Isikeli 41 - Vakavakadewa Vou kei na iVola tale eso

Na Yalo Savasava

¹ Sa qai kauti au o koya ki loma ni Valenisoro, ka vakarautaka na duru, a sa tolu na mita na raba ni yasana ruarua.

² Ia na raba ni katuba sa lima na mita; ia na yasa ruarua ni katuba sa 2.5 na mita; ka sa vakarautaka o koya na balavu ni lomadonu ni Valenisoro, sa 20 na mita, ka 10 na mita na kena raba.

³ Sa qai curu ki na rumu o koya, ka vakarautaka na duru ni sogo, a sa dua na mita; na raraba ni katuba sa tolu na mita, kei na yasa ni katuba sa 3.5 na mita.

⁴ A sa vakarautaka o koya na balavu ni rumu, ka sa 10 na mita, kei na kena raraba sa 10 na mita ena mata ni Valenisoro. A sa kaya vei au o koya, Sa i koya oqo na Tikina Tabu Sara.

⁵ A qai vakarautaka o koya na lalaga ni Valenisoro, ka tolu na mita na kena vavaku; kei na raba ni rumu ki na yasa ni Valenisoro, sa tauya rua na mita, a sa volita na Valenisoro ena yasana kecega.

⁶ Ia na i taba vale ni rumu sa taba tolu veitaqataqai, ka tauya tolusagavulu na rumu ena dua na i tabavale. E a tokoni tu na veilalaga kece ni yasa ni Valenisoro donuya na rumu me kedra i vakadei.

⁷ Era sa rabailevu cake na rumu ni sa cere cake na veitaba vale ka lako kaya na kena vakalevutaki na kena i taba vale ka volita na Valenisoro. A sa cabe cake e dua vakaoqo mai na i tabavale e ra ki na kena e cake, ka curuma na i tabavale e loma.

⁸ Au a raica talega ni sa volita na Valenisoro e dua na varada; ia na yavu ni rumu e tutu ni Valenisoro sa tolu na mita na kena balavu.

⁹ A kena raba na bai ni taba rumu ki sau, sa rua veimama na mita; ia na tikina sa vo mai ki vale sa savuraka tu sa rua veimama na mita.

¹⁰ Ia ena veimama ni yatu vale kei na lomanibai sa 10 na mita, ka muri volita na Valenisoro ena veiyasana.

¹¹ Era sa dola yani na katuba ni rumu ki na varada ka savuraka tu, e dua na katuba sa qara vaka ki na vualiku, ka dua sa qara ki na ceva, ia na raba ni tikina sa vo ka volita tu sa rauta e rua veimama na mita.

¹² Ia na vale ka qara vaka ki na lomanibai ni Valenisoro ki na tikina ena yasana vaka ki na ra, sa 35 na mita na kena raba; ia na lalaga ni vale sa rua veimama na mita na kena vavaku wavoki, ka 45 na mita na kena balavu.

¹³ A qai vakarautaka na Valenisoro o koya, e 50 na mita na kena balavu, na lomanibai ni vale kei na kena lalaga, sa 50 na mita na kena balavu;

¹⁴ sa vaka talega kina na raba ni vale Tabu mai na tokalau ki na lomanibai, sa 50 na mita.

Na i Tukutuku me Baleta na Valenisoro

¹⁵ A vakarautaka o koya na kena balavu na Valenisoro sa tara tu, ka donuya na lomanibai ka qara ki na yasana vaka ki na ra kei na kena lalaga ena yasana ruarua, sa 50 na mita. Na Tikina Tabu Sara kei na kena rumu e loma, kei na katuba sa vakavonovono volita.

¹⁶ Ka ra vakatuba leka tolutolu ka rawa ni dolavi. Sa botani wavoki ena kau na Valenisoro me vakatekivu mai na katuba ni Valenisoro mai na buturara ka kauta cake ki na katubaleka ka sa sogolati tu oqo;

¹⁷ ka yacova na tikina e dela ni katuba, ka yala sara ki na rumu e loma, e taudaku talega. Ena lalaga kece sara ena tikina e loma, a sa ceuti vinaka koto kina eso na droini e tuvani vakamatau.

¹⁸ A sa ceuti kina na vuni niusawa kei na jerupi, ka me toka e dua na vuni niusawa ena maliwa ni jerupi.

¹⁹ Na vei jerupi kece e tau yarua na matana; e mata vakatamata ena yasana ka qara donuya na niusawa ena yasa ka dua, kei na mata ni laione gone ena kena ka qarava na niusawa ka dua. Era sa ceuti wavokita na vale tabu,

²⁰ me vakatekivu mai na buturara ka yaco ki na ulu ni katuba levu, ka ra ceuti tu ena lalaga na jerupi kei na niusawa se balabala.

²¹ Na duru ni katuba ki na Tikina Tabu sa ta vakarivirivi me tautauvata na tutuna vava. Ena mata ni katuba ki na Tikina Tabu Sara, a sa koto kina e dua na ka sa vaka na i rairai ni

²² cabocabonisoro kau. Sa rauta ni dua veimama na mita na kena cere, ka dua na mita na kena raraba. A sa caka ga ena kau na tutuna, na delana kei na babana. A kaya vei au o koya, “Oqo na teveli sa tu e mata i Jiova.”

²³ E dua na katuba mai na mua kadua ni i curucuru ki na Tikina Tabu, ka tiko talega e dua mai na muana kadua ni i curucuru ki na Tikina Tabu Sara.

²⁴ A sa lobi rua na katuba yadua, a sa rube tu; a sa lobi tu ena katuba e dua, ka lobi rua ena kena ka dua.

²⁵ A ceuti ena katuba ni Valenisoro na i yaloyalo ni jerupi kei na vuni niusawa, me vaka na kena ka ceuti ena lalaga; ka sa dua na i lati kau me i vakaruru ena mata ni katuba e tautuba.

²⁶ Eso na kena katuba leleka, sa ceuti ena drau ni niusawa ena yasa ruarua ni katuba.