Isikeli 2 - Vakavakadewa Vou kei na iVola tale eso

Na Raivotu ni Vola Vivigi

¹ A sa kaya vei au o koya, “Luve ni tamata, mo tucake, ka'u na qai vosa vei iko.”

² A curumi au na Yalo ni Kalou ni sa vosa vei au o koya, ka vakaturi au ena yavaqu; ka'u a qai rogoci koya.

³ A sa kaya vei au, “O iko na luve ni tamata, au na talai iko vei ira na Isireli, ki na dua na matanitu dautalaidredre. Era sa vuki tani vei au, o ira kei ira na nodra qase me yacova mai na siga oqo.

⁴ Era sa tamata sega ni dau veidokai ka yalo kaukauwa talega. Au sa talai iko vei ira, ka mo qai kaya vei ira, ‘Sa kaya vakaoqo na Turaga o Jiova.’

⁵ Se ra na vakarorogo se sega, era na kila ni sa dua na parofita sa tiko kei ira.”

⁶ “Ia o iko, na luve ni tamata, mo kakua ni rerevaki ira, kakua talega ni rerevaka na nodra vosa, ka veitalia ga kevaka era cati iko se vakamadualaki iko; ni na vaka ga na bula ena kedra maliwa na batibasaga. Kakua ni rerevaka na nodra vosa, ka kakua ni taqaya ena i rairai ni matadra, ni ra sa kawatamata dautalaidredre ga.

⁷ Ia mo tukuna ga vei ira na noqu vosa, se ra na rogoca se sega; ni ra sa dau talaidredre.”

⁸ “Ia o iko na luve ni tamata, mo rogoca na ka au sa kaya vei iko. Mo kakua ni talaidredre me vakataki ira. Dolava na gusumu ka kania na ka au na solia oqo vei iko.”

⁹ Au a qai raica ni sa dua na liga sa dodo mai vei au, ka raica ni sa taura tu e dua na i vola vivigi.

¹⁰ A tevuka na liga o ya e mataqu, ka'u raica ni sa volai tu ena yasana ruarua na vosa ni yalo rarawa, na tagi yaso, kei na vakaisaisa ni vakaloloku.