Isikeli 31 - Vakavakadewa Vou kei na iVola tale eso

Sa Vakatauvatani o Ijipita kei na Vuni Sitari

¹ Ia ena i matai ni siga ni katolu ni vula ena i katini kadua ni yabaki, sa yaco mai vei au na vosa i Jiova, ka vaka:

² “Luve ni tamata, mo kaya vua na tui Ijipita, vei ira talega na nona lewe vuqa: O cei o drau tautauvata kaya ena kemu levu?

³ Raica, au sa vakatauvatani iko kei na dua na vuni sitari mai Lepanoni, Ni sa bulabula na veitabana, Sa veikau rugurugua ka cecere sara, Ka sa tubu sara na vusona e loma ni o.

⁴ Sa tubu na sitari me levu ena vuku ni wai, Sa cecere kina ena vuku ni wai titobu, Era sa drodro kina na kena uciwai, Ka drodro volita na vanua e tei kina, Era tala yani na kena veisoniwai Ki na kau kecega ni veikau.

⁵ Ia sa mani tubu cake ka cecere sara e deladra na kau kecega ni veikau; Sa tubu me levu sara na veitabana Ka babalavu na veitabana lalai ena levu ni wai.

⁶ Na manumanu vuka kecega era sa tara nodra sova ena tabana lelevu, Ia o ira na manumanu kecega ni vanua, era vakasucuma na luvedra e ruku ni tabana; Era sa tiko talega na veimatanitu lelevu e ruku ni kena yaloyalo.

⁷ A rairai vinaka na kena levu, ena babalavu ni veitabana; Ni sa titobu na wakana ki na bati ni wai levu.

⁸ Era sega ni rawa ni veisisivi kaya na sitari sa tubu ena i teitei ni Kalou, Se me ra tautauvata kaya na tabana lelevu na damanu; Na ivi talega ni vavalagi sa sega ni tautauvata kei na veitabana lalai; Sa sega ni dua tale na kau ena i teitei ni Kalou Me tautauvata kaya na kena rairai vinaka.

⁹ Au a vakatubura me rairai totoka, Ena levu ni dui tabana, Ka ra sa yalo vuvutaki iko O ira na kau kecega e Iteni, Na i teitei ni Kalou.

¹⁰ O koya oqo sa kaya kina na Kalou o Jiova: Ni sa laveti koya sara me cecere ka la'ki tu kina na sovuna ena loma ni o, sa qaciqacia na yalona ena vuku ni kena cecere,

¹¹ o koya oqo ka'u sa na soli koya kina ki na ligana na nodra qaqa na veimatanitu; ka sa na cakava vakaidina vua na ka me veirauti kaya na kena ca. Au sa biuti koya laivi.

¹² Era na taya sobu o ira na vulagi, na matanitu rerevaki taudua, ka ra na biuti koya tani. Era na lulutu na tabana ena veidelana kei na veibuca kecega, ia na tabana lelevu era na davo raramusumusu tu ena veisoniwai ena vanua; ka ra na lako tani mai na yaloyalona o ira kecega na kai vuravura, ka ra na biuti koya.

¹³ Era na lasa ena kena i vucavuca na sitari na manumanu vuka kecega, era na kabata na tabana na manumanu kecega ni vanua.

¹⁴ Na veika kecega oqo me kakua kina ni dua na kau ena bati ni wai me tubu me cecere sara se me la'ki yacova yani na o na sovuna, ka me kakua ni dua na kau e gunuva na wai me la'ki yacova na kena cecere; ni ra sa soli kece yani ki na mate, me ra la'ki koto ki na ruku ni vuravura vei ira na sa mate rawa, kei ira ka ra lako sobu ki na vuravura ni mate.

¹⁵ Sa kaya vakaoqo na Kalou o Jiova: “Ni sa lako sobu o koya ki na nodra vuravura na mate, au na tabonaka ena wai titobu me kena i loloku, ka tarova na kena uciwai, ka bonota e vuqa na kena veisoniwai; ia au na vakasulumi Lepanoni ena rarawa kei na yalo bibivoro ena vukuna.

¹⁶ Au na vakayavalata na veimatanitu ena rorogo ni kena bale sobu, ni'u sa biuti koya sobu ki na nodra vuravura na mate. Era na qai marautaka na nona bale sobu o ira kece na kau mai Iteni kei na kau ni Lepanoni sa digitaki ka dau gunu wai vakavinaka era sa tiko ena ruku i vuravura.

¹⁷ O ira talega era na lako vata sobu ki na nodra vuravura na mate ka veitomani kei ira esa sa bale oti. Era na veibiuyaki talega ena kedra maliwa na veimatanitu o ira sa vakarurugi e rukuna.

¹⁸ “Na kau oqo sai koya na tui Ijipita kei ira na nona tamata. O ira mada ga na kau ni Iteni era sa sega soti sara ni balabalavu vinaka ka vakasakiti. Ia oqo, me vakataki ira ga na kau ni Iteni, ena lako sobu talega na kau oqo ki na nodra vuravura na mate me tomani ira sa sega ni kila na Kalou kei ira sa vakamatei ena valu. Sa i au o Jiova, ka'u sa kaya na veika oqo.