Isikeli 20 - Vakavakadewa Vou kei na iVola tale eso

Na Lewa ni Kalou kei na i Valavala Ca ni Tamata

¹ Ena i katini ni siga ni kalima ni vula, ena i kavitu ni yabaki, era a lako cake mai kina eso na qase ni Isireli me ra vakataroga vei au na lewa i Jiova, ka ra a mai tiko sobu e mataqu.

² Sa qai yaco vei au na vosa i Jiova, ka vaka:

³ “Luve ni tamata, mo vosa vei ira na qase ni Isireli, ka kaya vei ira, sa kaya vakaoqo na Kalou o Jiova, o ni lako mai oqo mo ni mai tarogi au? Me vaka na dina ni noqu bula, a kaya na Kalou o Jiova, au na sega ni tarogi mai vei kemuni.

⁴ “O na vakataulewa li vei ira, o iko na luve ni tamata, o na vakataulewa li vei ira? Ia mo vakatakila vei ira na veivalavala vakasisila ni nodra qase,

⁵ ka kaya vei ira, ‘Sa kaya vakaoqo na Kalou o Jiova: Ena siga ka'u a digitaki ira kina na Isireli, au a bubuluitaka kina vei ira na kawa i Jekope, ka'u a vakatakilai au kina vei ira ena vanua o Ijipita, ni'u a vosa bubului ka kaya, Oi au o Jiova na nomuni Kalou.

⁶ Ena siga o ya, au a yalataka vei ira ni'u na kauti ira tani mai na vanua o Ijipita, ki na dua na vanua ka'u a vakadikeva matua me nodra, na vanua sa drodro kina na wai ni sucu kei na oni, na vanua uasivi ka lagilagi mai na veivanua kecega.

⁷ Au a qai kaya vei ira, Mo ni dui biuta tani na veika vakasisila ka dau raica na matamuni oi kemuni kece sara, ia mo ni kakua ni vakadukadukalitaki kemuni ena veimatakau ni Ijipita; oi au o Jiova na nomuni Kalou.

⁸ Ia era sa talaidredre vei au, ka bese ni vakarorogo vei au; era sa sega ni dui biuta tani na tamata kece, na veika vakasisila ka raica na matadra, se me ra biuta na matakau ni Ijipita. Ia au qai nanuma me'u na sovaraka na noqu cudru vei ira, me'u na vakayacora na noqu cudru vei ira ena loma ni vanua o Ijipita.

⁹ Ia ka'u cakacaka ga ena vuku ni yacaqu, me kakua ni vakacacani e matadra na veimatanitu, era sa tiko kei ira, ka'u sa vakatakilai au vei ira e matadra, ena noqu kauti ira tani mai na vanua o Ijipita.

¹⁰ “Ia ka'u a kauti ira tani mai na vanua o Ijipita, ka kauti ira ki na vanua talasiga.

¹¹ Au a solia vei ira na noqu vunau, ka vakatakila vei ira na noqu lewa, kevaka e cakava e dua na tamata ena bula kina.

¹² Ia ka'u a solia talega vei ira na noqu Siga ni Vakacecegu, me noqu i vakatakilakila vei ira me ra kila ni sai au o Jiova ka vakatabui ira.

¹³ Ia sa talaidredre vei au na mataqali i Isireli mai na loma ni vanua dravuisiga; ka ra sa sega ni muria na noqu i vunau, ka ra beca na noqu lewa, o koya kevaka e muria e dua na tamata ena bula kina; ka ra a vakacacana sara na noqu Siga ni Vakacecegu. “Ia ka'u mani nanuma me'u na sovaraka vei ira na noqu cudru mai na loma ni vanua dravuisiga ka me'u na muduka vakadua kina vei ira na veika oqo.

¹⁴ Ia ka'u cakacaka ga ena vuku ni yacaqu, me kakua ni vakacacani e matadra na veimatanitu ka'u a kauti ira tani mai kina.

¹⁵ Ia ka'u a bubuluitaka vei ira mai na loma ni vanua dravuisiga me'u kakua ni kauti ira ki na vanua ka'u a solia vei ira, na vanua sa dave kina na wai ni sucu kei na oni, na vanua lagilagi ka uasivi cake mai na veivanua kecega,

¹⁶ ka ni ra sa beca na noqu lewa, ka ra sega ni muria na noqu i vunau, ka ra vakacacana na noqu Siga ni Vakacecegu; ia ena lomadra, era sa goleva na nodra matakau.

¹⁷ “Ia ka sa vosoti ira na mataqu, ka'u a sega ni vakarusai ira me ra kawaboko mai na loma ni vanua dravuisiga.

¹⁸ “Ia ka'u a kaya vei ira na luvedra ena loma ni vanua dravuisiga, Mo ni kakua ni muria na nodra i vunau na nomuni qase, ka kakua ni vakabauta na nodra lewa, ka kakua talega ni vakadukadukalitaki kemuni ena nodra matakau.

¹⁹ Oi au o Jiova na nomuni Kalou; mo ni muria na noqu vunau, mo ni qarauna sara ka vakabauta na noqu lewa ka cakava,

²⁰ ka mo ni vakatabuya na noqu Siga ni Vakacecegu ka me ra i vakatakilakila vei kemuni kei au, ka mo ni kila kina ni sai au o Jiova na nomuni Kalou.

²¹ “Ia ka ra sa talaidredre vei au o ira na luvedra; ka ra sa sega ni muria na noqu vunau, ka ra sa sega talega ni ra qarauna me ra vakabauta na noqu lewa, ka cakava; ia kevaka e cakava e dua na tamata, ena bula kina o koya; era sa vakacacana talega na noqu Siga ni Vakacecegu. Au a qai kaya, ni'u na sovaraka na noqu cudru vei ira, me'u vakayacora na noqu cudru vei ira mai na loma ni vanua dravuisiga.

²² Ia ka'u a tarova na ligaqu, ka cakacaka ena vuku ni yacaqu, me kakua ni vakacacani e matadra na veimatanitu tani, ka'u a kauti ira tani mai kina.

²³ Ia ka'u a bubului kina vei ira ena vanua lala ni'u na cakava me ra veiseyaki ena dela ni vuravura.

²⁴ Au sa vakayacora oqo baleta ni ra sa sega ni muria na noqu lewa, ni ra sa beca na noqu i vunau, era sa vakacacana na noqu Siga ni Vakacecegu, ka sa gole ga na matadra ki na matakau ni nodra qase.

²⁵ “O koya oqo, ka'u sa sega kina ni solia vei ira na vunau e vinaka, kei na lewa ka ra na bula kina;

²⁶ ia ka'u na vakacacani ira ena nodra i solisoli, ena noqu cakava me ra vakacabora na nodra ulumatua kecega ena loma ni bukawaqa, me'u vakataqayataki ira kina, me ra kila ni sai au o Jiova.

²⁷ “O koya oqo, o iko na luve ni tamata, mo vosa kina vei ira na mataqali i Isireli, ka kaya vei ira, Sa vosa vakaoqo na Kalou o Jiova: Ena ka talega oqo era sa vosa vakacacataki au kina o ira na nomuni qase, ni ra sai valavala veidabui vei au.

²⁸ Ia ka'u a kauti ira mai ki na vanua ka'u a bubuluitaka me'u solia me nodra: ia ena veivanua ga era raica kina e dua na ulunivanua cecere, se dua na kau rugurugua, era sa vakacabora e kea na nodra i soro kei na nodra i madrali me ka ni veivakacudrui; era vakatubura cake e kea na nodra ka boi vinaka, ka sova talega kina na nodra i sevu.

²⁹ Au a qai kaya vei ira, A cava li na yasana cecere o ni sa lakova? A vakatokai na vanua o ya me o ‘Pama’ me yacova na siga oqo.

³⁰ O koya oqo, mo kaya kina ki na mataqali i Isireli, Sa kaya vakaoqo na Kalou o Jiova: O ni sa vakadukadukalitaki kemuni li me muria na nodra i valavala na nomuni qase, ka cici muria na nodra kalou matakau?

³¹ Ni kemuni a cabora na nomuni i solisoli, ka vakacabori ira na luvemuni ena loma ni bukawaqa, o ni sa vakadukadukalitaki kemuni ena nomuni matakau kecega me yacova na siga oqo. Ia me'u na tarogi li oi au mai vei kemuni, na mataqali i Isireli? Me vaka na dina ni noqu bula, sa kaya na Kalou o Jiova, au na sega sara ni tarogi mai vei kemuni.

³² Ia na ka sa tubu oqori e lomamuni, ena sega sara ni yaco ni o ni sa kaya, ‘Laiva me keimami vakataki ira na veimatanitu tani, kei na veimataqali ni veivanua, me keimami qarava na kau kei na vatu.’ ”

³³ “Me vaka na dina ni noqu bula, sa kaya na Kalou o Jiova, au na nomuni tui, ka lewai kemuni vakaidina ena kaukauwa ni ligaqu ka sa dodo yani, ka sovaraka vei kemuni na noqu cudru.

³⁴ Ia ka'u na kauti kemuni tani mai vei ira na veimata tamata, ka vakasoqoni kemuni mai na veivanua o ni sa dui vakasavi kina ena ligaqu kaukauwa, ka sa dodo yani, kei na cudru sa sovaraki;

³⁵ ia ka'u na kauti kemuni ki na vanua liwa ni veimataqali tamata, ka ia na veilewai kei kemuni mai kea ni da veirai mata.

³⁶ Ia oqo au sa na lewai kemuni me vaka ga na noqu a lewai ira na nomuni qase mai na vanua dravuisiga o Saineai,” sa kaya na Kalou ko Jiova.

³⁷ “Ia ka'u na vakalakovi kemuni ena ruku ni titoko, ka na laiva mo ni lako vakaiwiliwili ka kauti kemuni mai mo ni mai vauci ena veiyalayalati.

³⁸ Ia ka'u na wasei ira tani mai vei kemuni o ira na dauvuki, kei ira na dautalaidredre vei au; ia ka'u na kauti ira tani mai na vanua era sa dui tiko vulagi kina, ka ra na sega ga ni curuma na vanua o Isireli. Ia o ni na qai kila e kea ni sai au o Jiova.

³⁹ “Ia vei kemuni, na mataqali i Isireli, sa kaya vakaoqo na Kalou o Jiova: Ni dui la'ki qarava yadua na nomuni matakau, ena gauna oqo, e muri talega, kevaka o ni sa sega ni vakarorogo vei au; ia o ni na sega tale ni vakacacana na yacaqu tabu ena nomuni i solisoli kei na nomuni matakau.

⁴⁰ Ia sa kaya na Kalou o Jiova, Era na qaravi au kece na mataqali i Isireli mai na noqu ulunivanua tabu mai na ulunivanua cecere ni Isireli; ka'u na vinakati ira mai kea, ka'u na kaciva talega mai kea na nomuni i solisoli i madrali, kei na i sevu kecega ni nomuni i loloma uasivi, kei na veika kecega o ni vakatabuya.

⁴¹ Au na vinakati kemuni ena nomuni i madrali boi vinaka, ni'u na kauti kemuni mai vei ira na veimataqali tamata, ka vakasoqoni kemuni mai na veivanua o ni dui vakasavi kina; ia ka'u na vakaraitaka vei kemuni na noqu savasava se i serau lagilagi e matadra na veimatanitu tani.

⁴² Ia o ni na kila ni sai au o Jiova, ni'u na kauti kemuni ki na vanua o Isireli, na vanua ka'u a yalataka me'u solia vei ira na nomuni qase.

⁴³ Ia o ni na la'ki vakananuma mai kea na nomuni valavala, kei na nomuni cakacaka kecega o ni a vakadukadukalitaki kemuni kina; ia o ni na beci kemuni vakataki kemuni ena vuku ni nomuni ca kecega o ni a kitaka.

⁴⁴ Ia o ni na kila ni sai au o Jiova, ni'u sa cakacaka vei kemuni ena vuku ni yacaqu, ka sega ni vaka na nomuni i tovo ca, kei na nomuni i valavala velavela, oi kemuni na mataqali i Isireli,” sa kaya na Kalou o Jiova.

⁴⁵ A sa yaco tale mai vei au na vosa i Jiova, ka vaka:

⁴⁶ “Luve ni tamata, mo rai mada vaka ki na mata ni ceva, ka vakatauca kina na nomu vosa, ka parofisaitaka na ca ki na veikau ena vanua o Nejevi;

⁴⁷ mo kaya ki na veikau o ya, Mo rogoca na vosa i Jiova: Sa kaya vakaoqo na Kalou o Jiova, Raica! au na tutuvaka na bukawaqa vei iko, ia ena kama kina na nomu veikau bulabula kecega, ka vaka talega kina na kau madu; ia ena sega ni bokoci rawa na yameyame ni bukawaqa, ka na kama talega kina na matadra kecega vaka ki na ceva kei na vualiku.

⁴⁸ Era na raica na tamata kecega ni sai au o Jiova ka tutuvaka; ka na sega talega ni bokoci rawa.”

⁴⁹ Au a qai kaya, “Ulei, kemuni Kalou o Jiova! era sa vosataki au, ka kaya, E sega li ni o koya ka dau vakavuna na vosa vakatautauvata, se sega?”