Jemesa 4 - Vakavakadewa Vou kei na iVola tale eso

Na Veiwekani kei Vuravura

¹ Era vu mada mai vei na veivala kei na veiba ena kemuni maliwa? Era sega li ni ra vu tiko mai na veimataqali gagadre ca ka ra veisaqasaqa tiko ena yagomuni?

² O ni dau gadreva na veika eso, ia o ni sega ni rawata, ka o ni sa via veivakamatei kina; sa sega ni rawa mo ni taukena, ka o ni sa veiba ka veivala kina. O ni sa sega ni rawata na veika o ni gadreva baleta ni o ni sega ga ni kerea vua na Kalou.

³ Ena gauna o ni kerekere kina, sa sega ga ni rawa baleta ni cala tiko na nomuni i naki ni kerekere; o ni sa kerea ga na veika me vakamarautaki kemuni ga vakai kemuni.

⁴ Ni yavu tamata dauveidabui! O ni sega beka ni kila ni sa veimecaki kei na Kalou o koya yadua sa via veitokani kei vuravura?

⁵ Kakua ni nanuma ni sa sega ni dina na i Vola Tabu ni sa kaya, “Sa vuvutaka vakalevu na Kalou na yalo sa solia o koya me mai tiko e lomada.”

⁶ Ia na loloma-savu sa solia na Kalou sa levu cake sara. Ni sa kaya na i Vola Tabu, “Sa dau vorati ira na viavialevu na Kalou, ia sa solia ga na nona loloma-savu vei ira sa yalomalumalumu.”

⁷ O koya oqo mo ni vakamalumalumutaki kemuni kina vua na Kalou. Vorata na tevoro, ena dro tani kina mai vei kemuni o koya.

⁸ Toro voleka yani vua na Kalou, ka na toro voleka mai vei kemuni o koya. Ni vakasavasavataka na ligamuni, oi kemuni sa dau kitaka na i valavala ca! Ni vakasavasavataka na yalomuni, oi kemuni na dauveivakaisini!

⁹ Ni liaci kemuni ena lomabibi, ka qoqolou, ka tagi; ni vukica na nomuni veidredrevaki ki na veitagicaki, na nomuni reki ki na tiko vakalomabibi!

¹⁰ Ni vakamalumalumutaki kemuni ena mata ni Turaga, ena qai laveti kemuni cake o koya.

Me Kakua na Vakalelewa

¹¹ Oi kemuni na wekaqu, ni kakua ni veikaseti vakai kemuni. Kevaka e dua sa kaseta e dua tale na lewenilotu Vakarisito, sa kaseta ka vakalewa vakakina o koya na Lawa. Ia kevaka o ni sa vakalewa na Lawa, o ni sa qai sega ni muria na Lawa, ia o ni sa kena daunivakalelewa ga.

¹² Sa dua bauga na vunilawa kei na daunilewa. Sa rawata duadua ga o koya me ia na veivakabulai kei na veivakarusai. Ia o cei ga oi kemuni, mo ni vakalewa tale e dua?

Vakasala me Baleta na Dokadoka

¹³ Ni vakarorogo mada, oi kemuni sa dau kaya vakaoqo, “E daidai se ni mataka eda na lako ki na dua na koro, ka la'ki tiko kina me yabaki dua, ka caka bisinisi kina, ka rawata mai kina e levu na i lavo.”

¹⁴ E baleta na cava, ka ni o ni sega tiko mada ga ni kila se na vakaevei na nomuni bula ena siga ni mataka! O ni sa vaka ga na kabukabu, sa rairai vakalekaleka mai ka sa seyavu tale yani.

¹⁵ Sa dodonu ga mo ni kaya vakaoqo, “Kevaka sa lewa vakakina na Turaga, eda na bula ka kitaka na veika oqo se na veika o ya.”

¹⁶ Ia o ni sa qai dokadoka ga ka dautukutukuni kemuni voli; sa sega sara ni dodonu na mataqali dokadoka vakaoqo.

¹⁷ O koya oqo era sai valavala ca kina o ira vakayadua sa sega ni vakayacora na veika dodonu era sa kila vinaka tiko ni dodonu me ra vakayacora.