Isikeli 26 - Vakavakadewa Vou kei na iVola tale eso

Na Parofisai me Baleti Taia

¹ Ena i matai ni siga ni vula, ena i katini kadua ni yabaki, a vosa mai vei au o Jiova, ka vaka,

² “Luve ni tamata, ni sa vosataki Jerusalemi o Taia, ka kaya, ‘Ue! Ue! sa ramusu na nodra matamata ni koro na tamata, ka sa tadola vei au; au sa na vakamamautaki tale, ni sa lala mai o koya,’

³ o koya oqo, sa kaya kina na Kalou o Jiova, ka vaka: ‘Mo kila, au sa veimecaki kei iko, I Taia, ka na kauta cake mai vei iko na matanitu e vuqa, me vaka na ua sa se mai wasawasa.

⁴ Era na vakarusa na bai kei Taia, ka basuraka sobu na kena veivale cecere; ka'u na karia tani mai kina na kena qele, ka vakayacori koya me dua wale ga na vatu.

⁵ Era na dau sigasigani lawa kina na dauqoli, ni sa duri tu ena loma ni wai. Oi au, o Jiova, ka'u sa kaya oqo. Ia ena yaco o koya me nodra i toki ni valu na veimatanitu.

⁶ Era na mate ena i seleiwau o ira era sa vakaitikotiko ena nona veikorokoro ena loma ni vanua. Era na qai kila ni sai au o Jiova.’ ”

⁷ Ni sa kaya vakaoqo na Kalou o Jiova: “Raica, au na kauti Nepukanesa mai na tui Papiloni, na vanua vaka ki na vualiku, ki Taia, o koya na nodra tui na tui, na ose kei na qiqinivalu, kei na i valu ose, kei ira na lewe vuqa sara na tamata i valu.

⁸ Ena vakamatei ena i valu o ira na luvemu yalewa era sa vakaitikotiko ena veikoro mai na loma ni vanua. O ira na kemu meca era na bulia cake e dua na bai ni buku druadrua me valuti iko kina, ka na viria na kemu suva, ka na vakaduri ira na i sasabai me tarovi kemuni.

⁹ Ia sa na vakarota o koya na kena vakarautaki na kemu i tuki ni bai, me basuraka sobu na kemu bai, ka na taya sobu na nomu veivale cecere ena nona matau.

¹⁰ Me vaka ni sa lewe vuqa sara na nona ose, ena kuvuraka vei iko na kedra kuvu ni qele; ena yavavala na nomu bai kei na lalaga ena vuku ni domo ni mataivalu ose, ni sa curu o koya ki na nomu matamata ni koro ka sa kabasu na kena lalaga.

¹¹ Na nodra mataivalu vodo ose ena curuma vakaukauwa na nomu veitolo ni sala kece, ka vakamatei ira na nomu tamata ena i seleiwau. Ena vakabalei ki na qele na nomu veiduru lelevu.

¹² Era na tokitaka na nomu i yau, ka kovea na nomu i yau ni veivoli; era na basuraka sobu na nomu bai, ka vakacacana na nomu veivale vivinaka; ia era na viritaka ki loma ni wai na nomu veivatu, kei na nomu kauvaro ni vale kei na qele.

¹³ Ia ka'u na tarova na domo ni nomu mekemeke, ia ena sega ni rogo tale na domo ni nomu bitu ni vakatagi.

¹⁴ Ia ka'u na vukici iko mo vatu wale ga, ka o na yaco mo i sigasigani ni lawa ni qoli; o na sega sara ni tara vou tale; ni sai au o Jiova ka'u sa cavuta,” sa kaya na Kalou o Jiova.

¹⁵ Sa kaya vakaoqo na Kalou o Jiova ki Taia: “Me qai sega li ni yavalata vakacava na qele e baravi na domo ni nomu bale, ni ra sa vutugu tiko na vuetaki, ni sa ia na veivakamatei vei kemuni?

¹⁶ Era na qai siro sobu mai na nodra i tikotiko o ira na turaga kece ni wasawasa, biuta na nodra i tutuvi, ka luvata tani na nodra i sulu veivolavolai. Era na vakaisulu ena sautaninini; era na tiko sobu ki na qele, sautaninini, ka domobula tiko.

¹⁷ Era na lagata e dua na sere ni lolosi ena vukumu, Ka kaya vei iko, ‘Na nomu sa yali mai na veiwasawasa.’ O iko na koro rogo levu ka kilai, Ka gugumatua ena veivoli e wasawasa, O iko kei na lewe ni nomu koro, O ira ka ra vakararawataki ira ena loma ni vanua!

¹⁸ Ia oqo era sa sautaninini na veiyanuyanu Ena siga o a bale sobu kina; Io, na veiyatu yanuyanu ka ra ciri koto e wasawasa Era domobulataka na nomu sa yali.”

¹⁹ A sa tukuna vakaoqo na Kalou o Jiova: “Ni'u sa cakava mo koro lala, me vaka na veikoro sa sega tu ni tawani, ni'u sa kauta cake mai na wasa titobu, ka luvuci iko ena wai levu;

²⁰ ni'u na kauti iko sobu kei ira ka siro ki na i Keli, vei ira na tamata e liu, ka vakatikori iko ena ruku ni vuravura, ena veitikina sa rusa makawa, mo kakua kina ni tawani tale, se me dua na nomu i tikotiko ena nodra vanua na bula tiko.

²¹ Ka'u na vakayacora vei iko e dua na i tinitini vakadomobula, ka o na qai yali sara; ia sa dina o sa na dau vinakati ka qarai, ia o na sega sara ni kune tale, sa kaya na Kalou o Jiova.”