Isikeli 40 - Vakavakadewa Vou kei na iVola tale eso

Na Raivotu ni Valenisoro Vou ( 40.1–48.35 ) Sa Kau o Isikeli ki Jerusalemi

¹ Ena i katini ni siga ni vula ena i vakatekivu ni yabaki, ni karuasagavulu kalima ni yabaki ni neimami tiko vakabobula, a oti toka e tini ka va na yabaki mai na kena samu na koro, ena siga dina o ya, a tiko vei au na liga i Jiova,

² ka sa kauti au ena raivotu ni Kalou o Jiova ki na vanua o Isireli, ka vakatikori au ki na dua na dela ni ulunivanua sa cecere sara, ka vaka e tu mai kina na i tuvaki ni dua na koro, ka donui au tu.

³ Ia ni kauti au ki kea o koya, raica sa dua na tamata, na kena i rairai sa vaka na parasa, ka taura tu e ligana e dua na dali kei na dua na gasau ni vakarau; ka sa tucake tu ena matamata ni koro.

⁴ A kaya vei au na tamata oqori, “Luve ni tamata, mo rai e matamu, ka rogo na daligamu, vakasara e lomamu na ka kece ka'u vakaraitaka vei iko; mo tukuna sara na veika kece o sa raica vei ira na mataqali i Isireli.”

Na Matamata ena Tokalau

⁵ Na ka au a raica sai koya na Valenisoro, a sa vakavolivolita e dua na bai. E taura tu e ligana na tamata e dua na gasau ni vakarau ka tolu na mita na kena balavu, a sa vakarautaka kina na bai. Na cere ni bai e tolu na mita ka tolu na mita talega na kena raba.

⁶ A sa qai lako mai o koya ki na matamata ni koro sa qara vaka ki na tokalau. A sa cabeta na kena i kabakaba, ka vakarautaka mai cake na katuba ni matamata ni koro; sa tolu na mita na kena titobu.

⁷ E dakuna, e toka kina e dua na i curucuru ka tiko e yasana ruarua e yatolu na rumu ni yadra. Na rumu yadua e tolu na mita na balavu ni yasana vava, ka sa rua veimama na mita na vavaku ni lalaga e wasewasei ira. Ena daku ni rumu ni yadra, e tiko kina e dua na i curucuru ka tolu na mita na kena balavu, ka sa mua yani ki na dua na i katuba ni matamata-ni-koro e loma ka donuya na Valenisoro.

⁸ Sa vakarautaka talega o koya na katuba ni matamata i koro ki loma, a sa va na mita;

⁹ na i curucuru ni matamata ni koro e dua na mita; ia oqo sa tu ki loma.

¹⁰ Ia sa tau yatolu na rumu ena yasa ruarua ni matamata vaka ki na tokalau; sa tautauvata na kedratou i vakarau tolutolu.

¹¹ A sa vakarautaka o koya na raba ni katuba ni matamata ni koro, e ono veimama na mita, kei na kena balavu e lima na mita.

¹² Sa koto e dua na i lati ena veimama ni rumu, sa 50 na senitimita na yasana ruarua.

¹³ A qai vakarautaka o koya na matamata ni koro mai na daku ni dua na rumu e tutu ni vale ki na daku ni rumu kadua; ia na kena raba sa 12 veimama na mita, mai na katuba oqo ki na katuba o ya.

¹⁴ A vakarautaka o koya na i yatu duru ka sa 10 na mita, ka sa koto wavokita na i yatu duru ena lomanibai.

¹⁵ Na balavu ni vanua mai na mata ni matamata ni koro mai na katuba ka yala ki na katuba ni matamata ni koro ki loma sa 25 na mita.

¹⁶ A sa tiko na katubaleka eso kei na kedra i sogo ena yasa ni lalaga ruarua mai loma ka vakakina e taudaku. A sa ceuti tu na vuni niusawa eso ki na lalaga mai na yasana e loma ka vakanamata yani ki na i curucuru.

¹⁷ A qai kauti au o koya ki na lomanibai ki sau, ka'u raica, sa tu kina na veirumu, ka sa tu e dua na sala rara vatu sa volita na lomanibai. Sa 30 na rumu sa dui donuya tu na sala rara vatu,

¹⁸ ka sa ciciva vakabalavu na tutudra na matamata ni koro na rara vatu ka me tautauvata kei na balavu ni matamata ni koro; sai koya oqo na rara vatu ka lolovira mai na lomanibai e loma.

¹⁹ A qai vakarautaka o koya na raba mai na matamata ni koro era ka yala ki na matamata ni koro ki sau, ni lomanibai e loma, a 50 na mita.

²⁰ A lako e mataqu vaka ki na vualiku, ka raica, sa tu e dua na matamata ka qara vaka ki na vualiku, ka baleta na lomanibai e sau. A vakarautaka na kena balavu kei na kena raba.

²¹ Sa tautauvata kecega na i vakarau ni rumu ni yadra e tolu ena yasa ruarua ni i curucuru, kei na lalaga e wasei ira, kei na kena varada. Na kena balavu sa 25 na mita kei na kena raraba sa 12.5 na mita.

²² Na kedra katuba leleka, na kena varada, kei na kedra vuni niusawa sa vakataka ga na kena sa tiko ena matamata ena tokalau. E koto ena tikina oqo e vitu na i tagede ni kabakaba cake, ka sa toka na kena varada ena muana kadua ka vakanamata ki na lomanibai e loma.

²³ E toka veibasai kei na matamata ena vualiku e dua na matamata ni koro ki na lomanibai e loma, me vaka na kena ki na tokalau; a sa vakarautaka o koya mai na matamata ni koro kadua ki na dua tale, sa 50 na mita.

²⁴ A kauti au o koya vaka ki na ceva, ka raica, sa dua na matamata ni koro sa donuya na ceva; sa vakarautaka na duru ni katuba kei na kena varada, ka ra sa tautauvata na kedra i vakarau.

²⁵ Era sa tu volita na katuba leleka kei na kena varada, me vaka na katubaleka eso; sa 25 na mita na kena balavu, ka tinikarua veimama na kena raba.

²⁶ A sa cabe cake kina e dua na i kabakaba, ka vitu na kena i tagede, ka tu e loma na kena varada; ka ceuti tu na niusawa se balabala ena duru ni katuba ena yasa ruarua.

²⁷ A sa dua na matamata ni koro ena ceva ni lomanibai e loma; ka sa vakarautaka o koya mai na matamata ni koro ki na kena vaka ki na ceva, ka sa 50 na mita.

²⁸ A sa kauti au o koya ki na loma ni bai ki loma ena matamata ni koro ki na ceva, ka sa vakarautaka na matamata o ya, ka sa tautauvata ga kei na kedra i vakarau na so.

²⁹ Na kedra rumu e tutuna, na kedra duru ni katuba, na kedra varada sa tautauvata ga kei ira na so; ka ra sa tu volita kina na katuba leleka, kei na kedra varada; na kena balavu sa 25 na mita, ka 12 veimama na kena raba.

³⁰ Era sa tu volita na kena varada, sa tinikarua veimama na mita na kena balavu, ka tinikarua veimama na mita na kena raba.

³¹ Ia na kena varada sa donuya tu na lomanibai ki sau, ka sa ceuti tu na niusawa se balabala ena kena duru ni katuba, ia na kena i kabakaba sa walu na i tagede.

³² A sa kauti au o koya me keirau curuma na matamata ni koro ena tokalau ki na lomanibai e loma. A sa vakarautaka na matamata, ka sa tautauvata ga na kedra i vakarau.

³³ Na kena rumu e tutuna, na kedra duru ni katuba, kei na kedra varada sa tautauvata ga kei ira tale na so; era sa tu volita na kena katuba leleka ka vakakina na kena varada; ka sa 25 na mita.

³⁴ Sa qaraqara tu na kena varada ki na lomanibai e sau, ka sa ceuti tu na niusawa ena duru ni katuba, rau yadua na tai; dua na kena i kabakaba, ka walu na kena i tagede.

³⁵ Sa kauti au o koya ki na matamata ni koro vaka ki na vualiku, ka sa vakarautaka o koya; sa tautauvata ga na kena levu kei ira tale na so.

³⁶ Na kena rumu e tutuna, na duru ni katuba kei na kedra varada sa tu voli, era tautauvata ga kei ira na so, ka ra vakatuba leleka wavoki; kei na kena balavu e 25 na mita, ka 25 na mita na kena raba.

³⁷ Ia na kena varada sa donuya na lomanibai e sau, ka sa ceuti tu ena niusawa na kedra duru ni katuba, ka tau yadua na yasana ruarua; ia na kena i kabakaba e walu na kena i tagede.

Na Veika e Tara Volekata na Matamata ena Vualiku

³⁸ Sa koto e dua na rumu ena varada ni matamata ni koro, na vanua e dau sava kina na i soro kama.

³⁹ Ia ena katuba ni matamata ni koro sa rua kina na teveli, ena yasana ruarua, me ra vakamatei kina na i soro kama, na i soro ni valavala ca, kei na i soro ni caka cala.

⁴⁰ Ia na yasana ki taudaku, ena katuba ki na matamata ni koro sa donuya na yasana vaka ki na vualiku, sa rua talega kina na teveli; ia ena yasa kadua ni matamata ni koro, sa rua talega kina na teveli.

⁴¹ E va na teveli sa e loma ni vale, ka va talega sa tu ena yasana ki na matamata ni koro, e walu taucoko na teveli era vakamatei kina na i soro.

⁴² Ia sa va talega na teveli ena vatu ta me baleta na i soro kama, ka sa tolu naikava na mita na kena balavu, ka vakakina na kena raba, ka veimama na mita na kena cere: era dau vakotora kina na i yaya ka ra vakamatea kina na i soro kama kei na i soro.

⁴³ Era sa tu na i qaso, ka vaka na raba ni liga ka ra vesu wavoki tu e loma. Ia na teveli sa koto kina na lewe ni manumanu me i soro.

⁴⁴ A kauti au ki tautuba ki na lomanibai e loma, ka raica, sa koto kina e rua na i yatu vale, e dua ena yasa ni matamata vaka ki na vualiku ka qara mai vaka ki na ceva, ka dua tale vaka ki na ceva ka qara vaka ki na vualiku.

⁴⁵ A kaya vei au o koya, na i yatu vale, ka qara vakakina ceva, sa nodra na bete, era vakaitavi ena cakacaka ni Valenisoro.

⁴⁶ A i yatu vale ga oqo sa donuya na mata ni vualiku, sa nodra na bete era vakaitavi ena cakacaka ni vakacabo i soro; o ira na luve i Setoki, sai ira wale ga mai vei ira na Luve i Livai ka vakatarai me ra torovi koya na Turaga ka qaravi koya.

⁴⁷ Sa vakarautaka o koya na balavu kei na raba ni bai e loma, ka sa 50 na mita na kedrau i vakarau. Na Valenisoro sa toka ena yasana ki na ra, ka tara toka ena mata ni Valenisoro e dua na i cabocabonisoro.

⁴⁸ A sa kauti au o koya ki na katuba ni Valenisoro, a sa vakarautaka e yadua na duru ni katuba, a sa rua veimama na mita ena yasana oqo, ka rua veimama na mita ena yasana o ya; ia na raba ni katuba ni koro e dua veimama na mita, ka vaka talega kina na kena ka dua.

⁴⁹ Na balavu ni katuba sa tini na mita, kei na kena raba sa ono na mita; e tini na tagede ni kabakaba ka gole cake kina; ka sa tu na duru lelevu volekata na duru ni matamata.