vei au ena vukudra na tamata oqo. Ni ra sa leqa, era sa qai kere veivuke mai vei au, Au na sega ni rogoci ira.”

¹⁵ A sa kaya o Jiova, “Era sa kitaka na veika ca na tamata au sa dau lomana. Na dodonu cava sa tu vei ira me ra kitaka kina na nodra veika vakasisila ena noqu vale. Ena rawa li ki na bubului kei na veisoro manumanu me na tarova na nomuni vakarusai? Era nanuma beka era na dro rawa ena sala oqo?

¹⁶ E a vakatoka o Jiova vei kemuni ena dua na gauna mo ni dua na vunivaini vakadrauna bulabula, ka so bi tu ena vuana totoka; ia oqo au na vakama na drauna ka musulaka na tabana ena dua na rorogo vaka na lutu ni yaseyase se kurukuru.

¹⁷ E a tei Isireli kei Juta o Jiova ni lewevuqa, ia oqo sa tukuna mo ni rusa. Era sa vakavuna ga vaka i ira na ka oqo baleta ni ra sa kitaka na veika ca; era sa vakacudrui au ena nodra vakacaboisoro vei Peali.”

A Bukivere me Baleti Jeremaia

¹⁸ A qai vakaraitaka vei au o Jiova na buki vere era sa nakita tiko na kequ meca me baleti au.

¹⁹ Au sa vaka e dua na lami yalo malua sa kau me vakamatei, ia au a sega ni kila ni ra sa bukia na vere vuni oqo me baleti au. Era kaya, “Me da taya sobu na kau ni sa bulabula; me da vakamatei koya me na kakua tale ni dua me nanumi koya.

²⁰ A qai masu o Jeremaia, “Oi kemuni Jiova ni lewevuqa, kemuni na Turaga ni lewa dodonu; o ni sa dau vakatovolea na lomadra kei na nodra vakasama na tamata. Me'u raica mada ni o ni sa cudruvaki au vei ira na tamata oqo, baleta ni'u sa laiva na noqu bula ki na ligamuni.

²¹ Era a saga na kai Anacoci me ra vakamatei Jeremaia, ka ra kaya vua ni ra na vakamatei koya kevaka e parofisai tikoga ena yaca i Jiova.

²² O koya oqo a qai kaya kina o Jiova me baleti ira, “Au na totogitaki ira! Era na mate na nodra cauravou ena i valu; ka ra na mate na luvedra ena viakana.

²³ Ena sega sara ni dua na vo-ni-bula me na qai vo tale vei ira. Au na kauta ga mai na veivakarusai vei ira na kai Anacoci, na yabaki ni nodra cudruvi.