Isikeli 22 - Vakavakadewa Vou kei na iVola tale eso

Na Caka Cala Eso nei Jerusalemi

¹ A sa yaco tale vei au na vosa i Jiova, ka vaka,

² “Ia o iko na luve ni tamata, o na vakataulewa li? Io o na vakataulewa ki na koro sa dave tu kina oqo na dra. Ia mo qai kacivaka vua na nona i valavala vakasisila kecega.

³ Mo qai vaka, Sa kaya vakaoqo na Kalou o Jiova: Na koro oqo sa dave na dra e lomana, ka sa yaco mai na nona siga, ka sa cakava oqo na veimatakau me vakadukadukalitaki koya kina!

⁴ O sa yaco mo cala ena vuku ni dra o sa vakadavea, ka sa vakadukadukalitaki iko ena veimatakau o sa cakava; ia o na kauta voleka mai na nomu siga, sa yaco mai na gauna lokuci ni kemu yabaki yalataki. O koya oqo ka'u na solia vei iko mo vunauca na veimatanitu ka mo dredrevaki mai na veivanua kecega.

⁵ Era na dredrevaki iko o ira sa voleka kei ira sa yawa mai vei iko, o iko na daurogorogo ca, ka dau vakatubu mauwe.

⁶ Raica, o ira na turaga ni Isireli era sa dui tiko vei iko me vaka na ka era dui rawata, ka sa railasa tiko vei ira na vakadave dra.

⁷ Era sa beci na tama kei na tina ka ra tiko vei iko; ka ra sa vakasaurarataki ira na nomu vulagi; ka ra sa vakacalai na yada kei ira na luveniyali, era sa tiko kei iko.

⁸ O sa beca na noqu veika tabu, ka vakacacana na noqu Siga ni Vakacecegu.

⁹ Era sa tiko vei iko na tamata daukakase me ra vakadavea kina na dra, kei ira na tamata sa kana voli ena veiulunivanua, ka ra i valavala vakasisila vei kemuni.

¹⁰ Era sa tiko kei iko o ira era sa vakaraitaka na nodra luvawale na tamadra; ka ra sa kucuva na yalewa ni tauvi ira tiko na kedra mate vakamarama.

¹¹ Ia e dua sa kitaka na ka vakasisila kei na wati ni kai nona; ka dua tale sa vakadukadukalitaka vakaca sara na vugona yalewa; ka duatani tale ena kemuni maliwa sa kucuva na ganena, na luve i tamadrau.

¹² Era sa tiko vei iko o ira na tamata ka ra taura na i yau, me ra vakadave dra; ka taura na tubu vakailavo ka vakalevutaki cake sara vei ira na kai nomu ena nomu yalo kocokoco; ka o sa guilecavi au,” sa kaya na Kalou o Jiova.

¹³ “O koya oqo, raica, au sa tavia vata na ligaqu ena vuku ni nomu i yau ni kocokoco o sa rawata, ena vuku talega ni dra ka sa dave vei kemuni.

¹⁴ Ena dei beka na lomamu, se na kaukauwa na ligamu, ena veisiga ka'u na cakava talega.

¹⁵ Ia ka'u na vakasavi kemuni ki na veimatanitu, ka na dui biubiuti kemuni ki na veivanua, ia ka'u na vakaotia sara na nomuni dukadukali mai vei kemuni.

¹⁶ Ia o ni na vakavelavelataki au e matadra na veimatanitu; ka o ni na qai kila ni sai au o Jiova.”

¹⁷ A yaco vei au na vosa i Jiova, ka vaka:

¹⁸ “Luve ni tamata, sa yaco me ra de ni kaukamea vei au o ira na mataqali i Isireli; o ira kece sa siliva, parasa, tini, kaukamea, kei na uma e loma ni kuro ni buka; io era sa benu ni kaukamea.

¹⁹ O koya oqo, sa kaya kina na Kalou o Jiova: Ena vuku ni o ni yaco kecega mo ni benu ni kaukamea, raica, ka'u na soqoni kemuni kina ki na loma o Jerusalemi.

²⁰ Me vaka era kumuna vata o ira na tamata na siliva, na parasa, na kaukamea, na uma kei na tini ki na kuro ni buka, me irivaka kina na bukawaqa me vakawaicalataki;

²¹ au sa na soqoni kemuni vata vakakina ena noqu cudru, ka'u na qai biuti kemuni kina ka vakawaicalataki kemuni e lomana.

²² Me vaka sa vakawaicalataki na siliva ena kuro ni buka, o ni sa na vakawaicalataki talega vakakina e lomana, ia o ni na kila ni sai au o Jiova ka sovaraka na noqu cudru vei kemuni.”

²³ A yaco mai vei au na vosa i Jiova, ka vaka,

²⁴ “Luve ni tamata, mo kaya vei koya, ‘Sa i iko e dua na vanua ka sa sega ni vakasavasavataki, se tauci uca ena siga ni cudru.

²⁵ O ira na turaga era tiko kina, era sa vaka na laione ka tagi voli ni dresulaka na kena; era sa kana tamata; era sa taura na i yau kei na ka talei; era sa vakalewevuqataka na kena yada.

²⁶ O ira na nona bete era sa vakacacana na noqu vunau, ka vakacacana na noqu veika tabu; era sa sega ni vakaduiduitaka na ka sa tabu kei na kena sa sega ni tabu, ka ra sega talega ni ra vakavuvulitaka na duidui ni tawa savasava kei na savasava, ka ra sa sega ni okata na noqu Siga ni Vakacecegu, ka'u sa vosavakacacataki.

²⁷ O ira na kena turaga era sa vaka na olifa era sa dresulaka na kedra, ka vakadavea tiko na dra, ka ra vakamatea na bula me ra rawata vakatawadodonu na ka.

²⁸ Ia o ira na nona parofita era sa boroi ira ena i boro vulavula, ni ra sa raica na raivotu wale, ka ia na caka mana vakailasu vei ira ka vaka: Sa kaya vakaoqo na Kalou o Jiova, ia e sega ni kaya vakakina o koya na Turaga.

²⁹ O ira na lewe ni vanua era sai valavala kaukauwa, ka ra na butako; era sa vakasosataki ira na dravudravua kei ira na leqa tu, ka vakasaurarataki ira vakatawadodonu na vulagi, ka sega ni vakadodonutaka.

³⁰ Ia ka'u sa qara e dua na tamata vei ira, o koya ka na viria na bai, ka me tu ena tiki ni bai sa basuki e mataqu ena vuku ni vanua, me'u kakua ni vakarusa; ia ka'u sa sega ni kunea e dua.

³¹ O koya oqo, ka'u sa sovaraka kina vei ira na noqu cudru; ka'u na vakarusai ira ena bukawaqa ni noqu cudru; ka'u na sauma vei ira na nodra i valavala, sa kaya na Kalou o Jiova.’ ”