Jeremaia 1 - Vakavakadewa Vou kei na iVola tale eso

O Jeremaia

¹ Oqo na vosa i Jiova ka a yaco vei Jeremaia na luve i Ilikaia, e dua vei ira na bete mai Anacoci ena vanua o Penijamini.

² E a yaco taumada vei Jeremaia na vosa ena i katini katolu ni yabaki vakatui i Josaia na luve i Emoni na tui Juta.

³ E a vosa tale vei Jiova ena gauna e a tui kina o Jo-akimi na luve i Josaia. Ni oti o ya, e a vosa tale vakavuqa vua me yacova na nodra a kau tani yani vakabobula na lewe i Jerusalemi ena i kalima ni vula ena i katini kadua ni yabaki vakatui i Setekaia na luve i Josaia.

Na Kacivi nei Jeremaia

⁴ A sa kaya vei au o Jiova,

⁵ Ni bera ni'u buli iko ena kete i tinamu au sa digitaki iko, ni o se bera ni sucu mai au sa vakatabui iko; ka digitaki iko mo parofita ki na veimatanitu.”

⁶ Au a qai kaya, “Isa Jiova na noqu Turaga, au sa sega ni gusu matata, ka ni'u sa rui gone.”

⁷ Ia sa kaya ga vei au o Jiova, “Kakua ni tukuna ni o sa rui gone, ia mo lako ga vei ira na tamata au sa talai iko kina, ka tukuna vei ira na ka kecega au sa vakarota vei iko.

⁸ Kakua sara ni rerevaki ira, baleta ni'u na tiko kei iko me'u taqomaki iko,” a kaya o Jiova.

⁹ A qai dodoka mai na ligana o Jiova, ka tara na tebe ni gusuqu, ka kaya vei au, “Raica, au sa tauca na noqu vosa ena gusumu,

¹⁰ Au sa solia vei iko edaidai na kaukauwa mo lako ki na veivanua kei na veimatanitu, mo cavuraka, ka talaraka sobu, mo basuraka ka vakarusa mo tara cake ka tea.”

¹¹ A qai tarogi au o Jiova, “Jeremaia, a cava o sa raica?” Au mani sauma ka kaya, “E dua na taba ni amodi”

¹² A qai kaya vei au o Jiova, “O sa donu vinaka! Au sa wanonova tiko me yaco dina sara na noqu vosa.”

¹³ A qai taroga tale vei au o Jiova, “A cava tale o sa raica?” Au a qai sauma ka kaya, “Au sa raica e dua na kuro sa buebue mai na yasana ki cake vaka ki na vualiku, ka sa vakarau me tasova sobu mai ki na vanua oqo.”

¹⁴ A sa kaya vei au, “Ena tekivu na veivakarusai mai na veivanua mai cake vaka ki na vualiku, ka na yacovi ira kece era tiko ena vanua oqo.

¹⁵ Rogoca mada na noqu vosa. Au sa kacivi ira kece sara na tui ni veimatanitu mai cake vaka ki na vualiku. Era na lako mai ka tara na nodra i tikotiko vakatui ena matamata mai Jerusalemi me wavokita na kena bai, ena vaka talega kina na bai ni veikoro e Juta.

¹⁶ Au na totogitaki ira ena vuku ni nodra ca, era sa vakanadakui au ka vakacabora na i soro boi vinaka ki na veikalou tani, ka ra lotu ki na veimatakau era cakava.

¹⁷ Mo yaloqaqa; lako ka la'ki tukuna vei ira na veika kece sara au a vakarota vei iko mo tukuna. Mo kakua sara ni rerevaki ira de'u na qai vakarerei iko vakalevu cake e matadra.

¹⁸ O na vaka e dua na koro vakabai kaukauwa, o na vaka e dua na duru kaukamea ka vaka talega na lalaga parasa ki na vanua taucoko oqo; vei ira na tui Juta, vei ira na kena bete kei ira na tamata kece sara ena vanua oqo.

¹⁹ Era na sega ni vakadrukai iko rawa, ni'u sa tikoga kei iko, sa kaya o Jiova. Au na vakabulai iko.”