Isikeli 45 - Vakavakadewa Vou kei na iVola tale eso

Votai ni Vanua

¹ Ia ni o ni sa vota na vanua mo ni taukena mo ni vakatabuya tiko e dua na tikina me i sevu vei Jiova me i votavota tabu ni vanua: na kena balavu e 12,500 na mita, ka 10,000 na mita na kena raba. Ena tabu na vanua oqo me vaka sa kovuta na kena i yalayala.

² Mai na tiki ni vanua oqo, me kovuti kina e dua na tikina me baleta na Valenisoro, me 250 na mita na kena balavu, ka 250 na mita na kena raba; ka me volita e dua na vanua lala me kena i bili ka me 25 na mita ena veiyasana.

³ E dua na veimama ni tikina oqo me na viribaiti toka, ka me 12.5 na kilomita na kena balavu ka 5 na kilomita na kena raba; ena vakotori kina na Valenisoro, na tikina tabu duadua.

⁴ Oqo ena okati me vanua tabu ni vanua, sa wasei tani me nodra na bete era sa veiqaravi ena Valenisoro. Ena tara e loma na nodra vale kei na tikina me tara kina na Valenisoro.

⁵ Ena i karua ni veimama ni tikina oqo me qai wasei tani me nodra i votavota na Livai, o ira sa dau vakaitavi ena Valenisoro. Ena tiko kina na koro eso me ra tiko kina.

⁶ Ena yasa ni i votavota tabu, me qai wasei tani e dua na tikina, me 12.5 na kilomita na kena balavu ka 2.5 na kilomita na kena raba, ka me ra na wasea vata kece o ira na Isireli.

Nona i Votavota ni Vanua na i Liuliu ni Matanitu

⁷ Me qai wasei tani talega e dua na nona tiki ni vanua o koya sa liutaka tiko na matanitu. Mai na i yalayala ni votavota tabu mai na ra, ena toso yani vaka ki na ra ni Wasa Meditereni; ia mai na i yalayala mai na tokalau, ena toso yani ki na yalayala ni matanitu mai na tokalau, me rawa kina ni tautauvata vinaka na kedra balavu kei na kena sa votai vei ira na mataqali i Isireli.

⁸ Oqo me nona i votavota o koya sa liutaka tiko na matanitu ena vanua o Isireli, me kakua kina ni vakasaurarataki ira tale na tamata, ka me vakadonuya talega me ra wili ki na mataqali o Isireli na vo ni veivanua.

⁹ Sa kaya vakaoqo na Kalou o Jiova: Oi kemuni na dauveiliutaki e Isireli, sa rauta mada! Ni muduka na nomuni i valavala kaukauwa kei na veivakacacani. Ni vakayacora mada na caka dodonu kei na lewa dodonu. Ni tarova na nomuni dau vakatalai ira tani na noqu tamata. Ni sai au ga o Jiova ka'u sa kaya oqo.

¹⁰ “Na tamata kece sara me vakayagataka na i vakarau-ni-bibi kei na i vakarau-ni-ka e dina ka dodonu:

¹¹ “Na veika e mamaca sa vakarautaki ena efa e dodonu me tautauvata vinaka kei na vakarautaki ni veika e vakawai ka vakarautaki ena paca. A kena i vakarau tudei sa dau vakarautaki ena omeri. Na macala ni kena vakarautaki na ka e sa vakaoqo: 1 na omeri=10 na efa=10 na paca

¹² “Na nomuni i vakarau ni bibi e dodonu me vakaoqo: 20 na kera=1 na sikeli 60 na sikeli=1 na maina

^13-15 “Sa i koya na i vakarau ni ka mo ni dau vakacabora: Na Witi: e dua na i ka 60 (1/60) ni veika o ni tamusuka Na Barile: e dua na i ka 60 (1/60) ni veika o ni tamusuka Na Waiwai olive: e dua na i ka 100 (1/100) ni veika e rawati mai na vunilolo (Mo vakarautaka ena paca 10 na paca=1 na omeri=1 na kori.) Na Sipi: 1 na sipi mai na vei-ya 200 ena lomanibai ni sipi e Isireli “Oqo na i madrali me baleta na i madrali laukana, na veisoro kama, na veimadrali ni veivinakati, me ra sorovaki kina, sa kaya na Kalou o Jiova.

¹⁶ “O ira kece na lewe ni vanua me ra na kauta na i madrali oqo vua na dauveiliutaki e Isireli.

¹⁷ E nona i tavi me vakarautaka na manumanu me i soro kama, kei na i madrali laukana, kei na madrali gunuvi ena Solevu ni Vula Vou kece, ena Siga ni Vakacecegu, kei na veisolevu digitaki kecega ni mataqali i Isireli. Ena vakarautaka o koya na i soro ni valavala ca, na i madrali laukana, na i soro kama, kei na i madrali ni veivinakati, me sorovaki kina na nodra i valavala ca na Isireli.”

Na Veisolevu Tabu

¹⁸ Sa kaya vakaoqo na Kalou o Jiova: “Ena i matai ni siga ni matai ni vula, mo ni qai vakacabora kina e dua na luve ni bulumakau tagane sa sega ni dua na ka e ca kina, me vakasavasavataki kina na Valenisoro.

¹⁹ Ia me kauta na bete eso na dra ni soro ni valavala ca, ka kureitaka ki na duru ni sogo ni Valenisoro, kei na tutu vava ni rara ni cabocabonisoro, kei na duru ni matamata ni koro ni lomanibai e loma.

²⁰ Ia mo kitaka vaka talega kina ena i kavitu ni siga ni vula, ena vukudra yadua sa caka cala, ena vakacalaka se ena lecaika; ia mo ni sorovaka vakaoqo na Valenisoro.

²¹ “Ena i katinikava ni siga ni matai ni vula, mo ni qai tekivuna kina na Solevu ni Lakosivia, ia me siga vitu me laukana kina na madrai sega ni vakatubu.

²² Ena siga o ya, me qai vakarautaka kina na luve ni tui, ena vukuna, ena vukudra kece talega na lewe ni vanua e dua na bulumakau gone me i soro ni valavala ca.

²³ Ia ena siga vitu ni solevu, me sa na vakarautaka o koya me i soro kama vei Jiova, e vitu na bulumakau gone, ka vitu na sipi tagane ka sega ni dua na ka e ca kina, ena veisiga yadua me siga vitu, ka dua talega na me tagane ena kena veisiga, me i soro ni valavala ca.

²⁴ Ia me vakarautaka o koya e dua na i madrali laukana, e yadua na efa me caka vata kei na bulumakau yadua, ka me tini na paidi na waiwai me caka vata kei na dua na efa.

²⁵ “Ena i katini kalima ni siga ni kavitu ni vula, ena kena solevu bogi vitu, me qai kitaka vaka talega kina na tui, me vaka na i soro ni valavala ca, na i soro kama, ka vakakina na i madrali laukana, kei na kena waiwai.”