Jemesa 5 - Vakavakadewa Vou kei na iVola tale eso

Na i Vakaro vei Ira na Vutuniyau

¹ Mo ni vakarorogo mada mai vei au, oi kemuni sa vutuniyau! Ni tagi ka qoqolou ena vuku ni veika rarawa ena yaco mai vei kemuni!

² Sa vuca na nomuni i yau ka sa kania na nomuni i sulu na sarasara.

³ Sa veveka na nomuni koula kei na siliva, ka na dautukuni kemuni na kedra veveka ka kania na lewemuni me vaka na bukawaqa. O ni sa ia ga na vakasokumuni i yau ena i otioti ni gauna oqo.

⁴ O ni se bera ga ni solia na kedra i sau na tamata cakacaka era sa tatamusuki ena nomuni teitei. Ni rogoca mada na nodra kudru! Ni sa rogo yani ki na daligana na Turaga sa Cecere na nodra tagi o ira sa daukumuna vata na kakana sa tamusuki.

⁵ Sa sinai sara na nomuni bula ena ka ni veivakamarautaki kei na veika sau lelevu. O ni sa qai vaka e dua na bulumakau urouro vinaka sa kau yani me vakamatei.

⁶ O ni sa ia na veibeitaki ka vakamatei ira sa sega na nodra cala, ka ra sa sega ni bau veivorati kei kemuni.

Na Yalo Vosota kei na Masu

⁷ O koya oqo, kemuni na wekaqu, mo ni qai vosota, me yacova na nona lesu tale mai na Turaga. Ni raica mada na dauteitei, ni sa waraka me vuataka na nona qele na vua vinaka. Sa waraka vakadede o koya ena vosota me tau na uca ena kena gauna taudonu me vukea na nona i teitei.

⁸ Oi kemuni talega e dodonu mo ni dauvosota vakaoqo ka tudei tikoga, ni sa voleka na nona lesu tale mai na Turaga.

⁹ Ni kakua ni dau kudruvaka e dua tale na tamata, kemuni na veiwekani, me kakua kina ni lewai kemuni na Kalou. Raica, sa tu ga ena mata ni katuba na Daunilewa!

¹⁰ Kemuni na wekaqu, ni nanumi ira na parofita era sa vosa ena yaca ni Turaga, ka vakadamurimuri ira ena nodra dauvosota voli na veika rarawa.

¹¹ Eda sa vakatokai ira era sa dauvosota me ra tamata kalougata. O ni sa rogoca na dauvosota nei Jope, ka o ni sa kila talega na veivakarautaki ni Turaga ena vukuna me yacova na i tinitini ni nona bula. Ni sa sinai sara na Turaga ena yalololoma kei na yalo ni veikauwaitaki.

¹² Ia sa dua na ka bibi sara oqo kemuni na wekaqu, mo ni kakua ni dau vosa bubului ena gauna o ni yalayala kina. Ni kua ni vosa bubului ena vuku i lomalagi, se ena vuku i vuravura, se ki na dua tale na ka. Me “Io” ga na nomuni vakaio, ia me “Sega” ga na nomuni sega, ni na sega ni lewai kemuni kina na Kalou.

¹³ Eso beka vei kemuni sa rarawa tiko? E dodonu me ra masu tiko. Eso beka vei kemuni sa marau tiko? E dodonu me ra lagata tiko na sere ni vakavinavinaka.

¹⁴ Eso beka vei kemuni sa tauvimate? E dodonu mo ni kacivi ira na qase ni lotu me ra masulaki ira, ka lumuti ira ena waiwai ena yaca ni Turaga.

¹⁵ Na masu sa cabori ena vakabauta ena vakabula na tamata tauvimate; ena vakaturi ira cake tale na Turaga, ka na vosoti na veika cala era sa vakayacora.

¹⁶ O koya oqo mo ni qai veivakatusai kina vakai kemuni ena vuku ni nomuni i valavala ca, ka veimasulaki me rawa kina na veivakabulai. A nona masu na tamata yalododonu sa ka levu sara na kena mana.

¹⁷ A sa dua na tamata me vakataki keda ga o Ilaijia. A sa masu vagumatua sara me kakua ni tau na uca, ka sa sega ni tau kina na uca e vuravura me tolu veimama na yabaki.

¹⁸ Ia ni sa qai masu tale, sa tau mai na uca mai lomalagi, ka sa vuataka na vuana na qele.

¹⁹ Oi kemuni na wekaqu, kevaka sa lako sese mai na i vakavuvuli dina e dua vei kemuni ka mani la'ki vakalesui koya mai e dua tale,

²⁰ mo ni nanuma vinaka oqo: o koya sa vakalesuya mai na tamata caka cala mai na nona i valavala ca ena vakabulai koya na tamata caka cala o ya mai na mate, ka na yaco kina me ra vosoti na i valavala ca e vuqa.