Isikeli 36 - Vakavakadewa Vou kei na iVola tale eso

Vakalougatataki o Isireli

¹ Ia o iko, na luve ni tamata, mo ia tale na parofisai ki na veiulunivanua i Isireli, ka kaya, ‘Oi kemuni na veiulunivanua e Isireli, mo ni rogoca na vosa i Jiova.

² Sa kaya vakaoqo na Kalou o Jiova: Ni ra sa kaya vei kemuni na meca, Ue! Sa qai noda me da taukena na vanua cecere makawa!’

³ O koya oqo, mo parofisai kina, ka vaka, sa kaya vakaoqo na Kalou o Jiova: Ena vuku ni, io ena vuku ni ra sa vakarusai kemuni ka qaqi voroki se buturaki kemuni mai na veiyasana kecega, mo ni nodra vanua na veimatanitu sa vo, ni o ni sa cavuti ka veivosakitaki tiko ena kakase ca ena gusudra na tamata;

⁴ o koya oqo, oi kemuni na veiulunivanua i Isireli, mo ni rogoca mada na vosa ni Kalou o Jiova: Sa kaya vakaoqo o koya na Kalou o Jiova ki na veiulunivanua, na veidelana, na veiqakilo, na veibuca, na veitikina lala ka rusa tu, kei na veikoro sa biu tu ka ra sa vakacacani, tokitaki ka vakalialiai vei ira na kena vo ni veimatanitu ka ra tu vakavolivoliti kemuni.

⁵ O koya oqo, sa kaya kina na Kalou o Jiova, ‘Au sa vosa tiko ena noqu cudru katakata vei ira na vo ni veimatanitu, kei ira kece talega mai Itomi, ka ra taura ka wasea na noqu vanua me nodra ena yalo reki, kei na marau mai na vuvu ni yalodra, ka sala vata kei na veibeci, me rawa ni ra taukena, ka tokitaka.’

⁶ “O koya oqo mo parofisai kina me baleta na vanua o Isireli, ka kaya ki na veiulunivanua, na veidelana, na veiqakilo kei na veibuca, sa kaya vakaoqo na Kalou o Jiova: Raica, ka'u sa vosa oqo ena vuvu kei na cudru, ena vuku ni nomuni a vakamaduataki mai vei ira na veimatanitu;

⁷ o koya oqo, sa kaya kina na Kalou o Jiova: Au sa bubuluitaka ni ra na vakamaduataki sara na veimatanitu era tiko vakavolivoliti kemuni.

⁸ “Ia oi kemuni na veiulunivanua i Isireli, o ni na vakatubura na nomuni taba ni kau, ka vuataka na vuamuni me kedra na noqu tamata na Isireli; ni ra sa voleka ni lako mai.

⁹ Raica, sai au ka'u a totaki kemuni, ia ka'u na lesu tale mai vei kemuni, ka o ni sa na teivaki ka kaburaki kina;

¹⁰ ka'u na vakalewevuqataka na tamata vei kemuni, na mataqali kecega i Isireli; ena tawa talega na veikoro ka vakavaletaki na veitikina lala;

¹¹ ia ka'u na vakalewevuqataka vei kemuni na tamata kei na manumanu, ka ra na tubu ka luvea levu; ka'u na cakava mo ni vanua tawa tale me vaka na veigauna e liu, ka na qai levu sara na veika vinaka cake ka'u na cakava vei kemuni, mai na kena e liu. Ia o ni na kila kina ni sai au o Jiova.

¹² Ia ka'u na lewa na tamata me ra lakovi kemuni tikoga, io o ira na noqu tamata na Isireli; ka ra na taukeni iko, io o na nodra vanua ia o na sega tale ni biuti ira tu me ra luveniyali.

¹³ ‘Sa kaya vakaoqo na Kalou o Jiova: Ni ra sa kaya vei kemuni na tamata, O iko na vanua o sa dau kania na tamata, ka sa dau biuti ira na nomu veimatanitu me ra luveniyali,

¹⁴ o koya oqo, o na sega tale ni kania na nomu tamata, se biuti ira me ra luveniyali na nomu veimatanitu, sa kaya na Kalou o Jiova.

¹⁵ Au na sega tale ni vakalaiva mo rogoca na nodra veibeitaki ca na veimatanitu, ni o sa na sega tale ni colata na nodra madua na tamata, o na sega talega ni vakatarabetaka na nomu matanitu, sa kaya na Kalou o Jiova.’ ”

Vakavoui na Tamata

¹⁶ Sa yaco tale mai vei au na vosa i Jiova, ka vaka,

¹⁷ “Luve ni tamata, ni ra sa tiko ena nodra vanua dina na mataqali i Isireli, era sa vakadukadukalitaka na nodra i tovo kei na nodra i valavala; na nodra i valavala e mataqu sa vaka na tawa savasava ni yalewa sa yacovi koya na nona matenivula.

¹⁸ Ia ka'u na sovaraka vei ira na noqu cudru ena vuku ni dra era sa vakadavea ena vanua, ena vuku talega ni nodra veimatakau era sa vakadukadukalitaka kina.

¹⁹ Ia ka'u a dui vakasavi ira ki na veimatanitu tani, ka ra na dui biubiu ki na veivanua; io ka'u na lewai ira me vaka na nodra i valavala kei na nodra cakacaka.

²⁰ Ia ni ra sa dui yaco ki na veimatanitu tani era lako kina, era sa la'ki vakacacana na yacaqu tabu, ni sa kainaki ena vukudra, ‘O ira oqo na tamata i Jiova, ia era qai lako tani ga mai na nodra vanua.’

²¹ Ia ka'u sa vosota ga ena vuku ni yacaqu tabu, o koya era sa vakacacana na mataqali i Isireli ena veimatanitu tani, era dui lako kina.

²² O koya oqo mo kaya kina ki na mataqali i Isireli, ‘Sa kaya vakaoqo na Kalou o Jiova: Sa sega ni baleta na vukumuni, Oi kemuni na mataqali i Isireli, ka'u sa na vakarau cakava kina na ka oqo; au sa cakava ga ena vuku ni yacaqu tabu, o koya o ni sa dui yaco kina.

²³ Ia ka'u na vakatabuya na yacaqu levu, o koya ka sa vakacacani ena veimatanitu, o ni a vakacacana, ka ra na qai kila na veimatanitu ni sai au na Turaga, sa kaya na Kalou o Jiova, ni'u sa vakaraitaka na noqu vakatabui ena vukumuni e matadra.

²⁴ Ni'u na kauti kemuni mai vei ira na veimatanitu tani, ka vakasoqoni kemuni mai na veivanua kecega, ka kauti kemuni ki na nomuni vanua.

²⁵ Au na kureitaka vei kemuni na wai makare, mo ni na qai savasava kina mai na nomuni dukadukali kecega, ka'u na vakasavasavataki kemuni talega mai na nomuni matakau.

²⁶ Au na solia talega vei kemuni na yalo vou, ia ka'u na vakacuruma vei kemuni na loma vou; ka'u na kauta tani talega mai na nomuni bula na yalo vatu, ka solia vei kemuni na yalo malumalumu.

²⁷ Ka'u na vakacuruma ki na loma ni yaloqu, ka vagolei kemuni mo ni muria na noqu i vunau, ka mo ni qarauni kemuni ka vakabauta na noqu lewa.

²⁸ O ni na la'ki tiko talega ena vanua ka'u a solia vei ira na nomuni qase; o ni sa na noqu tamata, ia oi au ka'u na yaco me'u nomuni Kalou.

²⁹ Ia ka'u na vakabulai kemuni mai na nomuni dukadukali kecega; ka'u na kaciva na sila me vakasaututaka ka na sega ni vakayacora tale vei kemuni na dausiga.

³⁰ Au na vakasobitaka na vua ni vuata, ka vakalevuya na vuavuai vinaka ni qele, ka me kakua tale ni vakatubu madua vei kemuni ena matadra na veimatanitu na dausiga.

³¹ Mo ni na qai vakananuma na nomuni i valavala ca, kei na nomuni cakacaka sa sega ni vinaka; ia o ni na vakasisilataka vakataki kemuni ena vuku ni nomuni caka ca kei na nomuni i valavala vakasisila.

³² Mo ni kila mada ni'u sa sega ni cakava na ka oqo ena vukumuni, sa kaya na Kalou o Jiova; me macala sara vei kemuni na ka o ya. Ni maduataka mada ka taqayataka na nomuni i valavala, Oi kemuni na mataqali i Isireli.’ ”

³³ Sa kaya vakaoqo na Kalou o Jiova: “Ena siga ka'u sa vakasavasavataki kemuni kina mai na nomuni valavala ca kecega, ka'u na qai cakava me tawa tale na nomuni veikorokoro ka tara vou tale na veitikina sa lala ka rusa tu.

³⁴ Ia na vanua ka sa lala ena wereci ka teivaki tale, me kakua ni vakaraitaki tu ni vanua lala vei ira era lako volekata.

³⁵ Era na qai kaya, ‘Na vanua ka lala tu oqo e liu, sa qai yaco me vaka na i teitei o Iteni; ia na veikorokoro ka sa lala ka i rusarusa se benubenu tu sa qai tawa tale, ka sa viribaiti vakaivalu.’

³⁶ Era na qai kila na kena vo ni veimatanitu ka ra tiko vakavolivoliti kemuni, ni sai au o Jiova ka tara vou tale na veikoro ka ra a rusa tu, ka teivaka vou tale na vanua ka lala tu; oi au o Jiova, ka'u sa kaya, ka'u na cakava talega.”

³⁷ Sa kaya vakaoqo na Kalou o Jiova: “Ia oqo talega au sa na vakalaiva kina vei ira na mataqali i Isireli me ra vakamasuti au me'u cakava vei ira na ka oqo: me'u vakalewevuqataki ira na nodra tamata me ra dua na i soqosoqo levu.

³⁸ Me vaka na qele ni sipi tabu, mai Jerusalemi ena kena solevu tabu ka digitaki, ena vaka talega kina na kena tawani tale na veikoro lala ena i soqosoqo levu ni tamata. Era na qai kila ni sai au o Jiova.”