Jeremaia 10 - Vakavakadewa Vou kei na iVola tale eso

Na Qaravi Kalou Tani kei na Sokalou Vakaidina

¹ Kemuni na Isireli, ni rogoca mada na i tukutuku i Jiova vei kemuni.

² A sa kaya vakaoqo o koya, “Ni kakua ni muria na nodra sala O ira na veimatanitu tani, Se mo rerevaka na veivakatakilakila Oni raica e lomalagi; Ni ra sa rerevaka oqo na veimatanitu.

³ Sa tawa yaga na nodra lotu na tamata oqo. Sa musuki mai e dua na kau mai veikau; Ka sa sivisiviraki ena i yaya vakamatai,

⁴ A sa qai ceuti kina na siliva kei na koula. Sa vakadeitaki sara ena i vako Ka sa tuki kina me kakua ni yavala.

⁵ Na veimatakau vaka o ya Sa vaka na i vakatakarakara ni tamata Ena dua na loga ni meleni; Era sa sega ni vosa rawa, Sa dodonu ga me ra colati, Baleta ni ra sega ni lako rawa. Ni kakua ni rerevaki ira: Ni sega ni rawa me ra caka ca vei kemuni.”

⁶ Kemuni Jiova, Sa sega e dua me vakataki kemuni: Sa levu ga oi kemuni, Ka sa cecere na yacamuni ka kaukauwa.

⁷ O cei me sega ni rerevaki kemuni Na tui ni veimatanitu? Sa dodonu mo ni rerevaki ka rokovi. Sa sega e dua sa tautauvata kei kemuni Vei ira na tamata vuku ni veimatanitu.

⁸ A nodra tamata vuku kece Era sa lialia ka sesewa. E rawa li ki na veimatakau Me vakavulici ira ena dua na ka?

⁹ Sa vakaiukuuku na nodra veimatakau Ena siliva mai Tasisi, Kei na koula mai Ufasi, Era sa cakacaka ni ligadra kecega na matai Kei na dautuki kaukamea. Era sa vakaisulu ena i sulu karakarawa Kei na i sulu lokaloka, Era talia na dautalitali.

¹⁰ Ia o Jiova Sa i koya na Kalou dina, Sa i koya na Kalou bula, Kei na tui tawa mudu. Ni sa cudru Sa sautaninini na vuravura; Ka na sega ni vosota rawa na veimatanitu Na nona cudru.

¹¹ Mo ni tukuna vei ira na ka oqo: ni ra sa vakarusai na veikalou eso sa sega ni bulia na vuravura kei na lomalagi. Era sa na sega tale ni bula tiko ena dua na vanua e vuravura.

A Sere ni Vakavinavinaka vei Jiova

¹² Sa bulia o Jiova na vuravura Ena nona kaukauwa; Sa bulia o koya na vuravura Ena nona vuku, Ka sa tevuka yani na lomalagi Ena nona maqosa.

¹³ Ena vuku ni nona vosa, Sa vadugu kina na wai mai lomalagi; Sa kauta mai na kabukabu Mai na i yalayala kei vuravura. Sa vakavuna na tibi ni livaliva Ena gauna ni uca, Ka sa tala mai na cagi Mai na nona lololo.

¹⁴ Sa lecaika na tamata yadua Ka rui lialia; Sa vakamadualaki na dautuki kaukamea Mai na nodra matakau. Sa lasu ga na nodra kalou matakau; Ka sa sega vei ira na bula.

¹⁵ Era sa tawa yaga Ka dodonu me ra beci; Ena gauna era na vakaitotogitaki kina Era na rusa laivi.

¹⁶ Sa sega ni vaka o ya na Kalou i Jekope; Sa i koya sa bulia na ka kecega, Ka sa digitaki Isireli me ra nona tamata. Na Kalou Kaukauwa sai koya na yacana.

Na Kau Vakavesu sa Voleka

¹⁷ Kemuni na lewe i Jerusalemi, o ni sa valuti tiko, ni sa buku na druadrua vei kemuni! Ni kumuna vata na veika o ni taukena.

¹⁸ Ena vakarau kolotaki kemuni tani mai na vanua oqo o Jiova; ena vakarau vakadasilataki kemuni me yacova ni sa sega ni vo e dua vei kemuni. A sa kaya ga vakaoqo o Jiova.”

¹⁹ Era sa tabalaka na tagi Na lewe i Jerusalemi. Oilei, keimami sa mavoa vakaca sara! Ena sega ni mavo rawa na neimami mavoa. Ka keimami sa nanuma ga Ni sa rawa me vosoti na ka oqo!

²⁰ Sa vakarusai na neimami valelaca; Sa cavuka na dali kecega sa vesu kina. Era sa lako oti na luve i keimami; Ka ra sa lako tani vakayawa. Sa sega ni dua me birika tale Na neimami valelaca, Ka sa sega e dua me vakarubeca Na kena i latilati.

²¹ Era sa lialia Na nodra i liuliu na tamata, Era sa sega ni taroga Na i vakasala ni Turaga. O ya na vuna era sa sega kina ni toro cake; Ka ra sa veiseyaki kina na tamata.

²² Ni rogoca! E dua na rorogo sa lako tiko mai Sa dua na matanitu mai cake, Vaka ki na vualiku. Na kena mataivalu ena vakavuna Na veikoro e Juta me vanua lala, Ka me nodra i tikotiko na koli.

²³ Kemuni Jiova, Au sa kila na nona sala na tamata, E sega ni lewa rawa Sa sega na tamata e lewa rawa na nona bula.

²⁴ Ni vakadodonutaki keimami Jiova, Ia ena lewa dodonu Ka me kakua ena cudru, De keimami rusa vakadua sara.

²⁵ Ni sovaraka na nomuni cudru Ki na veimatanitu Sa sega ni cuva vei kemuni, Kei ira sa sega ni ciqomi kemuni. Era sa vakamatei ira na nomuni tamata; Era sa vakarusai keimami vakadua sara Ka vakaleqa vakadua na neimami vanua.”