Isikeli 29 - Vakavakadewa Vou kei na iVola tale eso

Na Parofisai me Baleti Ijipita

¹ Ena i katini karua ni siga ni katini ni vula, ni katini ni yabaki, sa yaco tale mai vei au na vosa i Jiova, ka vaka:

² Luve ni tamata, mo vaqara na matamu vei tui Ijipita, na tui Ijipita, ka parofisaitaka na ca ena yaco vei koya, kei na ka ena yacovi Ijipita talega; mo vosa ka kaya,

³ Sa kaya vakaoqo na Kalou o Jiova: ‘Raica, au sa saqati iko vakaukauwa, o iko na tui Ijipita, na korokotaile levu o Canini ka koto e loma ni nona uciwai ka sa kaya, ‘Au sa taukena na wai na Naile; Ni ka'u a bulia ga,’

⁴ Au na vakacobara na noqu i qaso ki na galegalemu, ka vakalaivi ira na ika e nomu uciwai me ra kabita matua na yagomu, ka'u na qai vueti iko mai na loma ni nomu veiuciwai kei ira kece na ika era sa kabita tu na yagomu.

⁵ Au na biuti iko tani ki na vanua lala, o iko kei na ika ni nomu uciwai. O na qai tutu mamaca ki dela ni vanua; ka sega tale ni kumuni vata me bulu. Ka'u na soli kemuni me kedra kakana na manumanu ni vanua kei ira na manumanu vuka e macawa.

⁶ Era na kila na kai Ijipita kecega ni sai au o Jiova. Ni ra sai titoko gasau ki na mataqali i Isireli;

⁷ ni ra sa tauri iko ena ligamu, o sa na qai ramusu, ka mavoa sara kina na tabadra kece; ni ra sa ravi vei iko, o sa ramusu, ka kurea kecega na tolodra;

⁸ o koya oqo, sa kaya kina na Kalou o Jiova: Raica, au na kauta mai vei iko na i seleiwau, ka muduka tani na tamata kei na manumanu;

⁹ ka sa na lala me tawa yaga na vanua o Ijipita. Era na kila ni sai au o Jiova. Ni o a kaya, ‘Au sa taukena na Naile, ni'u a cakava oi au.’

¹⁰ O koya oqo, raica ka'u na veimecaki kina kei iko, kei ira na nomu uciwai, ka'u na cakava na vanua o Ijipita me vanua lala sara ka i benubenu, me vakatekivu mai Mikitoli ka yala ki Saini ka kauta yani ki na i yalayala ki Eciopea.

¹¹ Ena sega tale ni butuka e dua na yava ni tamata se manumanu. Ena sega na ka e bula kina me yabaki vasagavulu.

¹² Au na vakavuna me vanua lala o Ijipita e vuravura. Ena vakaleqai ka lala tu na veikoro lelevu e Ijipita me vasagavulu na yabaki, ka ca vakalevu sara mai na veikoro tale eso. Era na tamata vakasevi na lewena ka ra veiseyaki e veivanua.

¹³ Ia sa kaya vakaoqo na Kalou o Jiova: Ni sa cava e vasagavulu na yabaki, ka'u na qai vakasoqoni ira vata tale na kai Ijipita mai vei ira na lewe ni vanua era dui vakasavi kina;

¹⁴ Ia ka'u na vakasuka tale na veika vinaka kei na nodra i yau o ira na kai Ijipita, ka kauti ira lesu mai ki na vanua o Pacirosi, na vanua era a sucu kina. Mai kea, era na yaco me ra matanitu malumalumu,

¹⁵ io era na matanitu malumalumu duadua vei ira kecega, ka na sega tale ni vakalevulevui koya e deladra na veimatanitu; ni'u na vakalailaitaki ira sara me ra kakua ni la'ki lewai ira tale na veimatanitu.

¹⁶ Ia ena sega tale na vanua era na vakararavi kina na mataqali i Isireli, me ra vakananuma tale kina na nodra caka cala ni ra golevi ira yani me kere veivuke. Ia era na qai kila ni sai au na Kalou o Jiova.

Ena Vakamalumalumutaki Ijipita o Tui Nepukanesa

¹⁷ Ena i matai ni siga ni matai ni vula ni karuasagavulu kavitu ni yabaki, sa qai yaco vei au na vosa i Jiova ka vaka:

¹⁸ Luve ni tamata, sa lavaka o Nepukanesa na tui Papiloni vei ira na nona i valu e dua na cakacaka levu me ra valuti Taia kina; me tasi kece na uludra ka me luvawale kece na tabadra; ia e a sega sara na ka e rawata mai o Taia, se na nona mataivalu me sauma kina na cakacaka levu a caka kina.

¹⁹ O koya oqo, sa kaya kina vakaoqo na Kalou o Jiova: Raica, au na solia vei Nepukanesa na tui Papiloni na vanua o Ijipita; ka me tokitaka na kena i yau, ka na butakoca, ka kovea; ka sa na kena i sau na nona mataivalu.

²⁰ Au sa solia vua na vanua o Ijipita me i sau ni cakacaka sa cakava o koya, ni sa cakacaka o koya ena vukuqu, sa kaya na Kalou o Jiova.

²¹ “Ena siga o ya, ka'u na cakava me tubu na i leu ni mataqali i Isireli, ia ka'u na dolava na gusumu mo vosa vei ira. Era na kila ni sai au o Jiova.”