Isikeli 39 - Vakavakadewa Vou kei na iVola tale eso

Vakarusai o Koki

¹ O koya oqo, o iko na luve ni tamata, mo parofisaitaka na ca vei Koki, ka vaka, ‘Sa kaya vakaoqo na Kalou o Jiova: Raica, au na kemu meca, o iko Koki, na nodra turaga na Meseki kei na Tupali;

² Ia ka'u na vakalesui iko ki muri, ka vakauti iko yani ki liu, ka kauti iko cake mai na tikina taudua ki cake mai na vualiku, ka kauti iko ki na veiulunivanua i Isireli;

³ ia ka'u na taviraka tani na nomu dakaititi mai na ligamu i mawi, ka vakalutuma tani na nomu gasau mai na ligamu i matau.

⁴ O ni na bale ena veiulunivanua i Isireli, o iko, kei ira kecega na nomu i valu ni lewe vuqa, kei ira na veimataqali tamata ka ra tiko kei iko; ka'u na soli kemuni ki na manumanu daukata kecega sa vuka voli, kei na manumanu ni vanua, mo ni laukana.

⁵ O ni na bale ena dela ni vanua; oi au ka'u sa cavuta, sa kaya na Kalou o Jiova.

⁶ Ia ka'u na vakayacora na bukawaqa i Mekoki, kei ira era tiko vinaka ka sautu ena veivanua e baravi; ka ra kila ni sai au o Jiova.

⁷ Ia na yacaqu tabu ka'u na vakatakila vei ira na noqu tamata na Isireli; au na sega ni laiva me vakacacani tale na yacaqu tabu; ka ra kila na veimatanitu tani ni sai au o Jiova na Yalosavasava e Isireli.’

⁸ ‘Raica, sa yaco tiko mai, io, ka sa na yaco vakaidina,’ sa kaya na Kalou o Jiova. ‘Sa i koya oqori na siga ka'u sa vosa oti kina.

⁹ Era a lako yani na tiko ena veikoro vaka-Isireli, ka ra la'ki vakacaudreva ka vakama na veiyaragi ni valu, na i sasabai lalai, na dakaititi kei na gasau, na i ula, kei na moto, ka ra na vakama ena bukawaqa ka yabaki vitu;

¹⁰ era na sega ni cabuka tale kina mai na lomanivanua, se ta buka mai veikau, ni sa nodra buka ga na i yaragi ni valu; era na butakoci ira o ira ka ra tokitaki ira e liu, ka koveraki ira o ira ka ra koveraki ira e liu,’ sa kaya na Kalou o Jiova.

¹¹ Ia ena siga o ya, ka'u na solia vei Koki e dua na vanua me kemuni i bulubulu e Isireli, ena Nodra Buca na Vulagi Lako ena bati ni wasawasa vaka ki na tokalau. Sa latia na nodra sala na dauveilakoyaki, ia era na buluti Koki e kea kei na i soqosoqo levu; ka sa na vakatokai me yacana na Buca i Emikoki, o ya na i soqosoqo levu i Koki.

¹² Ena vitu vata na vula na dede ni nodra buluti ira tiko, o ira na Isireli, me rawa ni vakasavasavataka na vanua.

¹³ Era na vakaogai ena veibulu o ira kece na lewe ni vanua; ia ena lesuvi ira tale na kena lagilagi ena siga ka'u na vakarokorokotaki kina, sa kaya na Kalou o Jiova.

¹⁴ Ia ni sa oti e vitu na vula, era sa na lesia eso na tamata cakacaka me ra lako voli ga ena vanua, ka buluta na yago sa no ena dela ni vanua, me vakasavasavataki kina.

¹⁵ Ia ni ra sa lako voli o ira oqo, ka raica e dua na sui ni tamata, me ra qai cakava kina e dua na kena i vakatakilakila, me ra qai la'ki buluta o ira na dauveibulu ena buca i Emonikoki.

¹⁶ E koto talega e kea na koro o Emona. Era na vakasavasavataka vakaoqo na vanua.

¹⁷ “Ia o iko, na luve ni tamata, sa kaya vakaoqo na Kalou o Jiova: Mo vosa vei ira na manumanu vuka kecega, kei ira na manumanu kecega ni vanua, ka vaka, Ni soqoni vata mai na veiyasana kecega ki na noqu i madrali ka'u na vakacabora me kemuni, io e dua na i madrali levu mai na veiulunivanua e Isireli, ka mo ni kania na lewedra na tamata, ka gunuva na nodra dra.

¹⁸ O ni na kania na lewedra na tamata qaqa, ka gunuva na nodra dra na turaga e vuravura, na kedra dra na sipi tagane, na lami, na me, na bulumakau; o ira kecega oqo era manumanu uro mai Pasani.

¹⁹ Ia o ni na kana uro tiko me yacova sara ni o ni mamau kina, ka gunuva na dra me yacova sara ni o ni mateni kina, ena noqu i madrali ka'u sa vakacabora tiko me kemuni.

²⁰ Ia o ni na vakamamautaki mai na noqu teveli ena ose kei ira na dauvodo ose, o ira na tamata qaqa, kei ira kecega na veimataqali tamata i valu,” sa kaya na Kalou o Jiova.

²¹ “Ia ka'u na qai vueta kina na kequ totoka vei ira na veimataqali tani; ka ra na raica na lewa dodonu ka'u sa vakatauca, kei na noqu tarai ira ena ligaqu.

²² Era na qai kila na mataqali i Isireli ni sai au o Jiova na nodra Kalou me vakatekivu mai na siga o ya ka lako yani.

²³ Era na kila na veimatanitu tani ni ra sa vakabobulataki na mataqali i Isireli ena vuku ni nodra caka cala: ni ra sa veretaki au vakaidina, ka'u na tabonaka kina na mataqu vei ira, ka soli ira yani ki na liga ni kedra meca, ka ra sa bale kece ena i seleiwau.

²⁴ Au a cakacaka vakakina vei ira me vaka na nodra sega ni yalo savasava, kei na nodra talaidredre, ka tabonaka kina vei ira na mataqu.”

²⁵ Sa qai kaya na Turaga o Jiova, “O koya oqo au sa na vakasuka tale na veika vinaka a yaco vei Jekope, kauti ira tale mai na Jekope era sa tiko vakabobula, ka'u na yalololoma vei ira kece na mataqali i Isireli; ia ka'u na vuvutaka ena vuku ni yacaqu tabu.

²⁶ Era na guilecava na nodra madua, kei na buki vere ka ra cakava vei au, ni ra sa tudei ka tiko vinaka ena nodra vanua, ka sega ni dua me vakarerei ira.

²⁷ Ni'u na kauti ira tale mai vei ira na veimataqali, ka vakasoqoni ira mai na veivanua ni kedra meca, ni'u vakaraitaka na noqu yalo savasava e lomadra, e matadra na veimatanitu e vuqa.

²⁸ Era na qai kila ni sai au o Jiova na nodra Kalou, ka'u a vakauti ira tani vakabobula ki na veimatanitu tani: ia ka'u na qai vakasoqoni ira vata mai ki na nodra vanua. Au na sega sara tale ni vakalaiva e dua vei ira me vo laivi tiko mai vei ira na veimatanitu;

²⁹ ia ka'u na sega ni tabonaka tale na mataqu mai vei ira, ena gauna ka'u na sovaraka kina na Yaloqu ki na mataqali i Isireli, sa kaya na Kalou o Jiova.”