Isikeli 24 - Vakavakadewa Vou kei na iVola tale eso

Kuro ni Vakasaqa

¹ A yaco tale mai vei au na vosa i Jiova ena i katini ni siga ni katini ni vula ena i kaciwa ni yabaki, ka vaka:

² “Luve ni tamata, mo vola ena dua na i vola na yaca ni siga, na siga sara ga oqo. Sa buku druadrua ki Jerusalemi na tui Papiloni ena siga oqo.

³ Ia mo cavuta na vosa vakatautauvata ki na kawatamata dautalaidredre, ka kaya vei ira, ‘Sa kaya vakaoqo na Kalou o Jiova: Mo tokara na kuro ena sue, ka sova talega kina na wai;

⁴ mo qai biuta kina na tikitiki ni lewe, na veitikina vivinaka kecega, na sagana kei na tabana;

⁵ ka vakasinaita ena sui digitaki. Mo taura na kena ka uro duadua mai na qele ni sipi, ka visa na buka e rukuna; ka vakasaqara me buta.’

⁶ O koya oqo, sa kaya kina vakaoqo na Kalou o Jiova: “Ena ca na koro sa tauvi dra, ki na kuro veveka na lomana, ka sega ni takali tani mai kina! Me kau veitarataravi mai na lewena, ka kakua na digidigi kina.

⁷ Ni sa tu ga vua na dra ka vakadavea; ka sa tauca o koya e dela ni vatu; sa sega ni sova o koya e dela ni qele, me ubia kina na kuvu ni qele.

⁸ Me na vakatubura na noqu cudru, me ia na veicudruvi, au sa tauca na dra ka vakadavea e dela ni vatu, ka me kakua ni tabonaki.

⁹ “O koya oqo, sa kaya kina vakaoqo na Kalou o Jiova: Ena ca na koro sa vakadave dra! Ia ka'u na vakalevuya na i binibini buka.

¹⁰ Binia na buka, ka tutuvaka, ka vakabutara vinaka na lewena, ka me maca sara na kena suvu, me kama yavu yani na sui.

¹¹ Me qai toka ni sa lala ena dela ni qilaiso waqa, me katakata ka me kama na kena parasa, ka me vakawaicalataki na kena duka, ka yavu na kena veveka.

¹² Sa vakaocai au wale o koya; ni sa sega ni takali tani ena bukawaqa na veveka vavaku ka tu kina.

¹³ Ia na veveka o ya sai koya na nomuni dukadukali ka vakasisila. Baleta ni'u sa na vakasavasavataki iko ka o sa bese tu ni savai tani mai na nomu dukadukali, o na sega tale mada ni savai mai na nomu dukadukali, me yacova ni sa vakayacori na noqu cudru vei iko.

¹⁴ Oi au o Jiova, ka'u sa cavuta; ena yaco ga, ka ni'u na cakava; ka'u na sega talega ni suka ki muri, ka'u na sega talega ni vosota, ka'u na sega talega ni veivutuni; ka'u na vakataulewa vei iko me vaka na nomu i tovo, ka vaka na nomu i valavala,” sa kaya na Kalou o Jiova.

Na Mate nei Wati Isikeli

¹⁵ Sa yaco tale mai vei au na vosa i Jiova, ka vaka:

¹⁶ “Luve ni tamata, au na kauta tani vakasauri mai vei iko na tamata o sa dau vinakata vakalevu. Mo kakua sara ni vosa kudrukudru kina, se osivaka, se me tuturu kina na wai ni matamu.

¹⁷ Mo vutugu, mo kakua soti ni qoqolou sara; mo kakua talega ni tagicaka na mate. Viria na nomu i vauvau ki ulumu; ka daramaka na nomu i vava; kakua ni ubia na tebe ni gusumu, se kania na kedra na vakaloloku.”

¹⁸ Ia ka'u sa vosa vei ira na tamata ena mataka; a sa ciba na watiqu ena yakavi. Ia ena mataka ka dua, au a kitaka na ka sa vakaroti vei au.

¹⁹ Era a kaya vei au o ira na tamata, “O na sega beka li ni tukuna se cava na kena i balebale vei keimami na veika oqo?”

²⁰ Au a qai kaya vei ira, “Sa yaco mai vei au na vosa i Jiova, ka vaka:

²¹ Mo kaya vei ira na mataqali i Isireli, Sa kaya vakaoqo na Kalou o Jiova: Raica, au na vakacacana na noqu Valenisoro, na vale tabu ka a nomuni i sakisaki, ka nomuni vurevure ni kaukauwa, ka i divi ni matamuni, ka taleitaki e vu ni yalomuni. Era na vakamatei ena i valu o ira na lewe ni nomuni vuvale o ni a laivi ira tu yani mai Jerusalemi.

²² Mo ni qai vakayacora me vaka ka'u sa vakayacora; mo ni kakua ni ubia na matamuni, ka kakua ni kania na kedra kakana o ira sa vakaloloku.

²³ Mo ni daramaka ga na i vau ni ulumuni kei na i vava ki yavamuni; mo ni kakua ni vakaloloku se tagi. Ia o ni na yago ca ga mai ena vuku ni nomuni i valavala ca, ka ia na vutugu ena kemuni maliwa.

²⁴ Sa na i dusidusi vei kemuni o Isikeli; mo ni qai lai cakava na veika kecega sa cakava o koya. Ni sa yaco na ka oqo, o ni na qai kila kina ni sai au na Kalou o Jiova.”

²⁵ “Ia o iko na luve ni tamata, ni'u sa taura mai vei ira na koro ni valu o ya, na koro ni valu ka dau vakamarautaki ira ena kena totoka, ka dau vu ni marau ki matadra, kei na ka e dau lasa kina na yalodra, ka vakakina o ira na luvedra tagane kei na luvedra yalewa.

²⁶ Ena siga o ya, ena qai lako mai vei iko e dua sa dau dro voli, ka mai vakarogoya vei iko na i tukutuku.

²⁷ Sa na dolavi na gusumu ena siga o ya, mo vosa kina vei koya sa dro voli, ni o sa vosa rawa talega ka sega ni galu tiko. Ia o na yaco mo kedra i vakatakilakila: ka ra na kila ni sai au o Jiova.”