Isikeli 9 - Vakavakadewa Vou kei na iVola tale eso

Sa Cudruvi o Jerusalemi

¹ A qai kaci vakadomoilevu e daligaqu o koya, ka kaya, “Mo ni toro voleka mai, oi kemuni o ni na totogitaka na koro oqo, ia me ra dui taura yadudua e ligana na nona i yaragi ni veivakamatei.”

² Raica, e ratou sa lako mai e lewe ono na tamata mai na matamata ni koro e cake, vaka ki na vualiku, e ratou sa dui taura tu e ligana na i yaragi ni ravuravu; ia e dua vei iratou na tagane a vakaisulu ena lineni, ka tu vua e dua na kato ni yaya ni volavola. E ratou a curu ki loma, ka la'ki tu e mata ni cabocabonisoro parasa.

³ Ia na lagilagi ni Kalou i Isireli sa tubu cake mai na dela ni jerupi, na vanua e a koto kina, ka sa toso yani ki na i curucuru ki na Valenisoro. A sa qai kacivi koya sa vakaisulu lineni ka toka e dua na kato ni volavola na Kalou,

⁴ ka sa qai kaya vua, “Mo lako yani ki na loma ni koro, ena loma i Jerusalemi, ka vola e dua na i vakatakilakila ena qaqa ni yadredra na tamata era sa vutugu ka qolouvaka na veika vakasisila kecega sa caka e loma ni koro.”

⁵ Ia vei ira tale eso, a kaya o koya ni'u sa rogoca tiko, “Ni muri koya yani ki loma ni koro, ka ravuravu; me kakua ni veivosoti na matamuni, ka kakua talega ni o ni yalololoma.

⁶ Ni vakamatei ira sa qase sara, na cauravou, na gone yalewa, na gone lalai, kei ira na yalewa. Ia ni kakua ga ni tara e dua sa makataki tu na yadrena. Mo ni tekivu ravuravu ena vanua oqo, ena noqu Valenisoro.” Era a qai tekivu ravuti ira na tamata qase, o ira era tu ena mata ni Valenisoro.

⁷ A kaya vei ira o koya, “Ni vakadukadukalitaka na Valenisoro, ka vakasinaita na lomanibai vei ira na sa moku. Ni lako yani!” Era sa lako yani ka veivakamatei ena koro.

⁸ Ia ni ra ravuravu tiko kei na veivakamatei, au a vo duadua tikoga oi au, ka'u qai bale vakatoboicu ka tagi, ka kaya, “Isa, na noqu Turaga na Kalou! O ni na vakarusa li na veika kecega sa vo tu e Isireli ni o ni sa sovaraka kece na nomuni cudru ki Jerusalemi?”

⁹ A kaya vei au o Jiova, “A nodra caka cala na Isireli kei Juta sa vakaitamera dina. Sa robota na vanua na dra, ia na koro sa sinai tu ena ka e tawa dodonu kei na veivakaucacataki; ni ra sa kaya, ‘Sa biuti vuravura o Jiova, ka sa sega ni raica rawa o koya.’

¹⁰ Ia oi au, ena sega talega ni veivutuni na mataqu, au na sega talega ni yalololoma, ka'u na sauma vei ira na veika era sa vakayacora vakatani vei ira tale eso.”

¹¹ Raica, sa mai tukutuku tale na tamata vakaisulu lineni, ka taura tu na nona kato ni yaya ni volavola, ka kaya, “Au sa cakava me vaka o ni sa vakarota vei au.”