Isikeli 23 - Vakavakadewa Vou kei na iVola tale eso

O Aola kei Aolipa

¹ A sa yaco tale vei au na vosa i Jiova me vakaoqo:

² “Luve ni tamata, E rau a bula voli e rua na yalewa veitacini.

³ Ni rau se goneyalewa lalai ka tiko mai Ijipita, erau a tekivu moce vata na tagane ka yaco me rau yalewa dautagane.

⁴ O koya e qase cake e yacana o Aola kei koya e gone na yacana o Aolipa. Au a tauri rau ruarua me watiqu, ka rau vakasucuma na luvedrau tagane kei na luvedrau yalewa. Me baleta na yacadrau, o Aola sai Samaria, kei Aolipa sai Jerusalemi.

⁵ A sa ia ga na dautagane o Aola, ka dina ga ni sa noqu o koya; a sa veidomoni kei ira na nona i tau, na kai Asiria,

⁶ o ira na qaqa ka ra vakaisulu lokaloka, o ira na kovana kei na komada ni mataivalu; era sa cauravou musudonu kece ka dauvodo ose.

⁷ A sa dau soli koya o Aola me veibutakoci kei ira na vakailesilesi ni Asiria, ka sa vagolei koya kina na nona dodomo oqo me la'ki vakadukadukalitaki koya ena qaravi kalou matakau ni Asiria.

⁸ A tomana voli ga o koya na nona dautagane ka a tekivuna mai Ijipita, ena vanua ka tekivu mocera kina na tagane. Mai na gauna e se goneyalewa lailai kina, era sa dau moce vata kei koya na tagane ka okati koya me yalewa dautagane.

⁹ O koya oqo, au sa soli koya kina ki na ligadra na nona veidomoni mai Asiria, o ira ka sa dau garova vakalevu o koya.

¹⁰ O ira oqo era sa qai vakaraitaka na nona luvawale, ka ra tauri ira na luvena tagane kei na luvena yalewa, ka vakamatei koya ena i seleiwau. A kuruseta na vanua na nodra veitalanoataka na marama na veika me baleta na nona mate.

¹¹ “E dina ga ni sa raica na ka oqo o Aolipa na tacina, sa qai ca vakalevu cake sara vei rau o koya ena nona daugagano kei na nona dautagane.

¹² Sa daudomoni ira na kai Asiria o Aolipa — o ira na kovana, na komada ni mataivalu, o ira na sotia era vakaisulu tu vakaivalu, o ira na dauvodo ose, ka ra sa cauravou musudonu kece o ira oqo.

¹³ Au sa raica ni sa vakadukadukalitaki o koya, ni sa tautauvata ga nodrau i valavala na yalewa veitacini oqo.

¹⁴ “Ia sa qai vakaikuritaka tale o Aolipa na nona dautagane. A sa dau dreta na yalona na kedra i yaloyalo se i vakatakarakara na i vakalesilesi ni Papiloni, o ira ka nodra vanua ni sucu o Kalidia.

¹⁵ Era sa ceuti tu na i vakatakarakara oqo ena lalaga ka boro damudamu kata, ka ra vakabeleti ena i oro e tolodra, ka vau ki uludra na i vau ni ulu rairai totoka.

¹⁶ Ia ni sa raici ira o Aolipa, sa domoni ira sara o koya, ka dau vakatadu mata vei ira mai Kalidia.

¹⁷ Era a lako mai vua na cauravou ni Papiloni ki na nona i mocemoce ni dodomo, ka ra vakadukadukalitaki koya ena nodra garogaro ca. Ia ni ra sa vakayagataki koya oti ka vakadukadukalitaka, a sa gole tani mai vei ira o Aolipa ka tuburi koya na yalo ni vakasisilataki ira.

¹⁸ Ena gauna sa vakayacora vakadoudou ga kina o koya na nona dautagane, ka sa sega ni madualaka na nona luvawale, ka'u a qai vuki tani mai vua ena yalo e vakasisilataki koya, me vaka na noqu a vuki tani mai vei Aola na tuakana.

¹⁹ Ia sa qai vakalevutaka cake ga na nona dautagane, ka ni se dau nanuma voli ga na nona gauna ni goneyalewa mai Ijipita, ena nona dau cakava maikea na dautagane.

²⁰ A sa dau vinakataki ira talega na tagane garogaro sivia, o ira era sa vaka na garogaro ni asa se ose tagane na nodra i vakarau.

²¹ (I Aolipa, o sa via tokaruataka ga na i vakarau vakasisila ni nomu gauna vakagoneyalewa mai Ijipita, ena vanua era a vaqitora kina na sucumu ka vakavuna mo tekivu vakamoce tagane kina.)

²² A sa qai kaya na Kalou o Jiova, “O koya oqo, i Aolipa, mo rogoca vinaka sara oqo. O sa rui oca vakalevu sara mai vei ira o sa dau domona, ia au na vakayacora me ra cudruvi iko ka saqati iko mai na veiyasana kecega.

²³ Au na kauti ira kece mai na kai Papiloni kei ira na kai Kalidia, na kai Pikoti, Soa, kei Koa, vata kei ira kece na kai Asiria. Au na vakasoqoni ira vata mai na cauravou musudonu era vakailesilesi vakamatanitu, na komada ni mataivalu, na turaga ni valu, o ira na tamata i valu, ka ra sa dauvodo ose kece sara.

²⁴ Era na mai valuti iko mai na vualiku, ena nodra qiqinivalu kei na qiqi ni yaya, kei ira na i lawalawa e lewe vuqa; era na tuvai ira vakaivalu, ka me ra vakavolivoliti iko, ka ra na vakaisasabai, na i sasabai lalai, kei na i sala ni valu; ia ka'u na solia vei ira na lewa, ka ra na vakataulewa vei iko me vaka na nodra lewa.

²⁵ Ena vuku ni noqu cudruvi iko, au na laiva me ra sotavi ira ena dela ni nodra cudruvi iko. Era na musuka laivi na ucumu kei na daligamu, ia o ira na dro bula era na vakamatei ena i seleiwau. Era na kauta laivi na luvemuni; era na vakamai bulabula ena bukawaqa o ira era dro bula.

²⁶ Ka ra na luvata tani mai vei iko na nomu i sulu, ka koveraka na nomu i taube totoka ka vakaiukuuku uasivi.

²⁷ O koya oqo au na muduka kina na nomu i valavala velavela kei na nomu dautagane o a kauta mai na vanua o Ijipita; o na sega tale ni gadrevi ira, se nanumi Ijipita tale.”

²⁸ Ni sa kaya vakaoqo na Kalou o Jiova: “Raica, au na soli iko ki na ligadra na tamata o sa cata, ki na ligadra talega sa vuki tani mai kina na lomamu;

²⁹ ka ra na cakacaka vei iko ena dela ni veicati, ka kauta tani kecega na vua ni nomu buno, ka laivi iko tu mo luvawale ka tu wale; ena vakaraitaki na nomu luvawale ni dautagane. Na nomu dau ia na ka vakasisila kei na nomu dautagane, sa vakavuna kina me yaco vei iko na ka oqo.

³⁰ Ni o sa dautagane ena kedra maliwa na veimatanitu, ka sa vakadukadukalitaki iko ena nodra veimatakau.

³¹ O sa muria na i valavala i Aola na tuakamu; o koya oqo ka'u sa solia kina na mena bilo ki na ligamu.”

³² Sa kaya vakaoqo na Kalou o Jiova: “O sa gunu ena bilo i tuakamu Ka ni rui rabailevu ka titobu; O na dredrevaki, ka na tauri me vakalialiai,

³³ O na vakasinaiti ena mateni kei na rarawa; Na bilo ni taqaya kei na vakaloloma Sa i koya na mena bilo na tuakamu o Samaria;

³⁴ O na gunuva ka vakamacara sara, Ia na kena veitikina sa kavoro ena dresuka laivi kina na sucumu. A veika oqo ka'u sa tukuna, sa kaya na Kalou o Jiova.

³⁵ O koya oqo, sa kaya kina na Kalou o Jiova: “Ni o sa guilecavi au, ka biuti au ki dakumu, o koya oqo mo colata kina na i sau ni nomu i valavala ca ka vakasisila ni dautagane.”

³⁶ Sa kaya tale vei au na Kalou o Jiova: “Luve ni tamata, o na vakataulewa li vei rau o Aola kei Aolipa? Ia mo tukuna vei rau na nodrau i valavala vakasisila.

³⁷ Ni rau sa ia na veibutakoci, ka sa tu talega e ligadrau na dra; e rau sa ia talega na dautagane kei na nodra matakau. E rau a bau vakacabori ira talega na luvedrau tagane ka rau vakasucuma vei au, vei ira na matakau me kedra kakana.

³⁸ A ka talega oqo e rau a cakava vei au: e rau a vakavelavelataka na noqu Valenisoro ena siga vata o ya, ka vakacacana talega na noqu Siga ni Vakacecegu.

³⁹ E rau sa bau la'ki vakamatei ira na luvedrau me vakacabori vei ira na nodra matakau, ena siga vata ga ka rau curuma kina na noqu Valenisoro me vakavelavelataka. Ia raica, oqo na ka e rau a cakava ena noqu loma ni vale.

⁴⁰ “Ia e rau a bau la'ki vakatadu mata vei ira na tagane me ra lako mai na vanua yawa, ka ni rau talai kina, ka raica, era a lako mai, o vakasilimi iko ena vukudra, qumuta na matamu, ka sauni iko ena nomu i yaya ni sasauni;

⁴¹ o a davo ena dua na i davodavo vakaturaga, ia o a vakatikora na noqu ka boi vinaka kei na noqu waiwai ena teveli sa vakarau tu e yasana.

⁴² Era a totaki koya na domodra na lewe vuqa ka ra mamarau tiko; kei ira na tamata wale ka daumateni ka ra la'ki kau mai ena vanua liwa lala; daramaka na qato e ligadra na marama ka vakaisalataka na uludra ena i sala vakaiukuuku.

⁴³ “Au a qai kaya, era sa sega li ni veibutakoci vata kaya o ira na tamata ni ra ia na dautagane oqo kei koya?

⁴⁴ Ia era a curu vua, me vaka era a curu na tagane vua e dua na yalewa sa dautagane. Sa vakaoqo na nodra curu vei rau o Aola kei Aolipa, me ia na i tovo velavela.

⁴⁵ Ia era na vakataulewa na tamata yalo dodonu, me i totogi ni yalewa dautagane, kei ira talega na yalewa sa vakadave dra; ni rau sa yalewa dautagane, ka sa tauvi dra na ligadrau.”

⁴⁶ A kaya vakaoqo na Kalou o Jiova: “Kauti ira cake mai na lewe vuqa, ka soli vei ira me rau vakacacani ka me i toki.

⁴⁷ Era na vakaviriki rau ena vatu na lewe vuqa, ka vakamatei rau ena nodra i seleiwau; era na vakamatei ira talega na luvedrau tagane kei na luvedrau yalewa, ka vakama na nodrau veivale.

⁴⁸ Ia ka'u na muduka tani vakaoqo na i valavala vakasisila mai na vanua, me vunauci ira kece na yalewa, me ra kakua ni muria na i valavala vakasisila me vaka e rau a kitaka.

⁴⁹ Ia era na sauma vei kemudrau na nomudrau i valavala velavela, ena tau talega vei kemudrau na i sau ni valavala ca levu ni nomudrau matakau; ka o drau na kila kina ni sai au na Kalou o Jiova.”