Isikeli 47 - Vakavakadewa Vou kei na iVola tale eso

Na Wai Drodro mai na Valenisoro

¹ A sa kauti au tale o koya ki na daku ni katuba ni Valenisoro. A sa dave tiko na wai mai na ruku ni katuba ni Valenisoro ka drodro sobu vaka ki na tokalau (ni sa vuki vakakina ki na tokalau na Valenisoro). A sa drodro sobu tiko na wai mai na mua ni katuba ni Valenisoro vaka ki na ceva, mai na yasa ni cabocabonisoro.

² Sa qai kauti au yani na tamata ena sala ni matamata ni koro e donuya na vualiku, ka tuberi au voli ena sala e tautuba ki na matamata ni koro ki sau, ena sala sa qara donu ki na tokalau, ka drodro tiko na wai mai na yasana vaka ki na ceva.

³ Ni sa lako yani vaka ki na tokalau na tamata, sa taura tu e ligana na gasau ni vakarau, a sa vakarautaka e 500 na mita, ka tukuna vei au maikea me'u taubale takosova na uciwai. Na i yalayala ni wai sa yacova ga na noqu qurulasawa.

⁴ A sa vakarautaka tale o koya e 500 na mita, ka sa yaco sara ki duruqu na levu ni wai. Ni sivi tale yani e 500 na mita, sa la'ki yacova sara ki toloqu na levu ni wai.

⁵ A sa qai vakarautaka tale e 500 na mita, ka sa titobu sara na uciwai ka'u sa sega ni taubale rawa kina. Na rui titobu ka sa rawa ga ni qalovi takoso.

⁶ A sa kaya vei au, “Luve ni tamata, mo vakadikeva vinaka sara na ka oqo.” A qai kauti au lesu tale o koya ki na bati ni uciwai.

⁷ Ia ni'u lesu yani ki kea, ka'u a raica ni sa tubu tu ena bati ni uciwai ruarua e levu sara na vunikau.

⁸ A kaya vei au o koya, “Na wai drodro oqo sa dave yani ki na yasayasa vakatokalau, ka drodro sobu ki na Buca na Joritani ka yaco sara ki na Waitui Mate. Ni sa drodro yani ki na Waitui Mate, a sa vakaisosomitaka kina na wai tuituina ni wasawasa o ya ena wai bulabula.

⁹ Ena veivanua ga e drodrova na wai, era na bula cake mai kina na veimataqali manumanu kei na ika. Na wai drodro oqo ena vakabulabulataka na Waitui Mate, ka na vakayaco bula ena veivanua kece e drodrova.

¹⁰ Ia era na tu e bati ni wasawasa o ira na gonedau; ena yaco me vanua ni tala lawa me vakatekivu mai Eniketi ka yala ki Eniekileimi; ena vuqa sara na veimataqali ika ena rawa mai kina me vaka na ika ni Wasa Meditereni.

¹¹ Ia ena sega ga ni wai dranu na wai ki na kena veitikina lolobo, ka qiloni tu; ena biu tu ga me rawa kina na masima.

¹² Ia era na tubu ena bati ni uciwai ruarua na veimataqali kau me laukana. Ena sega ni malai na drauna, se me vuavuai ca; era na sobi tikoga na vuadra ena veivula, ni sa vure na wai ni uciwai mai na tikina tabu. Era na laukana na vuanikau, ia na drauna ena wai ni veivakabulai.”

Yalayala ni Vanua

¹³ A kaya vakaoqo na Kalou o Jiova: “Sa i koya oqo na i yalayala ni veivanua o ni na vota na veimataqali i Isireli e tini karua, me nodra i votavota. Me nei Iosefo e rua na i votavota.

¹⁴ Ia mo ni wasewasea sara vakatautauvata; au a bubului me'u na solia vei ira na nomuni qase, ka sa na lutu ki na ligamuni na vanua oqo me nomuni votavota.

¹⁵ “Sa i koya oqo na i yalayala ni vanua: Ena tikina vaka ki na vualiku mai na Wasa Meditereni ena sala ki Eciloni ki na i curucuru ki Emaci ka lako yani vaka ki Sitati,

¹⁶ ki Beroca, ki Sipireimi, ka koto ena kedrau i yalayala o Tamasiko kei Emaci me yaco sara yani ki na koro o Eisatikoni, ka koto ena i yalayala ki Aurani.

¹⁷ Ena kena i yalayala mai na waitui ki Esarienoni, ka koto ena i yalayala kei Tamasiko vaka ki na tokalau, ka sa kena i yalayala o Emaci vaka ki na vualiku. Ia oqo na kena i yalayala ena yasana ki na vualiku.

¹⁸ “Ia ena yasana vakatokalau, sa cici mai na i yalayala mai Asarienoni ena kedrau veimama o Aurani kei Tamasiko; ka muria na Joritani ena kedrau tadrua o Kiliati kei na vanua o Isireli; kei na wasawasa vakatokalau me yaco sara ki Tema. Oqo na kena i yalayala ena yasa ki na tokalau.

¹⁹ “Ia ena yasana ki na ceva, ena tekivu mai Tema ka yaco sara ki Katesi Meripa, ka muria yani na i yalayala kei Ijipita mai na vua-i-ra me yaco ki na Wasa Meditereni.

²⁰ Ia ena kena i yalayala ki na ra, ena kena i yalayala na Wasa Meditereni ka lako cake vaka ki na vualiku ki na dua na vanua ena ra ni curucuru ki Emaci.

²¹ “Ia mo ni vota na vanua oqo vei kemuni me vaka na veimataqali e Isireli.

²² Mo ni sa na vota me i votavota me nomuni kei ira na vulagi era tiko kei kemuni, ka ra sa vakaluveni kei kemuni. Ia me ra tautauvata o ira kei kemuni na Isireli sucu i taukei dina; era sa na vakaivotavota vata kei kemuni ena veimataqali e Isireli.

²³ Ia mo ni vota vei ira na nodra i votavota ena mataqali cava ga era tiko vulagi kina,” sa kaya na Kalou o Jiova.