Isikeli 34 - Vakavakadewa Vou kei na iVola tale eso

Veisau na Matanitu

¹ Sa yaco tale mai vei au na vosa i Jiova, ka vaka,

² “O iko, na luve ni tamata, mo parofisai vei ira na nodra i vakatawanisipi na Isireli, ka kaya, Sa kaya vakaoqo na Kalou o Jiova: Oi kemuni na i vakatawanisipi i Isireli, ka o ni sa la'ki vakani kemuni vakataki kemuni tiko! Sa sega li ni dodonu me ra vakania na qele ni sipi na i vakatawa?

³ O ni a kania na uro, ka vakaisulutaki kemuni ena vutika ni sipi, ni o ni a vakamatea na manumanu uro ka gone; ia o ni sega ga ni vakani ira na sipi.

⁴ O ni a sega talega ni susugi ira me ra kaukauwa cake mai na sipi a malumalumu, ka sega talega ni qaravi ira na sipi tauvi mate, ka sega ni vauca na yavadra na sipi lokiloki, o ni a sega ni la'ki kauta tale mai na sipi lako sese, ka sega ni vakasaqara na sipi sa yali, ka sa vakatawai ira ga ena loma kaukauwa kei na loma qa.

⁵ Era a dui veiseyaki na sipi ena vuku ni a sega na kedrai vakatawa; ka ra kani ira kecega na manumanu ni vanua.

⁶ Era a talabusese na noqu sipi, ka ra lako sese voli ena veiulunivanua kei na veidelana cecere kecega; era a dui veiseyaki na noqu qele ni sipi, ena dela i vuravura taucoko, ka sega ni dua me vakataroga se vakasaqarai ira.

⁷ ‘O koya oqo, oi kemuni na i vakatawa, mo ni rogoca kina na vosa i Jiova:

⁸ Me vaka na dina ni noqu bula, sa kaya na Kalou o Jiova, era sa yaco me i toki na noqu qele ni sipi, ka yaco me kedra kakana na manumanu kecega ni vanua, me vaka ni sa sega na kedra i vakatawa; ni ra a sega ni vakasaqara na noqu sipi o ira na noqu i vakatawa, ka ni sa la'ki vakani ira vakataki ira ga na i vakatawa, ia era a sega ni vakani ira na noqu sipi;

⁹ O koya oqo oi kemuni na i vakatawa, mo ni rogoca kina na vosa i Jiova:

¹⁰ A kaya vakaoqo na Kalou o Jiova, raica, au sa veimecaki kei ira na i vakatawanisipi; ka'u na taroga vei ira na noqu sipi, ka na muduki ira me ra kakua ni vakani ira tiko na sipi; me ra kakua talega ni vakani ira tiko vakataki ira na i vakatawa. Ni'u sa kaliraka na noqu qele ni sipi mai na gusudra, me ra kakua ni kani ira tiko na qele ni sipi.’ ”

¹¹ “Ni sa kaya vakaoqo na Kalou o Jiova: Raica, oi au, io oi au sara ga vaka i au, ka'u sa na vakasaqarai ira na noqu sipi, ka'u na vakataroga na vanua era sa tu kina.

¹² Me vaka sa vakasaqara na nona qele ni sipi na kena i vakatawa, ni ra sa veiseyaki ena veivanua, au na vakasaqara talega vakakina na noqu qele ni sipi, ia ka'u na la'ki taqomaki ira mai na veivanua era dui veiseyaki kina ena siga ni o loaloa kei na butobuto.

¹³ Ia ka'u na kauti ira tani mai vei ira na veimataqali tamata, ka vakasoqoni ira mai na veivanua, ka kauti ira mai ki na nodra vanua; ka'u na vakani ira ena veiulunivanua i Isireli, ena veimata ni wai, kei na i tikotiko kece ni vanua.

¹⁴ Ka'u na vakani ira ena veico vinaka, ka sa na nodra i kanakana talega na veiulunivanua cecere i Isireli; ia era na davo no na qele ni sipi ena vanua ka i kanakana vinaka ni manumanu, ena veico bulabula ena yasa ni veiulunivanua i Isireli.

¹⁵ Ia au na kedra i vakatawa na noqu sipi, ka'u na dau vakadavori ira tiko, sa kaya na Kalou o Jiova.

¹⁶ Au na vakasaqarai ira na sa yali, ka kauti ira tale mai na lako sese, vauca na kena sa lokiloki, susugi ira cake na malumalumu, vakatawai ira sa uro ka kaukauwa, ka vakani ira ena lewa dodonu.

¹⁷ Ia oi kemuni na noqu qele ni sipi, sa kaya na Kalou o Jiova: Raica, au na veilewaitaki ira na sipi, kei na me tagane.

¹⁸ E sega beka ni rauti kemuni mo ni kana ena veico vivinaka, buturaka sobu kina na yavamuni na vo ni kemuni kakana; gunuva talega na kena wai makare, ka la'ki vakavuvuya sara na kena vo ena yavamuni?

¹⁹ Ia me ra qai kania li na noqu sipi na veika o ni sa buturaka, ka gunuva na wai o ni sa vakavuvuya ena yavamuni?

²⁰ ‘O koya oqo, sa kaya kina na Kalou o Jiova vei ira: Raica, oi au, io oi au ga vaka i au, au na veilewataka na sipi uro kei na sipi suivotu.

²¹ Me baleta ni sa veibiliyaki, ena tutumuni kei na tabamuni, ka cumuti ira na wamalai ena nomuni i leu, me yacova sara ni o ni vakasevi ira ki na veivanua;

²² o koya oqo ka'u na vakabulai ira kina na noqu qele ni sipi, ka ra na sega sara ni toki tale; ia ka'u na veilewayaka na sipi.

²³ Ia ka'u na lesia e dua na kedra i vakatawa, o ya na noqu tamata o Tevita, ena vakani ira o koya; ena lesi talega me kedra i vakatawa.

²⁴ Ia oi au o Jiova, ka'u na yaco me'u nodra Kalou, ka sa na turaga ena kedra maliwa o Tevita na noqu tamata; ia oi au o Jiova ka'u sa cavuta.

²⁵ Ia ka'u na cakava vei ira e dua na veiyalayalati ni veivinakati, ka vakasavi ira na manumanu ca mai na vanua, ka ra na tiko dei ena vanua veico, ka moce e veikau.’

²⁶ ‘Ia ka'u na cakava vei ira kei na veiyasana sa tiko volita na noqu ulu ni koro me ka ni veivakalougatataki; au na vakatauca talega na uca ena kena gauna; ena tau mai na uca ni veivakalougatataki.

²⁷ Na kau talega kei na vanua e rau na vuataka na vuana, ia na vuravura ena vuataka na kena tubu me levu; ia era na tiko dei ena nodra vanua, ka ra na kila ni sai au o Jiova, ni'u sa musuraka na i vau ni nodra i vua, ka vakabulai ira mai na ligadra era a vakabobulataki ira.

²⁸ Era na sega ni yaco tale me nodra i toki ni valu na veimatanitu, ka ra na sega talega ni kani ira na manumanu ni vanua; era na tiko vinaka ga ka tu dei, ka na sega ni dua me vakarerei ira.

²⁹ Ia ka'u na vakatubura vei ira na veiwere vuavuai vinaka ka sautu, ka me kakua ni kani ira na dausiga ni vanua, ka kakua ni ra vakamaduataki tale mai vei ira na veimatanitu.

³⁰ Era na kila ni sai au o Jiova na nodra Kalou, ka'u sa tiko kei ira, ka ni ra sa noqu na mataqali i Isireli,’ sa kaya na Kalou o Jiova.

³¹ ‘Ia oi kemuni na noqu qele ni sipi mai na noqu vanua veico, sai au na nomuni Kalou,’ a sa kaya na Kalou o Jiova.”