Isikeli 35 - Vakavakadewa Vou kei na iVola tale eso

Vakasukai Tale na Vanua

¹ A sa yaco vei au na vosa i Jiova, ka vaka,

² “Luve ni tamata, mo vaqara na matamu ki na ulunivanua o Sia, ka parofisaitaka na ka ca ena yaco kina,

³ ka kaya, Sa kaya vakaoqo na Kalou o Jiova: Raica, o iko na Ulu ni vanua o Sia, au sa kemu meca, ka'u sa na dodoka yani na ligaqu me tarai iko, ka'u na vakalalai iko sara.

⁴ Ka'u na vakarusa ka vakalala na nomu veikoro, ia o iko o na rusa sara; o na qai kila ni sai au o Jiova.

⁵ Ena vuku ni nomu dau taleitaka na veimecaki tawa mudu, ka qai soli ira na Isireli ki na kaukauwa ni seleiwau ena gauna ni noda domobula, ena gauna ka tini kina na nodra cudruvi;

⁶ o koya oqo, sa kaya na Kalou o Jiova, me vaka na dina ni noqu bula, au na vakarautaki iko vakaidina ki na vakadave dra, ia na vakadave dra ena vakasavi iko; ena vuku ni o sa cala ena vakadave dra, o koya oqo ena vakasavi iko kina na vakadave dra.

⁷ Ia ka'u na vakarusa ka vakalala sara na ulunivanua o Sia, ka muduki ira tani na lako yani se lako tani mai kina.

⁸ Ia ka'u na vakasinaita na nomu veiulunivanua ena yagodra na moku; era na babale ena nomu veidelana, na veibuca, kei na veiqakilo, o ira na moku ena i seleiwau.

⁹ Au na vakarusai iko mo vanua lala ka sega ni mudu, ia na nomu veikoro ena sega ni tawa tale. Ia o na qai kila ni sai au o Jiova.

¹⁰ Ena vuku ni o a kaya, ‘Na matanitu kei na vanua ruarua oqo ena noqu ga, ia keimami na taukena ka dina ga ni sa tiko kina o Jiova,

¹¹ o koya oqo, me vaka na dina ni noqu bula,’ sa kaya na Kalou o Jiova, au na kitaka talega me vaka na nomu cudru kei na nomu vuvu me vaka o sa vakaraitaka ni o sa cati ira; ia ka'u sa na vakatakilai au ni'u na qai vakataulewa vei iko.

¹² Ia o ni na qai kila, ni sai au o Jiova ka'u sa rogoca kecega na nomuni veivosa ca o ni vosa vakacacataka kina na veiulunivanua e Isireli, ka kaya, ‘Sa rusa ka lala tu, ka sa soli tu vei keda me da kania.’

¹³ Ia o ni sa vosa bolebole ka vakalevulevui kemuni ena vosa ca mai na gusumuni, ka vakalevutaka na nomuni vosa ca vei au; ia ka'u sa rogoca oi au.”

¹⁴ A sa kaya vakaoqo na Kalou o Jiova: “Me marau o vuravura taucoko, ka'u na vakarusai iko sara.

¹⁵ Me vaka o a marautaka na nodra i votavota na mataqali i Isireli, ena vuku ni sa lala ka rusa, ia ka'u na kitaka vaka kina vei iko: o na vakalalai sara o iko na Ulunivanua o Sia, o Itomi taucoko sara. Era na qai kila ni sai au o Jiova.”