Isikeli 38 - Vakavakadewa Vou kei na iVola tale eso

Na Veivakasaurarataki i Koki

¹ A yaco vei au na vosa i Jiova, ka vaka:

² “Luve ni tamata, mo vaqara na matamu ki Koki, na vanua i Mekoki, na nodra turaga liu na Meseki kei na Tupali, ka parofisaitaka na ca ena yaco vei koya, ka vaka,

³ Sa kaya vakaoqo na Kalou o Jiova: ‘Raica, au sa kemu meca, O iko Koki, na nodra turaga liu na Meseki kei na Tupali;

⁴ ia ka'u na vakalesui iko mo vakanadaku ka cobara na bati ni siwa ki gusumu, ka kauti iko mai, kei na nomu i valu kecega, na ose kei na tamata dauvodo ose, era dui vakaisulu kecega ena i sulu vakaivalu, e dua na i vavakoso levu, era tauri sasabai kecega, ka wiricaki i seleiwau tu;

⁵ o Perisia, o Kusi kei Puti ka ra vakaisasabai ka vakaisala; o Komera kei ira kecega na nona i valu levu;

⁶ o Pecitokama mai na vanua vaka ki na vualiku kei ira na nona tamata e vuqa era lewe vuqa sara era sa to kei iko.

⁷ Mo vakarau, io, mo vakarau tikoga, o iko kei ira na i soqosoqo kecega era soqoni vata kei iko, ka mo nodra i vakatawa.

⁸ Ia ni oti e vica vata na siga, o ni na qai vakasoqoni ira vata; ia ena veitabayabaki e muri o ni na qai valuta tale na vanua oqo ka vakasukai tale mai na i valu na vanua ka ra vakasoqoni vata yani kina na veimatanitu e vuqa, io ki na veiulunivanua i isireli, ka sa dau lala ka tu wale tu; ka ra na qai kau tale mai na kedra tamata mai na veimatanitu, ka ra sa tiko vinaka ka tudei kina, io o ira kecega.

⁹ O na cavu yava ki liu, me vaka ni liwa mai e dua na cava, o na lako mai me vaka na o ka ubia na vanua, o iko kei ira na nomu tamata e lewe vuqa, io oi kemuni kei ira na veimataqali tamata e vuqa.’ ”

¹⁰ Sa kaya vakaoqo na Kalou o Jiova: “Ena siga o ya, ena basika mai ki lomamu eso na nanuma, ka o na vakasamataka e dua na i naki ca, ka kaya,

¹¹ Au na lako ki na vanua ka la'ki kaba koro ena veikoro sega ni vakabai; au na valuti ira era sa tiko vinaka voli, ka tudei na nodra i tikotiko, ka ra sega ni vakabai, ka sega talega na i vakadei, se matamata ni koro se katuba;

¹² me'u taura vakaukauwa na i toki ka colata yani na i yau koveraki; me samuta na veivanua ka a lala tu ka ra sa tawa mai, vei ira na lewe ni vanua ka ra vakasoqoni mai na veimatanitu, tu na nodra manumanu kei na i yau, ka ra tiko e lomadonu ni vanua.

¹³ Era na kaya vei iko na kai Sipa kei Titana, kei ira na dauveivoli mai Tasisi, ka vaka: ‘O sa lako li mai mo mai kovea na i toki? O sa vakasoqoni ira li na nomu lewe ni vanua me ra colata tani na i yau kovei, na koula kei na siliva, ka kauta tani na manumanu kei na i yau, ka ra taura na i toki levu?’

¹⁴ “O koya oqo, o iko na luve ni tamata, mo ia kina na parofisai, ka kaya vei Koki, ‘Sa kaya vakaoqo na Kalou o Jiova: Ena siga o ya ni ra sa tiko vinaka ka dei o ira na noqu tamata na Isireli,

¹⁵ o qai vakusakusa tani mai na nomu yasana mai na yasayasa vakavualiku, o iko vata kei ira na lewe vuqa ka ra tiko kei iko, era vodo ose kece, ka sa dua na i vavakoso levu, ka i valu kaukauwa talega.

¹⁶ Ia o na cabe vakaivalu mai vei ira na noqu tamata na Isireli, me vaka na o sa ubia tu na vanua. Ia ena gauna e muri, au na kauti iko mai na noqu vanua, me ra kilai au kina na veitamata tani, ni'u sa vakarokorokotaki mai vei iko Koki, e matadra.’ ”

¹⁷ Sa kaya vakaoqo na Kalou o Jiova: “Sa i iko li ka'u a vosa vua ena gauna e liu ena gusudra na noqu tamata na parofita ni Isireli, o ira ka ra a parofisai ena veigauna ni'u sa na kauti iko mai mo vala kei ira?

¹⁸ A sa kaya na Kalou o Jiova, Ia ena siga o ya ni sa lako mai vakaivalu o Koki ki na vanua o Isireli, sa na qai basika mai kina na noqu cudru.

¹⁹ Ia ena noqu vuvu kei na noqu cudru waqawaqa, ka'u sa kaya, Ena siga o ya, ena yaco kina e dua na yavavala levu ena vanua o Isireli;

²⁰ era na yavavala e mataqu na ika ni waitui, na manumanu vuka, na manumanu ni vanua, na ka kecega sa qasi voli ena dela ni qele, kei na tamata kecega sa tiko ena dela i vuravura; ena talaraki sobu talega na veiulunivanua, ra lulutu na barinivatu, ka kasura ki na qele na bai kecega.

²¹ Au na kaciva na veika vakadomobula kece me saqati Koki, sa kaya na Kalou o Jiova; era na vala vakataki ira vakaveiwekani na tamata kecega.

²² Ia ka'u na vakataulewa me yaco kina na mate dauveitauvi kei na dave ni dra; ia ka'u na vakatauca vua kei ira na nona tamata e lewe vuqa ka ra tiko kaya; na uca tau bi, kei na uca cevata, na bukawaqa kei na vatu lelevu.

²³ Ia ka'u na vakaraitaka na kequ levu, kei na noqu vakarokorokotaki, me vakatakilai au kina me'u kilai e matadra na veimatanitu e vuqa. Era na qai kila kina ni sai au o Jiova.”