Isikeli 8 - Vakavakadewa Vou kei na iVola tale eso

Na i Karua ni Raivotu i Isikeli me Baleta na Kalou ( 8.1–10.22 ) Na i Vakarau Tawadodonu Eso ena Valenisoro

¹ Ena i kalima ni siga, ni kaono ni vula, ena i kaono ni yabaki, ena noqu a dabe vata tiko ena noqu vale kei ira na nodra qase na Juta, a sa qai tarai au mai kea na liga i Jiova.

² Ena noqu rai cake, au a qai raica ena raivotu e dua na tamata sa vaka na qilaiso katakata na kena i rairai. Mai na tolona ka lako sobu, sa bukawaqa; mai na tolona talega ka lako cake, sa tatibi me vaka na parasa caliva vinaka.

³ A dodoka mai o koya na i yaloyalo ni dua na liga, ka tauri au ena tobe ni uluqu; a laveti au cake na yalo ena veimama ni vuravura kei na lomalagi, a kauti au ena raivotu ni Kalou ki Jerusalemi, ki na matamata ni koro ki loma ka qara vaka ki na vualiku; a sa tiko mai kina na i tikotiko ni matakau ni vuvu, o koya sa vakatubura na veivuvutaki.

⁴ Raica, sa tu mai kea na i ukuuku ni Kalou i Isireli, me vaka na raivotu ka'u a raica ena buca.

⁵ A qai kaya vei au o koya, “Luve ni tamata, mo tacake mada vaka ki na vualiku.” Au a qai tacake vaka ki na vualiku, ka raica, sa tu na matakau ni vuvu ena i curucuru vaka ki na vualiku ki na i cabocabonisoro.

⁶ A kaya tale vei au o koya, “Luve ni tamata, o sa raica li na ka era cakava tiko? Na veika vakasisila lelevu ka ra vakayacora tiko eke o ira na Isireli, me rawa ni vakauti au tani vakayawa mai na noqu Valenisoro? Ia o na raica e levu cake tale na veika vakasisila.”

⁷ A kauti au o koya ki na katuba ni bai; ia ni'u vakaraica, au a kunea e dua na qara ena bai vatu.

⁸ A qai kaya vei au o koya, “Luve ni tamata, mo kelikeli mada ena bai oqo.” Au sa qai kelia na tikina o ya ni bai vatu ka'u mani raica kina e dua na katuba.

⁹ A kaya vei au o koya, “Mo curu mada ki loma ka raica na veika velavela ka vakasisila era sa vakayacora tiko e loma.”

¹⁰ Au a qai curu kina ka vakaraica; ka'u kunea ni ra sa sinai tu na lalaga kei na vanua e volita na droini ni gata kei na manumanu tawa savasava kei na veimatakau eso era sa qarava voli na Isireli.

¹¹ Era sa tucake tu e matadra o ira na nodra qase na Isireli era lewe vitusagavulu, ka tucake tu ena kedra veimama o Jeasanaia na luve i Safani. Era dui taura tu e ligadra na nodra miqa ni ka boi vinaka, a kuvu cake tu na kubou ni ka boi vinaka.

¹² A sa tarogi au na Kalou, “Luve ni tamata, o sa raica li na ka era dui cakava buto tiko na qase ni Isireli, na tamata yadua ena burekalou ni nodra dui kalou matakau? Ni ra sa kaya, ‘Sa sega ni raici keda o Jiova, sa biuta na vanua o koya.’ ”

¹³ A sa kaya tale vei au o koya, “O na raica e levu cake sara na veika vakasisila era sa vakayacora.”

¹⁴ A qai kauti au o koya ki na matamata vaka ki na vualiku ni Valenisoro ka vakaraitaka vei au na yalewa eso era dabe voli e kea ka lolositaki Tamusi tiko.

¹⁵ A qai kaya vei au, “Luve ni tamata, o sa raica li na ka oqo? Ena levu cake tale na veika vakasisila o na raica mai na kena oqo.”

¹⁶ Sa qai kauti au o koya ki na lomanibai ni Valenisoro; ka raica, sa tiko ena katuba ni i tikotiko vakaturaga ena kedrau tadrua na i curucuru kei na i cabocabonisoro, era a tiko kina e rauta ni lewe 25 na tagane. Era a duri vakanadaku tu ki na i tikotiko vakaturaga, ka ra vakanamata vaka ki na tokalau ka sokalou ki na matanisiga.

¹⁷ A qai kaya vei au o koya, “O sa raica li oqo, o iko na luve ni tamata? Sa ka wale beka vei ira na mataqali o Juta me ra cakava na veika vakasisila e ke? Ni ra sa vakasinaita na vanua ena i valavala kaukauwa, ka qai levu cake na nodra vakacudrui au? Raica, era sa ciqira na tabanikau ki na ucudra!

¹⁸ O koya oqo, ka'u na vakayaco-ka kina ena cudru. Au na sega ni vakavoca na nodra bula ka'u na sega talega ni yalololoma vei ira. E dina ga ni kevaka era sa tagi vakadomoilevu ki daligaqu, au na sega ga ni rogoci ira.