Isikeli 37 - Vakavakadewa Vou kei na iVola tale eso

Na Buca ni Sui Mamaca

¹ A sa sobuti au na kaukauwa i Jiova, ka sa kauti au na Yalona ka vakatikori au ena dua na buca sa sinai tu kina na sui.

² A sa kauti au wavoki kina o koya, ka'u a raica rawa ni sa ka levu sara na sui ena loma ni buca, ka vuqa sara vei ira era sa sui mamaca.

³ A sa qai kaya vei au, “Luve ni tamata, era na rawa li ni bula tale mai na sui oqo?” Au a qai kaya, “Kemuni na Kalou o Jiova, o ni sa kila ga.”

⁴ A qai kaya tale vei au o koya, “Mo parofisai mada vei ira na sui oqo, ka vosa vei ira vakaoqo: Oi kemuni na sui mamaca, mo ni rogoca na vosa i Jiova.

⁵ Sa kaya ga vakaoqo na Kalou o Jiova vei ira na sui oqo: Raica, au na ceguvi kemuni ena i cegu, o ni na qai bula.

⁶ Au na vakatubura vei kemuni na ua kei na lewe, ka ubi kemuni ena kuli ni yagomuni. Au na qai ceguvi kemuni ena i cegu, ka vakalesuya vei kemuni na bula. O ni na qai kila kina ni sai au o Jiova.”

⁷ “Au a qai ia na parofisai me vaka sa vakaroti vei au. Ni'u sa parofisai tiko, a sa voqa mai e dua na rorogo, e dua na tavadiridiri, ka ra tekivu me ra cokocoko vata mai na sui.

⁸ Ka'u a raica, ni ra sa tubu cake mai na kena ua kei na lewe, ka sa vakasulumi taucoko ena kuli ni yago; ia sa sega ga vei ira na i cegu ni bula.”

⁹ Sa qai kaya vei au o koya, “Mo parofisai ki na i cegu, mo parofisai o iko na luve ni tamata, ka vosa vua na i cegu, ka vaka, Sa kaya vakaoqo na Kalou o Jiova: O iko Ra i Cegu, mo lako mai na matanicagi e va, ka mai ceguvi ira era sa mate tu oqo, me rawa ni ra bula tale mai.”

¹⁰ Au a qai qarofisai me vaka sa vakaroti vei au. A sa ceguvi ira sara na i cegu, ka ra sa bula tale, ka tucake tu e yavadra. Na kedra lewe levu sa vaka e dua na mataivalu.

¹¹ A sa kaya vei au na Kalou, “Luve ni tamata, o ira na Isireli era sa vaka na sui oqo. Raica, era sa kaya, ‘Sa mamaca na suida, ka sa sega na noda i nuinui; eda sa muduki laivi sara oi keda.’

¹² Ia o koya oqo, mo ia kina na parofisai, ka kaya vei ira, Sa kaya vakaoqo na Kalou o Jiova: Raica, au na dolava na kemuni bulubulu, ka'u na vakaturi kemuni cake tale mai kina, oi kemuni na noqu tamata; ka'u na kauti kemuni ki na vanua o Isireli.

¹³ Ni'u sa dolava na kemuni bulubulu ka kauti kemuni tani mai kina, o ni na kila kina ni sai au o Jiova.

¹⁴ Ka'u na solia talega na Yaloqu vei kemuni, ka dou na bula kina, ka'u na qai vakatikori kemuni talega ki na nomuni vanua. O ni na qai kila kina ni sai au o Jiova. Au sa yalataka ni'u na vakayacora na ka oqo — io, ena yaco vakaidina, sa kaya o Jiova.”

¹⁵ A yaco tale vei au na vosa i Jiova, ka vaka: “Luve ni tamata, mo taura e dua na i titoko, ka vola kina,

¹⁶ A nodra na Juta, kei ira talega na luve i Isireli era veitokani vata kaya. Mo qai taura tale e dua na i titoko, ka vola kina, ‘A nei Iosefo, na i titoko i Ifereimi kei na mataqali kece i Isireli era veitokani vata kaya’.

¹⁷ Mo qai tauri rau vata na titoko e ligamu, ka veidonui vata na muana ruarua, me vaka ga ni sa duabau ga na i titoko.

¹⁸ Ia ni ra sa vosa vei iko na wekamu, ka kaya, ‘O na sega li ni vakatakila vei keimami se cava na kedra i balebale oqo?’ Ia mo qai kaya vei ira,

¹⁹ ‘Sa kaya vakaoqo na Kalou o Jiova: Raica, au na taura na i titoko i Iosefo, ka tu ena liga i Ifereimi kei na veimataqali i Isireli era veitokani vata kaya. Au na qai semati rau vata kei na i titoko i Juta, ka me rau duavata ga, me rau yaco me duabau ga e ligaqu.’

²⁰ “Ia ni sa tu e ligamu na i titoko o sa volavola kina, e matadra,

²¹ ia mo qai kaya vei ira, ‘Sa kaya vakaoqo na Kalou o Jiova: Raica, au na kauti ira mai na Isireli mai vei ira na veimatanitu tani, era sa dui yaco kina, ka vakasoqoni ira mai na veiyasana, ka kauti ira mai ki na nodra vanua;

²² ia ka'u na qisi ira me ra duabau ga na matanitu ena vanua, ena veivanua i Isireli; ia ena duabau ga na tui vei ira kecega; ka na sega tale ni rua na matanitu, io era na sega ni wase tale me rua na matanitu.

²³ Era na sega ni vakadukadukalitaki ira tale ena matakau, kei na nodra veika vakasisila, se dua ga vei ira na nodra talaidredre: ia ka'u na vakabulai ira mai na veibuki vere, era sai valavala ca kina, ka na vakasavasavataki ira; ka ra na vakabau me ra noqu tamata, ia oi au talega ka'u na yaco me'u nodra Kalou.

²⁴ Ia ena nodra tui o Tevita na noqu tamata; ena duabau ga na kedra i vakatawa kecega. Era na muria na noqu lewa, ka qarauna me ra vakabauta na noqu i vunau, ka cakava.

²⁵ Era na tiko ga ena vanua ka'u sa solia vua na noqu tamata o Jekope, na vanua era sa tiko kina na nomuni qase; ka ra na tiko kina, kei ira na luvedra, kei na makubudra, ka sega ni mudu.

²⁶ Ia ka'u na cakava e dua na veiyalayalati ni veivinakati kei ira na Isireli, sa na veiyalayalati ka sega ni mudu; au na vakalougatataki ira ka vakalewevuqataki ira, ka na vakatikora na noqu Valenisoro vei ira ka sega ni mudu.

²⁷ Ena tu vata talega kei ira na noqu i tikotiko; ia ka'u na yaco me nodra Kalou, o ira talega era na vakabau me ra noqu tamata.

²⁸ Era na kila na veimatanitu ni sai au o Jiova ka vakatabui Isireli, ka na tu na noqu vale tabu vei ira ka sega ni mudu.’ ”