Isikeli 46 - Vakavakadewa Vou kei na iVola tale eso

Na Ravouvou kei na Solevu Eso

¹ Sa kaya vakaoqo na Kalou o Jiova: Na matamata ni koro ena lomanibai e loma sa donuya na tokalau me sogo tu ena siga ni cakacaka e ono; ia me dau qai dola ga ena Siga ni Vakacecegu kei na Solevu ni Vula Vou.

² Na ravouvou e veiliutaki ena lako mai tautuba ka curu yani ki na i curucuru ni matamata ni koro, ka duri tu ena yasa ni duru ni matamata. O ira na bete era na cabora na nona i soro kama kei na nona i madrali, ka me cuva sobu ena katuba ni matamata ni koro. Ia me na qai suka tale yani o koya ki tautuba, ia ena sega na sogo na matamata ni koro me yacova na yakavi.

³ O ira talega na lewenivanua me ra cuva sobu ka sokalou vei Jiova ena katuba ni matamata ni koro ena Siga ni Vakacecegu yadua kei na Solevu ni Vula Vou yadua.

⁴ “Ena Siga ni Vakacecegu, me qai kauta mai na ravouvou vei Jiova na i soro kama me vakamai taucoko e ono na lami kei na dua na sipi tagane sa sega ni dua na ka e ca kina;

⁵ ia na i madrali laukana ka caka vata kei na sipi tagane me dua na efa; ia na i madrali laukana me caka vata kei na lami me vakatau ga ki na ka sa rawata, ka me tini na paidi na waiwai vata kei na dua na efa.

⁶ Ena Solevu ni Vula Vou, me vakacabora o koya e dua na luve ni bulumakau tagane ka sega ni dua na ka e ca kina, e ono na lami, kei na dua na sipi tagane ka sega ni dua na ka era ca kina;

⁷ ia me i madrali laukana, me vakarautaka o koya e dua na efa me caka vata kei na bulumakau, kei na dua na efa me caka vata kei na sipi tagane, ka me vakatau ga ki na levu ni ka sa rawata o koya me caka vata kei ira na lami, vata kei na tini na paidi na waiwai me caka vata kei na dua na efa.

⁸ Ia ni sa curu mai na luvenitui, me muri mai ena sala ni katuba ni matamata ni koro, ia na sala vata talega o ya me muria ni sa lako ki tautuba.

⁹ “Ia ni ra sa lako mai na lewe ni vanua ki na mata i Jiova ena gauna ni solevu tabu, o koya ka curu mai ena matamata ni koro vaka ki na vualiku me la'ki lotu, me muria na sala ki na matamata ena ceva ni sa lako yani ki tautuba; ia o koya sa curu mai na matamata ni koro ena ceva me la'ki lotu, me muria na matamata vaka ki na vualiku ni sa curu ki tautuba: ia me kakua sara ni dua me muria tale na katuba ni matamata ka a curu mai kina, ia me lako vakadodonu ga ki liu ka la'ki curu ena sala sa donuya.

¹⁰ Ia ni ra sa curu mai, me ra curu vata talega yani kei na luvenitui; ia ni ra sa curu ki tautuba me curu vata talega yani kei ira o koya.

¹¹ Ena veisolevu kei na gauna tabu, na i madrali laukana me na tinikavitu veimama na lita kei na dua na bulumakau gone se luve ni sipi tagane, ka okati vata kina na veika cava ga e vinakata me solia vata mai o koya e vakacabora, me na dau cabori vata tiko kei na i madrali laukana kece sara e tau yatolu na lita na waiwai olive.

¹² “Ia ni sa via solia o koya na luvenitui e dua na i madrali ni loma soli, se me i soro kama, se i madrali ni veivinakati, me i madrali ni loma soli vei Jiova, me qai dolavi vua na matamata ni koro sa qara vaka ki na tokalau; ia me cabora o koya na nona i soro kama, se na nona i madrali ni veivinakati, me vaka sa dau cakava o koya ena Siga ni Vakacecegu. Ia ni sa qai lako ki tautuba, ka me qai sogo na matamata ni koro ni sa lako yani o koya.”

Madrali ni Veisiga

¹³ “Ia me vakarautaka o koya na luve ni turaga e dua na lami sa yabaki dua, ka sega ni dua na ka e ca kina me caka ena veisiga me i soro kama vei koya na Turaga; me caka oqori ena veimataka kece.

¹⁴ Me vakarautaka o koya na luve ni turaga na i madrali laukana ena veimataka kecega, e rua na kilokaramu valawa kei na dua na lita na waiwai olive me natuki vata; oqo na i lesilesi ni madrali laukana ka me cabori tikoga vei Jiova ka tawa mudu.

¹⁵ Ia me ra vakarautaka vakaoqo na lami, kei na i madrali laukana, kei na waiwai ena veimataka kecega, me i soro kama sa dau caka tikoga.”

¹⁶ Sa kaya vakaoqo na Kalou o Jiova: “Ia kevaka sa solia e dua na nona ka ni loloma na luvenitui vua e dua vei ira na luvena, mai na nona i votavota, era na taukena oqo na luvena ka sa nodra i votavota.

¹⁷ Ia kevaka sa solia o koya e dua na ka ni loloma mai na nona i votavota vua e dua vei ira na nona tamata, ena nona tikoga na tamata o ya me yacova na yabaki ni veisere; ia ena qai suka tale vua na turaga; me ra taukena wale ga na luvena na i loloma ka soli mai na nona i votavota.

¹⁸ Ia me kakua tale ni kovea na turaga na nodra tiki ni vanua na tamata, me vakasavi ira tani mai kina mai na ka era sa taukena; ia me solia ga o koya eso na nona tiki ni vanua me ra taukena na luvena, me kakua kina ni kaliraki tani mai vei ira na noqu tamata na ka era sa taukena.”

Na Vale ni Vakasaqa ni Valenisoro

¹⁹ Sa qai kauti au o koya ki na i katuba, ka koto ena tutu ni matamata ni koro, ki na i yatu vale nodra na bete sa donuya na mata ni vualiku; ka'u na qai la'ki raica e kea e dua na tikina ena muana sara vaka ki na ra.

²⁰ Sa qai kaya vei au o koya, “Oqo na nodra tikina na bete, me ra vakasaqara kina na i soro ni caka cala, kei na i soro ni valavala ca, me ra vavia talega kina na i madrali laukana; me rawa ni ra kakua ni kauta kina ki na lomanibai ki taudaku, me vakatabui ira kina na tamata.”

²¹ Sa qai kauti au o koya ki na lomanibai e taudaku, ka tuberi au voli ki na tutu vava ni lomanibai; sa tau donuya na lomanibai ena tutuna yadua.

²² Ena tutu vava ni lomanibai, sa yadua kina na kena lomanibai lalai, sa ruasagavulu na mita na kena balavu ka tolusagavulu na kena raba; e ratou tautauvata vava na kedratou lelevu.

²³ E loma, sa viri tu kina na bai vatu me volita na lomanibai vava, ka caka na kena matadravu ena boto ni yatu ka volita.

²⁴ A qai kaya vei au o koya, Oqo na veivale ni kuro ka ra dau vakasaqara kina na nodra i madrali na tamata ka ra qarava na Valenisoro.