Isikeli 21 - Vakavakadewa Vou kei na iVola tale eso

Na i Seleiwau i Jiova

¹ A yaco tale vei au na vosa i Jiova, ka vaka:

² “Luve ni tamata, mo rai mada vaka ki Jerusalemi, ka vakatauca na nomu vosa ki na veiyasana tabu; ka parofisaitaka na ka ca ki na vanua o Isireli,

³ ka kaya ki na vanua o Isireli, ‘sa kaya vakaoqo o koya na Turaga, au na kemu meca, ka'u na ucuna na noqu i seleiwau mai na kena taga ka taya na tamata yalo dodonu kei ira na tamata ca.

⁴ Ena vuku ni noqu a muduki ira vata na yalo dodonu kei ira na tamata ca: ia ni vaka tu oqo, ena ucu kina na noqu i seleiwau mai na kena taga me taya na tamata kecega vaka ki na ceva ka vaka talega kina ki na vualiku;

⁵ ka ra na kila na tamata kecega ni sai au o Jiova ka'u sa ucuna na noqu i seleiwau mai na kena taga; ka na sega ni daramaki tale kina.’ ”

⁶ “O koya oqo, o iko na luve ni tamata, mo vutugu me vaka na mosi ni rarawa bibi ni yalomu e matadra.

⁷ Ia ni ra sa kaya vei iko, ‘A cava li o vutugu kina?’ mo qai kaya, ‘Ena vuku ni dua na i rogorogo. Ia ni sa yaco mai, ena waicala na loma ni tamata kecega, ka na nawa na duru ni tamata kecega me vaka na wai. Raica sa lako tiko mai, ka na vakayacori vakaidina,’ ” sa kaya na Kalou o Jiova.

⁸ A yaco tale vei au na vosa i Jiova, ka vaka:

⁹ “Luve ni tamata, mo parofisai mada ka kaya, ‘Sa vosa vakaoqo o Jiova, mo kaya: A i seleiwau, a i seleiwau sa vagatari tu ka sa vakacalivataki vinaka.

¹⁰ Sa vagatari tu me ia kina na veivakamatei, Ka masiraki me tatibi vaka na livaliva! Se me da veiwali li? O ni sa beca na noqu i titoko, i na luvequ, na veika kecega sa caka ena kau.

¹¹ Sa vakacalivataki tu na i seleiwau, me rawa ni taurivaki; A sa vagatari, ka qusiraki vinaka, ka soli ki na ligana na dauveivakamatei.

¹² Mo tagi ka qoqolou o iko na luve ni tamata, Ni sa baleti ira na noqu tamata kei ira na turaga na i seleiwau oqo. Era na vakamatei na veiliutaki e Isireli Era sa soli ki na i seleiwau kei ira na noqu tamata O koya oqo mo tavi lomaseremu kina.

¹³ Ni sa sega ni dua na vakatovolei A cava tale li o na rawata kevaka o beca na i titoko?” Sa kaya na Kalou o Jiova.

¹⁴ “O koya oqo, mo ia kina na parofisai o iko na luve ni tamata; ka tavia vata na ligamu, ka laiva me lutu mai vakarua, io me vakatolu, na kedra i seleiwau o ira me ra moku; e sai seleiwau ni veivakamatei levu, ka vakavolivoliti ira,

¹⁵ ka me waicala kina na lomadra, ka ra bale mate e lewe vuqa ena nodra matamata ni koro. Na noqu i seleiwau ni veivakamatei sa wawa tu ena veimatamata yadua, sa taliva vinaka me ia kina veivakamatei.

¹⁶ Ena ta yani ki na i matau se ki na i mawi, ena vanua ga sa qara vakadodonu kina na matana.

¹⁷ Ia oi au, au na qumia vata na ligaqu ruarua, ka vakaceguya na noqu cudru; oi au o Jiova, ka'u sa vosa me vakaoqo.”

¹⁸ A sa yaco tale vei au na vosa i Jiova, ka vaka:

¹⁹ “Luve ni tamata, mo vakatakilakilataka e rua na sala me muria yani na nona i seleiwau na tui Papiloni; e duabau ga na vanua e rau vu ruarua mai kina. Ia mo vakaduria e dua na i dusidusi ni sala, ka kelea ena mua ni sala ki na koro;

²⁰ mo vakatakilakilataka e dua na sala, me yaco yani ki Rapa, na nodra koro na kawa i Amoni, kei Juta talega, kei Jerusalemi na koro vakabai.

²¹ Ni sa tu o tui Papiloni ena basoga ni salatu, ena mua ni rua na sala, me taurivaki kina na i vakatakilakila; sa vakayavalata na gasau o koya, sa taroga na matakau, sa dikeva na yate ni manumanu.

²² Sa tu ena ligana i matau na madigi kei Jerusalemi, me dolava na gusuna ena qoqolou, me tabalaka cake na domo ni kaila, me vakatikora na i tukituki ni voro bai ki na matamata ni koro, me viria na suva, me tara na vale ni valu.

²³ Ia vei ira, e rairai vaka e dua na madigi vakailasu; era sa vosa bubului oti tu; ia sa vakananuma ga o koya na nodra cala, me rawa kina ni ra tauri vakavesu.

²⁴ O koya oqo, sa kaya kina vakaoqo na Kalou o Jiova: Ni o ni sa kitaka na nomuni caka cala me sa nanumi, ni sa vakavotui na nomuni talaidredre, ka sa kilai na nomuni i valavala ca ena nomuni cakacaka kecega; io ena vuku ni o ni sa nanumi, o ni sa tauri kina vei ira.

²⁵ “Ia o iko o tamata beci ka vere ca, na turaga ni Isireli, ka sa yaco mai na nomu siga na gauna me tau kina na i tinitini ni kemu i totogi,

²⁶ sa kaya kina vakaoqo na Kalou o Jiova: Mo luvata tani na i vauvau, ka kauta tani na i sala vakatui; ena sega ni o koya tikoga na veika sa yaco; mo laveta cake na veika sa vakalolovirataki, ka vakasivoi o koya sa cecere.

²⁷ Au na vukica me rusa, me rusa, io me rusa; ena sega wale mada ga ni kune e dua na tikina, me yacova ni sa lako mai o koya sa dodonu me nona; ia ka'u na solia vua.

²⁸ “Ia o iko, na luve ni tamata, mo ia na parofisai, ka kaya, Sa kaya vakaoqo na Kalou o Jiova ena vukudra na Amoni kei na nodra vunauci; ka kaya, Sa ucu mai na kena taga na i seleiwau, Io, na i seleiwau me ia kina na veivakamatei. Sa masiraki vinaka me makumakualiliva Ka me tatibi me vaka na livaliva.

²⁹ Ni ra sa raica vei iko na nomu raivotu vakailasu ena vukumu ka me taubeni e domodra na tamata beci ka dauvere, o ira ka sa yaco mai na kedra siga, me ra totogi kina ena vuku ni nodra caka cala.

³⁰ “ ‘Mo vakasuka tale na i seleiwau ki na kena taga. Au na vakataulewa vei iko ena vanua o a buli kina, io na vanua o a sucu kina.

³¹ Ia ka'u na sovaraka vei iko na noqu cudru; ka'u na uvuca e delamu na bukawaqa ni noqu cudru; ka'u na soli iko ki na ligadra na tamata dauveivakararawataki, ka kedra dau na veivakarusai.

³² O na buka me bukani kina na bukawaqa; ia na nomu dra ena curuma na qele; o na sega ni nanumi tale; ia oi au o Jiova ka'u sa cavuta.’ ”