Isikeli 3 - Vakavakadewa Vou kei na iVola tale eso

¹ A kaya vei au na Kalou, “Luve ni tamata, mo kania na i vola vivigi oqo, ka la'ki tukuna vei ira na mataqali i Isireli.”

² Au a qai dalaga, ka sa solia vei au o koya na i vola vivigi me'u kania.

³ A sa kaya vei au o koya, “Luve ni tamata, mo kania na i vola vivigi oqo ka'u sa solia vei iko, ka mo vakamamautaka kina na ketemu.” Au a qai kania, ia ni'u sa kania tiko, sa vaka na oni na kena kamikamica.

⁴ A sa kaya na Kalou, “Luve ni tamata, mo lako yani vei ira na mataqali i Isireli ka tukuna na noqu vosa vei ira.

⁵ Ni o sa sega ni talai ki na dua na mataqali tamata sa duatani na nodra i vosavosa se dredre na kena cavuti, ia vei ira ga na mataqali i Isireli.

⁶ Ni kevaka ka'u sa talai iko vei ira na veimatanitu tani e vuqa ka sa dua tani na nodra i vosavosa ka sa dredre vei iko mo kila, era na rawa ni vakarorogo vei iko.

⁷ Ia era na sega ni vakarorogo vei iko na mataqali i Isireli; era sa sega mada ga ni via vakarorogo vei au. Era sa tamata viavialevu ka yalo kaukauwa o ira kecega na mataqali i Isireli.

⁸ Raica, au na vakayacori iko mo domo qa ka yalo kaukauwa me vakataki ira.

⁹ Au na vakayacori iko mo dei vakavatu, mo kaukauwa ka qaqa me vaka na vatu daimani; kakua ni rerevaki ira se taqayataka na i rairai ni matadra baleta ni ra sa tamata talaidredre ga.”

¹⁰ A kaya talega vei au o koya, “Luve ni tamata, mo tugana ki lomamu na veivosa kece au sa vosataka vei iko, ka me rogoca na daligamu.

¹¹ Ia mo lako yani vei ira sa vakabobulataki, vei ira na kai nomu, ka kaya vei ira, ‘Sa kaya vakaoqo na Kalou o Jiova,’ se ra na rogoca se sega.”

¹² Sa qai laveti au cake na Yalo ni Kalou, ia ena gauna ga sa talave kina na i ukuuku ni Kalou mai na kena i tikotiko, au sa rogoca e dua na domo e vadugu mai dakuqu ka sa kaya, “Me vakacaucautaki na lagilagi i Jiova mai na nona yasana mai lomalagi!”

¹³ Au a rogoca na cacarobaroba ni tabadratou na ka bula kei na rorogo ni qiqi e tikidratou, ka sa rogo levu me vaka na rorogo ni uneune.

¹⁴ Sa qai laveti au cake na Yalo ni Kalou ka kauti au yani. Au a lako ga ena rarawa bibi ni lomaqu kei na katakata ni yaloqu, ni sa tauri au vakaukauwa na liga i Jiova.

¹⁵ Au a yaco yani vei ira na bobula mai Telavivi, o ira sa vakaitikotiko ena yasa ni uciwai na Kipa. Au a mai tiko yani e kea ena yalo vakadrukai, kidroa ka luvuci tu ena veilecayaki me bogi vitu.

Na i Lesilesi ni Vakatawa nei Isikeli

¹⁶ Ni sa oti na bogi vitu, a qai yaco mai vei au na vosa i Jiova, ka vaka,

¹⁷ “Luve ni tamata, au sa lesi iko mo nodra i vakatawa na matanitu o Isireli. Ni o sa rogoca ga na vosa mai na gusuqu, mo la'ki vakasalataki ira sara me vaka ga na ka o a rogoca mai vei au.

¹⁸ Kevaka ka'u sa kaya vua na tamata ca, ‘O na mate vakaidina,’ ia kevaka o na sega ni vakasalataki koya, se mo sega ni vunauca na tamata o ya me biuta na sala ca, me rawa kina ni vakabulai koya vakaikoya, ena mate ga na tamata o ya ena nona caka cala; ia na nona mate ka'u na taroga vei iko.

¹⁹ Kevaka o sa vunauci koya ka vakasalataki koya na tamata ca, ka qai sega ni gole tani mai na nona ca, se mai na nona i tovo ca, ena mate ga o koya ena nona caka cala; ia o na sega ni beitaki ena nona mate.”

²⁰ “Kevaka sa vuki tani tale na tamata yalododonu mai na nona i valavala dodonu, ka sa caka cala, au sa na tauca e matana na ka me tarabe kina, ena mate ga o koya baleta ni o sa sega ni vakasalataki koya. Ena mate ga o koya ena nona i valavala ca, ia ena sega ni nanumi kina na i valavala dodonu ka a cakava taumada o koya, ia na nona mate ka'u na taroga vei iko.

²¹ Kevaka o sa vakasalataka na tamata yalododonu me kakua ni valavala ca, ka sa sega ni valavala ca kina, ena bula vakaidina o koya, baleta ni sa vakamuria na i vakasala, o sa na vakabulai talega kina o iko.”

²² A sa tarai au mai kea na liga i Jiova, ka kaya vei au, “Mo duri cake ka lako ki na buca, ka'u na qai vosa vei iko mai kea.”

²³ Au a mani lako yani ki na buca, ka raica, sa duri tu mai kina na i ukuuku i Jiova, me vaka na i ukuuku ka'u a raica mai na uciwai o Kipa; ka'u sa bale sara kina vakatoboicu.

²⁴ A curumi au na Yalo ni Kalou, ka vakaturi au cake ena yavaqu. A sa vosa vei au o Jiova ka kaya, “Mo la'ki sogolati iko ena nomu vale.

²⁵ O iko na luve ni tamata, raica, era na vesuki iko ena dali, mo kakua kina ni veilakoyaki rawa vei ira na tamata.

²⁶ Au na cakava me paralasi na yamemu, mo galu kina, ka me sega kina ni rawa mo vunauci ira tiko, ni ra sa tamata talaidredre.

²⁷ Ia ena gauna ga ka'u vosa kina vei iko, au na qai dolava na gusumu, o na qai kaya rawa vei ira, ka vaka, ‘Sa kaya vakaoqo na Kalou o Jiova’. Ena so vei ira era na rogoca ka so tale era na sega ni via rogoci iko, baleta ni ra tamata dau talaidredre.”