Jemesa 2 - Vakavakadewa Vou kei na iVola tale eso

Me Kakua na Veivakaduiduitaki

¹ Oi kemuni na wekaqu, me vaka ni da sa vakabauta vata na noda Turaga lagilagi o Jisu Karisito, mo ni kakua sara ni vakaduiduitaka na tamata ena vuku ni kedra i rairai e taudaku.

² Ni vakasamataka mada kevaka sa curu yani ki na nomuni soqoni e dua na tamata e vakamama koula ka vakaisulu vinaka, ka qai curu talega yani e dua na tamata dravudravua ka vakaisulu ca.

³ Kevaka o ni kauwaitaki koya ga e vakaisulu vinaka ka kaya vua, “Ni mai dabe mada ena i dabedabe vinaka eke,” ka qai kaya vua na tamata dravudravua, “La'ki tucake tu maikea,” se “Mai dabe toka e ra oqo,”

⁴ o ni sa qai cala kina ena vuku ni veivakaduiduitaki vakaoqo kei na vakatulewa cala sa yavutaki ena i naki ca.

⁵ Oi kemuni na wekaqu lomani, ni vakarorogo mada! Sa digitaki ira na tamata dravudravua ena ka ni vuravura oqo na Kalou me ra vutuniyau ena vakabauta, ka me ra taukena talega na matanitu sa yalataka oti o koya vei ira sa lomani koya.

⁶ Ia o ni sa beci ira ga na tamata dravudravua oi kemuni! E sega li ni o ira na vutuniyau oqo era sa dau vakasaurarataki kemuni ka kauti kemuni vakaukauwa ki na mataveilewai?

⁷ Ni sai ira ga oqo sa dau vosavakacacataka na yaca dokai sa soli vei kemuni.

⁸ E na toso vinaka sara na nomuni bula kevaka o ni sa vakayacora dina sara na lawa ni matanitu ni Kalou, me vaka sa volai ena i Vola Tabu, “Mo lomana na kai nomu me vaka o sa lomani iko.”

⁹ Ia kevaka o ni sa ia na veivakaduiduitaki ena vuku ni rairai ni tamata e taudaku, o ni sa qai valavala ca, ka sa beitaki kemuni na lawa ena cala ni daubasulawa.

¹⁰ Ni o koya sa muria tiko na lawa taucoko, ka sa cala ga ena tikina e duabau ga, sa beitaki o koya me vaka sa talaidredre ki na lawa taucoko.

¹¹ Ni o koya e kaya vakaoqo, “Mo kakua ni veibutakoci,” sa kaya talega, “Mo kakua ni laba.” Ni kevaka mada ga o sega ni veibutakoci, o sa yaco mo daubasulawa ga kevaka o sa ia ga na laba.

¹² Mo ni vosa kina ka matanataka na i valavala ni bula sa kilikili kei ira sa vakarau lewai mai na lawa sa sereki keda,

¹³ baleta ni na sega ni vakatakila na Kalou na nona yaloveivosoti vua na tamata sa sega vua na yaloveivosoti ena gauna ni veilewai; ni sa uasivi cake na yaloveivosoti mai na veilewai.

Na Vakabauta kei na Cakacaka

¹⁴ Oi kemuni na wekaqu, a cava na kena yaga kevaka e kaya e dua na tamata ni sa tu vua na vakabauta ka qai sega vua na cakacaka? Ena rawa li ni vakabulai koya na nona vakabauta?

¹⁵ Me da kaya mada ni sa sega tu na nona i sulu e dua vei ira na wekada tagane se yalewa, ka sega ni veirauti na kena kakana.

¹⁶ A cava beka na kena yaga kevaka o ni sa kaya ga vua, “Me vakalougatataki iko na Kalou! Au nuitaka ni o qarauni vinaka mai na batabata ka kana tiko vakavinaka!” — ka sega ni qai solia vua na veika e gadreva me baleta na nona bula ena veisiga?

¹⁷ Sa vaka talega kina na vakabauta: kevaka sa tu vakai koya ga ka sega ni cakacakataki, sa mate ga.

¹⁸ Ia ena kaya beka e dua, “Sa tu vei iko na vakabauta, ka sa tu vei au na cakacaka.” Au na sauma vakaoqo, “Vakaraitaka mai vei au na nomu vakabauta sa sega na kena cakacaka, ka'u na qai vakaraitaka vei iko na noqu vakabauta mai na veika au vakayacora.”

¹⁹ O ni sa vakabauta ni sa duabau ga na Kalou. Vinaka! Era sa vakabauta talega oqo na tevoro, ka ra sa sautaninini ga ena rere.

²⁰ Na tamata lecaika o iko! O vinakata li me vakatakilai vei iko ni sa tawayaga walega na vakabauta sa sega ni cakacakataki?

²¹ E a yaco vakacava vei Epara-ama na noda qase me vakadonui koya na Kalou? Ena vuku ga ni ka e vakayacora, ena nona a vakacabori Aisake na luvena ena dela ni cabocabonisoro.

²² Sa raici rawa eke ni rau sa cakacaka vata na nona vakabauta kei na nona cakacaka, ni sa qai vakataucokotaki na nona vakabauta ena vuku ni veika sa vakayacora.

²³ Sa qai vakayacori kina na vosa ni Vola Tabu ni sa kaya, “A sa vakabauta na Kalou o Epara-ama, ka sa vakadonui koya na Kalou me tamata i valavala dodonu ena vuku ni vakabauta.” Sa qai vakatokai kina o koya me i tokani ni Kalou.

²⁴ O ni sa qai raica kina, ni sa vakadonui na tamata ena vuku ni nodra cakacaka, ka segai ena vuku ni vakabauta duadua ga.

²⁵ Sa vaka talega kina o Reapi na yalewa dautagane. A sa vakadonui koya na Kalou ena vuku ni cakacaka sa vakayacora, ena nona a maroroi rau na yamata ni Isireli ka vukea me rau dro bula ena sala tani.

²⁶ Me vaka ni sa mate na yago ni sa sega na yalo, sa mate vakakina na vakabauta ni sa sega na kena cakacaka.