Isikeli 48 - Vakavakadewa Vou kei na iVola tale eso

Votavota Vakamataqali

¹ Sa vakaoqo na yacadra na veimataqali: Me vakatekivu mai na i yalayala ena vualiku, ka muria na baravi ena sala ki Eciloni ki na i curucuru ki Emaci me yaco sara ki Esarienoni ka koto ena i yalayala kei Tamasiko vaka ki na vualiku ka yala ki tai ka dua mai Emaci, ka dodo na i yalayala mai na yasayasa vakatokalau vaka ki na ra, sa nei Tani e dua na i votavota.

² Sa veitaravi na i yalayala i Tani mai na yasayasa vaka ki na tokalau ka yala ena yasana vaka ki na ra, sa nei Aseri e dua na i votavota.

³ Sa veitaravi na i yalayala ni vanua i Aseri, mai na yasana ki na tokalau ki na ra, sa nei Navitalai e dua na i votavota.

⁴ Sa veitaravi kei na i yalayala i Navitalai, mai na yasana ki na tokalau ka yala ki na yasana vaka ki na ra, sa nei Manasa e dua na i votavota.

⁵ Sa veitaravi kei na i yalayala i Manasa, mai na yasana vaka ki na tokalau ka yala ki na yasana vaka ki na ra, sa nei Ifereimi e dua na i votavota.

⁶ Sa veitaravi kei na i yalayala i Ifereimi, mai na yasana ena tokalau, ka yala ki na yasana ki na ra, sa nei Rupeni e dua na i votavota.

⁷ Sa veitaravi kei na i yalayala i Rupeni mai na yasana vaka mai na tokalau, ka yala ki na yasana vaka ki na ra, sa nei Juta, e dua na i votavota.

⁸ Sa veitaravi kei na i yalayala ni vanua i Juta mai na yasana vaka ki na tokalau ka yala ki na yasana vaka ki ra, sa kena i sevu ni vanua mo ni solia me kovuti, e 12.5 na kilomita na kena raraba, ia na kena balavu me tautauvata kei na dua vei ira na votavota vakamataqali, mai na yasana vaka ki na tokalau ka yala ki na yasana vaka ki na ra: ia na tikina tabu sa koto e lomadonu.

⁹ Ia e dua na tikina ena loma ni vanua oqo me soli vei Jiova, ka me 12.5 na kilomita na kena balavu ka 10 na kilomita na kena raba.

¹⁰ O ira na bete me ra vakaivotavota mai na tiki ni qele oqo. Me vakarautaki na nodra tikina me 12.5 na kilomita mai na tokalau ka yaco sara ki na ra, ka me 5 na kilomita mai na vualiku me yaco sara ki na ceva. Na Valenisoro i Jiova e kilikili me toka ena lomadonu ni tikina tabu oqo.

¹¹ Ia oqo ena nodra na bete sa vakatabui ka ra luve i Setoki, o ira ka ra vakaitavi tikoga ena noqu cakacaka ka ra sega ni lako sese ena gauna era lako sese kina na Isireli, me vaka ni ra sa cala kina o ira na Livai.

¹² Ia me sa nodra na tikina oqo, ni sa tikina digitaki mai na Tikina Tabu Sara ka veitaravi kei na nodra i yalayala na Livai.

¹³ Ia na nodra na Livai e koto veitaravi kaya na nodra i votavota na bete, ka 12.5 na kilomita na kena balavu, ka 5 na kilomita na kena raba. Ia na kena balavu taucoko sa 12.5 na kilomita, ka kena raba e 10 na kilomita.

¹⁴ Ia me ra kakua sara ni volitaka, se veisautaka me sosomitaki ena dua tale na tikina; ia me kakua ni dua na vulagi me tiko ena tiki ni vanua digitaki oqo, ni sa tabu me nona o Jiova.

¹⁵ Ia na kena vo, o ya e 2.5 na kilomita na kena balavu, sa na tu me ra vakayagataka ena koro, me tara kina na veivale kei na i bili talega. Ia na koro me tu sara ga e lomadonu;

¹⁶ ka sai koya oqo na kena i vakarau: ena yasana vaka ki na vualiku me 2.25 na kilomita kei na tikina vaka ki na ceva me 2.25 kei na tikina vaka ki na tokalau me 2.25.

¹⁷ Ia me tu na vanua galala ena koro me kena i bili: ki na yasana vaka ki na vualiku me 125 na mita, ki na yasana vaka ki na ceva me 125, ki na yasana vaka ki na ceva me 125 na mita ka rua na 125 na mita vaka ki na ra.

¹⁸ Ia na vo ni kena balavu sa donuya na i sevu tabu me lima na udolu na mita vaka ki na ra: ka me donuya na i sevu tabu. Ia na kena vua ni qele kei na vuata sa kedra kakana era qarava na koro.

¹⁹ Ia me ra vakaitavi ena veiqaravi ni koro, o ira na veimataqali i Isireli, me ra tea talega.

²⁰ Na tikina taucoko o ni sa vota vakatikitiki sa na vakatautauvata ena yasana vava ka na 12.5 na udolu na mita, o ya na tikina tabu vata kei na kena sa taukena na koro.

²¹ Ia na tikina sa qai vo mai na yasa ruarua ni sevu tabu, kei na vanua sa taukena na koro, me sa nona na turaga. Me tekivu yani mai na i sevu tabu ka 12.5 na udolu na mita na i yalayala ena tokalau, ka 12.5 na udolu na mita vaka ki na ra na kena i yalayala, me lako veidonui kei na i votavota vakamataqali ka sa nona na turaga. Me koto sara e lomadonu na tikina tabu kei na Valenisoro,

²² kei na nodra i votavota na Livai; ia na tikina me taukena na koro me koto e lomadonu ni vanua sa taukena na turaga. E koto na vanua ka taukena na turaga ena kedrau tadrua na vanua o Juta kei na nodra i votavota na Penijamini.

²³ Ia me baleti ira na vo ni veimataqali: me vakatekivu mai na yasana ki na tokalau, ka yala ki na yasana ki na ra, o Penijamini, e dua na nona i votavota.

²⁴ Sa veitaravi kei na i yalayala i Penijamini, mai na yasana vaka ki na tokalau vaka ki na ra, o Saimoni, e dua na nona i votavota.

²⁵ Sa veitaravi kei na yalayala i Saimoni, mai na yasana vaka ki na tokalau, ka yala ki na yasana vaka ki na ra, me nei Isakari e dua na i votavota.

²⁶ Sa veitaravi kei na i yalayala i Isakari, mai na yasana vaka ki na tokalau, ki na yasana vaka ki na ra, me nei Sevuloni e dua na i votavota.

²⁷ Sa veitaravi kei na i yalayala i Sevuloni mai na yasana vaka ki na tokalau vaka ki na ra me nei Kata, e dua na i votavota.

²⁸ Sa veitaravi kei na i yalayala i Kata ki na yasana vaka ki na ceva, sa cici na i yalayala mai Tema ki na wai o Katesi, ka qai muria na i yalayala kei Ijipita mai na vua-i-ra me yaco ki na Wasa Meditereni.

²⁹ Sa i koya oqo na vanua mo ni vota me dui nodra i votavota na veimataqali i Isireli, ka sai ira oqo na nodra i votavota e vuqa, sa kaya na Kalou o Jiova.

Matamata ni Koro

³⁰ Sa i ira oqo na matamata ni curu tani yani mai na koro: Ena yasana vaka ki na vualiku, ka sa 2,250 na mita na kena i vakarau, me tolu na matamata ni koro,

³¹ na matamata i Rupeni, na matamata i Juta, kei na matamata i Livai, ka sa vakatokai ena yacadra na mataqali i Isireli.

³² Ia mai na yasana vaka ki na tokalau me sa 2,250 na mita me tolu na matamata ni koro, e dua na matamata ni koro i Iosefo, e dua na matamata ni koro i Penijamini, ka dua na matamata ni koro i Tani.

³³ Ena yasana talega vaka ki na ceva, me 2,250 na mita ni vakarau, me tolu na matamata ni koro, e dua na matamata ni koro i Simione, e dua na matamata ni koro i Isakari, ka dua na matamata ni koro i Sevuloni.

³⁴ Ena yasana vaka ki na ra, ka me 2,250 na mita na kena i vakarau, me tolu na matamata ni koro, na matamata ni koro i Kata, na matamata ni koro i Aseri, kei na matamata ni koro i Navitalai.

³⁵ Ia na kena balavu vakavolivolita na koro me sa na 9,000 na mita. Ia na yaca ni koro me vakatekivu mai na siga o ya, o Jiova sama.